Łatuška: Staršynia KDB Vakulčyk nakiroŭvaŭ da mianie pradstaŭnika na pieramovy ŭ žniŭni 2020-ha

Zhadvajučy padziei leta 2020-ha hoda ŭ novym vypusku tok-šou «Žyćcio-malina», Mikita Miełkazioraŭ spytaŭ, ci pisaŭ albo telefanavaŭ tady niechta z vysokapastaŭlenych siłavikoŭ Paŭłu Łatušku, ci abmiarkoŭvali jany niešta.

«Ja skažu tak, što supracoŭniki KDB navat infarmavali pra maršruty pieramiaščeńnia Łukašenki. Jany davali infarmacyju, dzie možna błakavać jaho. To-bok KDB nie było łajalna da Łukašenki», — adkazaŭ kiraŭnik Narodnaha antykryzisnaha ŭpraŭleńnia.

Łatuška nahadaŭ, što paźniej Łukašenka źniaŭ usich staršyń abłvykankamaŭ, a taksama dziaržsakratara Savieta biaśpieki Andreja Raŭkova, jaki admoviŭsia dalej uciahvacca ŭ prymianieńnie siły.

Adnosna tahačasnaha staršyni Śledčaha kamiteta Ivana Naskieviča Łatuška zhadvaje:

«Jon pryjšoŭ u kabiniet — tady heta była sustreča ŭ kabiniecie ministra ŭnutranych spraŭ, — i pakłaŭ na stoł Łukašenki 25 kryminalnych spravaŭ suprać siłavikoŭ. I Łukašenka, jak raspaviadali mnie, maciernymi słovami prahnaŭ Naskieviča z kabinieta, paźniej jon byŭ zvolnieny».

Što tyčycca staršyni KDB Valeryja Vakulčyka, to, jak zhadvaje Łatuška,

«Vakulčyk nakiroŭvaŭ mnie pradstaŭnika na pieramovy ŭ žniŭni [2020 hoda]. Ja byŭ u Kaardynacyjnaj radzie ŭžo. [Pradstaŭnik Vakulčyka] mianie vyklikaŭ na vulicu, i była prapanavanaja ździełka, što ja pavinien pierastać krytykavać Łukašenku, napadać na jaho, nu i tady jany harantujuć mnie biaśpieku. Ja skazaŭ, što nie. I, darečy, toj čałaviek skazaŭ: «Ja kazaŭ Vakulčyku, što Łatuška nie pahadzicca». Nu, jany i syšli».

Jak raskazvaje Łatuška sa spasyłkaj na insajdarskuju infarmacyju, staršynia KDB padaŭ Łukašenku zajavu ab adstaŭcy charakternaha źmiestu:

«Ja nie vykazaŭ vam absalutnuju łajalnaść, ja nie dziejničaŭ tak rašuča, jak vy čakali ad mianie».

«Łukašenka pryniaŭ hetuju adstaŭku i nakiravaŭ jaho ŭ apału na piać hadoŭ u Bresckuju vobłaść pamočnikam. I my jaho nie bačyli, nie čuli.

A zaraz jon staŭ pradstaŭnikom jaho intaresaŭ u Saviecie ministraŭ (u mai 2025 hoda Valeryj Vakulčyk zaniaŭ pasadu kiraŭnika Aparata Savieta Minstraŭ — NN) na rasijskija vykliki. To-bok Łukašenka baicca, i słušna baicca, bo jon sam stvaryŭ hetuju sistemu, što ruski ŭpłyŭ va ŭradzie moža pašyracca, i jamu treba kantralavać urad. Albo ŭrad moža vystupić suprać jaho», —

davodzić Łatuška i tłumačyć:

«Davajcie pa sistemie ŭłady. Voś chto kantraluje ŭładu ŭ krainie? Siońnia Łukašenka, u jaho ŭsie instrumienty. Kali jaho niama, kali ź im drenny stan, chto moža pryniać kantrol nad krainaj? Tolki ŭrad.

U nas prapisana [časovaje vykanańnie abaviazkaŭ kiraŭnika dziaržavy staršynioj Savieta Respubliki], ale kantraluje dziaržavu ŭrad. Kačanava nie kantraluje dziaržavu, u jaje niama sistemy. Padparadkoŭvajucca ŭsie kamu? Uradu, ministram — i pajšło pa sistemie.

Staršyni abłvykankamaŭ pojduć pad Kačanavu? Nie, jany pojduć pad urad. Tamu Łukašenka baicca, što ŭrad moža ŭ niejki momant stać suprać jaho albo vykonvać niejkija prarasijskija intaresy. Voś dźvie ryzyki, čamu jon pastaviŭ Vakulčyka, jaki prajšoŭ filtracyju praz hetyja piać hadoŭ».

• 0
• 0
• 5
• 1
• 1
• 1
• 1
• 0