Žanna Niamcova raskazała pra raman z rasijskim špijonam Pabła Hansalesam

Pabła Hansales (sapraŭdnaje imia — Pavieł Rubcoŭ) naradziŭsia ŭ SSSR. Jahonaja maci, Maryja Elena Hansales, pachodziła ź ispanskaj siamji, jakaja była evakujavanaja ź Ispanii padčas Hramadzianskaj vajny 1930-ch hadoŭ. Maryja Elena vyjšła zamuž za savieckaha navukoŭca, ale paśla razvodu razam ź dzieviacihadovym synam viarnułasia ŭ Ispaniju, dzie jon atrymaŭ imia Pabła.

U 2003 hodzie Hansales atrymaŭ rasijski pašpart, adnak u kołach apazicyi ŭ Jeŭropie jaho viedali jak ispanca, jaki vyvučaŭ ruskuju movu ŭ Barsiełonskim univiersitecie i pracavaŭ vajskovym karespandentam u baskskaj haziecie Gara. Jon časta naviedvaŭ haračyja punkty na postsavieckaj prastory, uklučajučy Danbas, Paŭdniovuju Asieciju, Krym i Prydniastroŭje.

Žanna Niamcova paznajomiłasia z Hansalesam u 2016 hodzie na pasiadžeńni Parłamienckaj asamblei Rady Jeŭropy. Jon byŭ akredytavany jak žurnalist i paprasiŭ u jaje intervju dla baskskaj haziety. Spačatku jana admoviłasia, paličyŭšy heta biessensoŭnym, ale paźniej pa paradzie kalehi zhadziłasia.

Paśla hetaha Hansales staŭ rehularna naviedvać mierapryjemstvy Fondu Niamcova ŭ roznych krainach ES. Fond nie apłačvaŭ jahonyja pajezdki, ale ŭ 2018 i 2019 hadach zaprasiŭ u jakaści lektara ŭ škołu žurnalistyki, bo Hansales mieŭ reputacyju žurnalista ź vialikim vopytam pracy ŭ haračych punktach.

Z 2017 pa 2019 hod u Niamcovaj i Hansalesa byli ramantyčnyja adnosiny. Žančyna adznačyła, što jany byli «nie vielmi ščylnymi». Niamcova admaŭlaje, što špijon atrymaŭ dostup da jaje asabistaj infarmacyi, choć i pryznała, što adnojčy addała jamu svoj stary noŭtbuk, kali jon paskardziŭsia na pałomku svajho. Heta byŭ noŭtbuk jaje baćki, ale ŭ im, pa słovach Niamcovaj, nie było ničoha važnaha.

Padazreńni nakont Hansalesa ŭźnikli, kali siabroŭka Žanny, jakaja žyła ŭ Ispanii, skazała: «Pabła, chopić chłusić, ty nie bask, ty čysty ruski». Niamcova taksama zaŭvažyła, što jon časta jeździŭ pa Jeŭropie, niahledziačy na nibyta nievialiki zarobak u baskskaj haziecie. Akramia taho, jon adkryta padtrymlivaŭ antyamierykanskija pohlady i ideju «šmatpalarnaha śvietu».

U kancy adnosin Niamcova dzialiłasia svaimi padazreńniami ź inšymi, ale mnohija nie vieryli joj. Sama jana taksama nie była ŭpeŭnienaj da kanca.

28 lutaha 2022 hoda Hansales byŭ zatrymany ŭ Polščy niedaloka ad ukrainskaj miažy pa padazreńni ŭ špijanažy. Polskija śledčyja pakazali Niamcovaj jaho spravazdačy, u jakich jon pisaŭ i pra jaje. Choć u dakumientach nie było ničoha admoŭnaha, sama situacyja ździviła jaje. Paśla dopytu Niamcova stała krynicaj infarmacyi dla rasśledavańnia pra Hansalesa, ale dziejničała ananimna, bo padpisała ŭ Polščy abaviazak nierazhałošvańnia.

Mienavita Niamcova prapanavała abmianiać Hansalesa na Uładzimira Kara-Murzu — paplečnika jaje baćki, jakomu ŭ Rasii prysudzili 25 hadoŭ turmy za dziaržaŭnuju zdradu.

Pa słovach Niamcovaj, jana pieradała hetuju ideju svajmu polskamu advakatu, a toj — polskim uładam, jakija, u svaju čarhu, danieśli jaje da ZŠA. U žniŭni 2024 hoda abmien adbyŭsia, i Hansales viarnuŭsia ŭ Rasiju.

Na abvinavačańni, što jaje fond i škoła žurnalistyki stali «punktam uvachodu» dla Hansalesa ŭ asiarodki rasijskaj apazicyi, Niamcova adkazała, što špijonaŭ pavinny vyjaŭlać śpiecsłužby, a nie jana. Što tyčycca ich adnosin, to jana ličyć, što jany byli sapraŭdnymi, a nie źviazanymi ź jaho pracaj jak ahienta.

• 3
• 0
• 7
• 48
• 4
• 2
• 2
• 0