«Jaho paharda da Ukrainy ŭzmacniłasia». Jak ciapier žyvie Pabła Hansales — ahient HRU, jaki viarnuŭsia ŭ Rasiju paśla abmienu
Hod tamu, 1 žniŭnia 2024 hoda, adbyŭsia samy maštabny abmien źniavolenymi pamiž Rasijaj i Zachadam paśla Chałodnaj vajny. Rasija vyzvaliła hrupu palitviaźniaŭ, dadaŭšy da ich asudžanaha ŭ Biełarusi da śmiarotnaha pakarańnia niemca Ryka Kryhiera, a ŭzamien atrymała pieravažna svaich špijonaŭ i kilera Vadzima Krasikava. Siarod abmienienych byŭ i Pabła Hansales (jon ža Pavieł Rubcoŭ) — ahient rasijskaj vajskovaj raźviedki, jaki pracavaŭ u Jeŭropie pad vyhladam žurnalista z Krainy Baskaŭ. Što ź im ciapier, daviedałasia vydańnie «Mieduza».
Pabła Hansales naradziŭsia ŭ siamji ispanki i savieckaha navukoŭca. Jaho maci paśla razvodu pierajechała ŭ Ispaniju, uziaŭšy z saboj dzieviacihadovaha Paŭła. Tam jon staŭ Pabła Hansalesam. U 2003 hodzie atrymaŭ rasijski pašpart. Pavodle źviestak vydańnia El Mundo, u 2010 hodzie HRU zavierbavała jaho padčas pajezdki ŭ Rasiju.
Hansales pradstaŭlaŭsia palitołaham i žurnalistam, naviedvaŭ zony kanfliktaŭ na Bałkanach i va Ukrainie, udzielničaŭ u kanfierencyjach, siabravaŭ z rasijskimi apazicyjanierami i navat zavodziŭ ramantyčnyja adnosiny (u tym liku z Žannaj Niamcovaj) — i ŭsio heta pad prykryćciom. Na samaj spravie jon pieradavaŭ infarmacyju HRU. El Mundo śćviardžaje, što jon navat sačyŭ za Alaksiejem Navalnym u Jeŭropie.
Siarod inšaha Hansales sprabavaŭ pracavać i siarod biełaruskaj palityčnaj emihracyi — jak minimum dva razy jon prychodziŭ u varšaŭski ofis Paŭła Łatuški.
U 2022 hodzie, paśla pačatku vajny va Ukrainie, polskija śpiecsłužby aryštavali Hansalesa kala miažy z Ukrainaj. Spačatku jaho abaraniali žurnalisckija arhanizacyi, ličačy achviaraj pieraśledu. Ale ŭ žniŭni 2024-ha jaho abmianiali na palitviaźniaŭ i jon viarnuŭsia ŭ Maskvu. Sa svajho samalota špijon vyjšaŭ u futbołcy z nadpisam «Impieryi patrebny ty» i pacisnuŭ ruku Uładzimiru Putinu.
Pa słovach znajomych, za hety hod Hansales staŭ bolš surovym, «jaho paharda da Ukrainy ŭzmacniłasia», a da taho ž jon pastajanna chrypić, kali havoryć. U jaho fibroz lohkich — surjoznaja chvaroba, jakuju jon źviazvaje ź pieraniesienym u turmie COVID-19. Apieracyju jon pakul adkładaje.
Abmienieny špijon žyvie ŭ Maskvie, razvodzicca z žonkaj, jakaja zastałasia ŭ Ispanii, sumuje pa dzieciach i maje daŭhi z-za sudoŭ u Polščy. Pracu niejkuju maje, ale jakuju — nieviadoma. Jon admoviŭsia supracoŭničać z Russia Today, choča pisać i rychtuje niejkija navučalnyja prajekty.
Raniej Hansales śćviardžaŭ, što jon, maŭlaŭ, nie špijon, a palityčna pieraśledavany žurnalist. Nibyta jaho «presavali» za ruskuju i baskskuju identyčnaść, za levyja pohlady i antypatyju da «kijeŭskaha režymu». Adnak, pavodle rasśledavańnia vydańnia The Insider, Hansales karystaŭsia dakumientami toj ža sieryi, što i viadomyja ahienty HRU, uklučna z tymi, chto atruciŭ siamju Skrypaloŭ.
Kamientary
ale nie zrabili hetaha .
I ŭ hetym artykule NN nie chapaje chacia b skazu, što Hanzalesa ŭ Polščy mocna baraniła levaje asiarodździe, bo toj rehularna atakavaŭ urad PiS. U tym liku rasijskaha špijona paśla zatrymańnia baraniŭ ŁHBT aktyvist Bart Stašeŭski.
Moža, kali b NN karystałasia nie tolki rasiejskimi krynicami i/abo była bolš abjektyŭnaja, pra heta biełaruskija čytačy taksama mahli b daviedacca.