Rasijskija praŭładnyja chakiery hadami vykradali zasakrečanyja dakumienty z sudovych sistem ZŠA

Jak paviedamlaje Bloomberg, chakiery, źviazanyja z uradam Rasii, na praciahu niekalkich hadoŭ mieli dostup da elektronnaj sistemy sudoŭ ZŠA i vykradali kanfidencyjalnyja dakumienty, jakija byli zasakrečanyja pa rašeńni sudździaŭ.

Pavodle spravazdačy ab uzłomie, ź jakoj aznajomiłasia vydańnie, złamyśniki atrymali dostup, vykarystoŭvajučy skradzienyja ŭlikovyja danyja karystalnikaŭ i ŭraźlivaść u sastarełym sierviery, jaki vykarystoŭvaŭsia fiederalnaj sudovaj sistemaj.

Pry hetym chakiery metanakiravana šukali mienavita zasakrečanyja materyjały. Choć u dakumiencie nie nazyvajucca kankretnyja vykanaŭcy, śledčyja znajšli dokazy, što za atakaj staić rasijskaja chakierskaja hrupoŭka, jakuju finansuje dziaržava.

Pakul niezrazumieła, kali mienavita chakiery ŭpieršyniu pranikli ŭ sistemu i kali sudy daviedalisia pra ŭzłom. Pa słovach adnoj z krynic, minułaj vosieńniu sudovaja ŭłada naniała kampaniju pa kibierbiaśpiecy dla vyrašeńnia hetaj prablemy.

Maštab uciečki vyklikaje surjoznuju zaniepakojenaść, bo chakiery cikavilisia zasakrečanymi dakumientami pa spravach ab špijanažy, machlarstvie, admyvańni hrošaj i dziejnaści ahientaŭ zamiežnych uradaŭ.

Takija zapisy časta ŭtrymlivajuć nadzvyčaj kanfidencyjalnuju infarmacyju, jakaja ŭ čužych rukach moža pastavić pad pahrozu kryminalnyja rasśledavańni i nacyjanalnuju biaśpieku, a taksama raskryć asoby infarmataraŭ, jakija supracoŭničajuć z pravaachoŭnymi orhanami.

«Hetyja sudovyja zapisy — adny z samych kaštoŭnych dakumientaŭ, jakimi vałodaje naš urad. Na žal, Kanhres nie vydzialaje sudovaj sistemie dastatkova srodkaŭ dla abarony danych, jakija jana zachoŭvaje, i my pavinny nieadkładna heta vypravić», — adznačyŭ Džejk Braŭn, były namieśnik nacyjanalnaha dyrektara pa kibierbiaśpiecy ŭ Biełym domie.

Pavialičyć

Jašče ŭ červieni fiederalny sudździa Majkł Skader, jaki ŭznačalvaje sudovy Kamitet pa infarmacyjnych technałohijach, adkryta zajaviŭ Kamitetu Pałaty pradstaŭnikoŭ, što niedachop inviestycyj zrabiŭ sistemy «sastarełymi i ŭraźlivymi».

U adkaz na pahrozu sudovaja sistema prymaje šerah terminovych mier. Jašče minułaj vosieńniu była naniataja firma pa kibierbiaśpiecy dla likvidacyi nastupstvaŭ uzłomu.

Z maja pačałosia ŭkaranieńnie šmatfaktarnaj aŭtentyfikacyi, a bolš za dziasiatak fiederalnych sudoŭ źmianili pracedury padačy kanfidencyjalnych materyjałaŭ, niekatoryja navat całkam zabaranili zahružać ich u elektronnuju sistemu, patrabujučy padavać tolki ŭ papiarovym vyhladzie.

Situacyja znachodzicca na kantroli Kanhresa: u lipieni adbyŭsia bryfinh dla jaho supracoŭnikaŭ, a na vierasień zakanadaŭcy zapytali dadatkovuju sakretnuju spravazdaču.

Infarmacyja pra ŭzłom stała publičnaj napiaredadni sustrečy prezidenta ZŠA Donalda Trampa z rasijskim prezidentam Uładzimiram Pucinym. Na pytańnie, ci płanuje jon uźniać hetuju temu, Tramp adkazaŭ, što čuŭ pra ŭciečku i nie vyklučaje takoj mahčymaści.

«Heta toje, čym jany zajmajucca. U ich heta dobra atrymlivajecca. I ŭ nas heta dobra atrymlivajecca. Nasamreč, my ŭ hetym navat lepšyja», — prakamientavaŭ situacyju amierykanski prezident.

• 0
• 0
• 0
• 3
• 0
• 0
• 2
• 0