U Połacku na miescy, dzie budavali radzilny dom, budzie aŭtasałon

Na ŭjeździe ŭ horad z boku Minska, na skryžavańni vulic Pietrusia Broŭki i Maksima Bahdanoviča, tam, dzie jašče apošniaje dziesiacihodździe tyrčali ržavyja bietonnyja słupy daŭhabuda-raddoma, ciapier budujuć aŭtamabilny centr «DžyMotars» — aficyjnaha dylera Geely i Belgee.

Historyja pačynałasia jašče ŭ śniežni 2010-ha, kali ŭ abłasnych hazietach paviedamlali, što ŭ Połacku budzie ŭźviedzieny sučasny radzilny dom, «viadučy pierynatalny centr rehijona». Prajekt uklučaŭ dva karpusy, troch– i čatyrochpaviarchovy, ahulnaj płoščaj 15 tysiač kvadratnych mietraŭ, dzie musili raźmiaścicca 80 łožkaŭ dla pacyjentaŭ u adna– i dvuchmiesnych pałatach z sučasnym abstalavańniem. Navat byŭ praduhledžany padziemny pierachod praz darohu.

Miascovyja ŭłady kazali pra adkryćcio ŭ krasaviku 2012-ha, maksimum u 2013 hodzie. Kiraŭnictva haradskoj balnicy raźličvała, što siudy buduć prymać nie tolki pałačanak, ale i žycharak navakolnych rajonaŭ.

Ale ŭ kancy 2012-ha pałačanie daviedalisia, što akušerskaje adździaleńnie ŭ horadzie zakryvajuć, a ŭsich žančyn nakiroŭvajuć u susiedni Novapołack. Pačałasia kampanija pratestaŭ: u «Adnakłaśnikach» stvaryli hrupu padtrymki raddoma, pa vulicach chadzili vałanciory sa śpisami, tysiačy ludziej padpisvalisia za jaho zachavańnie.

Pavialičyć

U adkrytym liście žančyny źviartalisia da ŭładaŭ: «My majem prava naradžać u svaim horadzie. Kali žyćcio žančyny i dziciaci zaležyć ad kožnaj chviliny, patračanaj na darohu, — pramarudžańnie padobna da śmierci». Ale čynoŭniki dali adkaz, što ŭ vialikich haradach adlehłaść da raddoma moža być bolšaj, čym adlehłaść pamiž Połackam i Navapołackam, a kali treba — puściać bolš rejsaŭ pamiž haradami. 

Padmurki zastalisia stajać, bietonnyja słupy pastupova ržavieli, u katłavanie źbirałasia vada, i ŭsia budoŭla pieratvaryłasia ŭ bałota i simvał biezhaspadarnaści. Za hetyja hady źjaŭlalisia roznyja abiacańni: pieraprajektavać pad žyllo, addać pad internaty, pradać z aŭkcyjonu. U aficyjnych adkazach paŭtarałasia adno i toje ž: «pracujem nad rašeńniem». U vyniku rašeńnie znajšłosia tolki praz dvanaccać hadoŭ.

Pavialičyć

U krasaviku 2024 hoda na placoŭku pryjšoŭ navapołacki trest №16. Ekskavatary asušyli nizinu, vyvieźli armaturu i pačali znosić słupy. Raboty išli ŭ paskoranym režymie — treba było «prybrać» horad da Forumu rehijonaŭ Biełarusi i Rasii. Miljony starych rubloŭ, jakija kaliści ŭračysta asvoili tut, byli zakapanyja ŭ ziamlu razam z budaŭničym śmiećciem. Praź niekalki tydniaŭ na ŭjeździe ŭ Połack zastałasia čystaja placoŭka.

Pavialičyć

U śniežni taho ž hoda rajvykankam vynies na hramadskaje abmierkavańnie novy prajekt: zamiest raddoma — aŭtasałon. Zamiest pałat i kuviezaŭ — šklany šoŭrum, servisnyja boksy i dźvie parkoŭki. Inviestar ukłaŭ u prajekt piać miljonaŭ rubloŭ.

Staršynia rajvykankama Ihar Markovič navat asabista prychodziŭ na placoŭku razam z kiraŭnictvam «BiełDžy», kab ahledzieć, jak idzie nulavy cykł.

Dahetul u Połacku niama svajho raddoma. Usie žančyny jeduć u Novapołack.

• 0
• 0
• 2
• 2
• 0
• 0
• 2
• 0