«Ukraina ŭ NATA — heta daroha da hramadzianskaj vajny». U Rasii raptam dastali z šafy Janukoviča — kab jon pachvaliŭ Pucina
Rasijskaje dziaržahienctva raptoŭna viarnuła ŭ infarmacyjnaje pole źbiehłaha byłoha prezidenta Ukrainy. Dla taho, kab jon paćvierdziŭ słovy Pucina.
Viktar Janukovič paśla ŭciokaŭ u Rasiju ŭ 2014 hodzie redka źjaŭlaŭsia ŭ infarmacyjnym poli. Minuły raz jon vystupaŭ z kamientarom paśla pačatku poŭnamaštabnaj vajny ŭ 2022 hodzie. Tady Janukovič faktyčna zaklikaŭ ukrainskaje kiraŭnictva da kapitulacyi.
Tady ž eks-prezident Ukrainy prylataŭ u Biełaruś. The Washington Post pisała, što Kreml razhladaŭ varyjant viarnuć Janukoviča da ŭłady paśla zachopu Kijeva.
U traŭni 2024 hoda samalot, jakim karystajecca Janukovič, znoŭ prylataŭ u Biełaruś akurat u toj momant, kali ź vizitam u Minsku byŭ Uładzimir Pucin.
Uvieś hety čas Janukovič maŭčaŭ. Ale siońnia jaho raptam vyciahnuli z šafy. Videakamientar eks-prezidenta Ukrainy apublikavała rasijskaje dziaržahienctva RIA «Novosti». U im jon zajaviŭ: Pucin maje racyju ŭ tym, što pryčynaj napadu Rasii stała imknieńnie Ukrainy ŭ NATA.
«Ja zaŭsiody byŭ kateharyčnym i pierakananym praciŭnikam ustupleńnia Ukrainy ŭ NATA. Ja zaŭsiody jasna i dakładna razumieŭ, što heta katastrofa dla Ukrainy. Heta šlach u nikudy. Heta pramaja daroha da hramadzianskaj vajny», — skazaŭ Janukovič.
Jon taksama zajaviŭ, što zaŭsiody byŭ prychilnikam jeŭraintehracyi Ukrainy. Ale abvinavaciŭ jeŭrapiejskich palitykaŭ u fanaberystaści.
«Uładzimir Uładzimiravič całkam maje racyju. Na samaj spravie, ja metanakiravana pracavaŭ pa zbližeńni Ukrainy ź Jeŭrapiejskim Sajuzam, staviŭ u kančatkovym vyniku zadaču ŭstupleńnia Ukrainy ŭ Jeŭrapiejski Sajuz. Inšaja reč, što partniory z boku ES pavodzili siabie padčas pieramoŭ časam, miakka kažučy, niekarektna: nie prajaŭlali razumieńnia składanaści ekanamičnaj situacyi ŭ Ukrainie. Naŭprost skažu — fanaberystaść prajaŭlali», — adznačyŭ Janukovič.
U krasaviku ŭkrainski sud zavočna asudziŭ źbiehłaha byłoha prezidenta Janukoviča da 15 hadoŭ kałonii pa spravie ab niezakonnym pierasiačeńni miažy i padbuchtorvańni da deziercirstva.
U Lvovie zabili eks-staršyniu Viarchoŭnaj Rady i kamiendanta Majdanu Andreja Parubija
SBU ŭkaraniła svajho ahienta ŭ maskoŭski ofis paplečnika Janukoviča, jaki zajmaŭsia špijanažam dla FSB
Troch byłych ministraŭ abarony Ukrainy padazrajuć u dziaržaŭnaj zdradzie
Akademikam Rasijskaj akademii navuk abrali «kravasisiu» časoŭ Janukoviča
Kamientary