«Uzor kramloŭskaj chłuśni i pychi». U Hienštabie USU adreahavali na spravazdaču rasijan pra vyniki letniaha nastupu
Ukrainski Hienštab adreahavaŭ na spravazdaču rasijskich kaleh ab «vynikach viasnova-letniaj kampanii 2025 hoda», nazvaŭšy jaho chłuśnioj. Rasijski letni nastup skončyŭsia «praktyčna ničym», kažuć u Hienštabie USU.
30 žniŭnia Hienštaba US RF raspaŭsiudziŭ spravazdaču adnosna vynikaŭ viasnova-letniaj kampanii 2025 hoda.
«U jaho asnovie — sproby vydać žadanaje za sapraŭdnaje i adkrytaja chłuśnia. Bo praz try z pałovaj hady poŭnamaštabnaj ahresii Kramla jaho čarhovaja siezonnaja nastupalnaja kampanija skončyłasia praktyčna ničym», — havorycca ŭ zajavie ŭkrainskaha Hienštaba.
Ukrainski bok śćviardžaje, što niahledziačy na zajavy Hierasimava, rasijskija vojski nie atrymali poŭny kantrol ni nad adnym bujnym horadam.
«Zatoje z pačatku hoda ŭ biessensoŭnych bajach na Charkaŭščynie, Łuhanščynie i Danieččynie rasiejcy stracili amal 210 tysiač svaich žaŭnieraŭ zabitymi i paranienymi, źniščana i paškodžana 2174 bajavyja braniavanyja mašyny, 1201 tank, 7303 artyleryjskija sistemy i 157 reaktyŭnych sistem załpavaha ahniu.
Fejkavyja relacyi praciŭnika ab «zonach biaśpieki» ŭ Sumskaj i Charkaŭskaj abłaściach — ništo inšaje, jak sproby schavać pravały apieracyj, jakija abiarnulisia dla voraha tupikom i dziasiatkami tysiač strat», — piša Hienštab Ukrainy.
Tam dadajuć, što siońnia ŭkrainskija vojski viaduć aktyŭnyja dziejańni na Sumščynie, dzie vyzvalili Kandrataŭku i Andreŭku, vyciaśniajuć sapiernika ź inšych pryhraničnych nasielenych punktaŭ.
Pradstaŭlenyja rasijanami ličby pa zachoplenych terytoryjach i nasielenych punktach ukrainski Hienštab nazyvaje «istotna zavyšanymi».
«U toj ža čas 100% paćvierdžany vynik, jakoha dasiahnuli rasijanie z pačatku 2025 hoda, — heta ich ahulnyja straty bolš za 291 tysiaču sałdat zabitymi i paranienymi. Masavaje ŭznaharodžańnie 120 tysiač rasijskich voinaŭ tolki paćviardžaje maštaby strat», — havorycca ŭ zajavie.
Tam padkreślivajuć nievybiralnaść rasijskich atak na ŭkrainskija terytoryi.
«Adnosna «vysokadakładnych udaraŭ» krainy-ahresara «vyklučna pa vajskovych abjektach» — canu hetaj pachvalby viedajuć tysiačy mirnych ukrainskich žycharoŭ, jakija štodnia hublajuć svaje damy, rodnych i blizkich. Dzie ŭpadzie rasijski «Iskander»— tam i «akažacca» kamandny punkt USU» abo «baza zamiežnych najmitaŭ», — kanstatujuć u Hienštabie USU.
«Vynikovaja spravazdača hienierała Hierasimava — typovy ŭzor ahresiŭnaj kramloŭskaj chłuśni i pychi. Ukrainskija siły abarony trymajuć front, źniščajuć akupanta i dakazvajuć: nivodnaja kramloŭskaja prapahanda nie schavaje pravału rasijskaj viasnova-letniaj kampanii 2025 hoda», — dadajuć u Hienštabie.
Učora načalnik Hienieralnaha štaba Rasii Valeryj Hierasimaŭ padvioŭ vyniki viasnova-letniaj kampanii 2025 hoda. Pavodle jaho słoŭ, «stratehičnaja inicyjatyva całkam naležyć rasijskaj armii».
Hierasimaŭ śćviardžaje, što vojski Rasii ciapier kantralujuć amal usiu Łuhanskuju vobłaść (99,7%), a taksama 79% Danieckaj, 74% Zaparožskaj i 76% Chiersonskaj. Jon zajaviŭ, što Rasija praciahnie vajnu suprać Ukrainy i budzie vieści nastupalnyja dziejańni.
Kamientary
A kamu jašče možyć naležyć inicyjatyva, jak nie nastupaječymu boku?