Aŭstralija zapłacić susiedniamu atołu $1,5 miljarda za stvareńnie kałonii dla departavanych mihrantaŭ-złačyncaŭ
Malusieńkaja cichaakijanskaja dziaržava Nauru pavinna stać afšornaj kałonijaj dla sotniaŭ złačyncaŭ zamiežnaha pachodžańnia, departavanych z Aŭstralii. Krytyki ŭžo nazvali ździełku sprobaj pieratvaryć vostraŭ u śmietnik.
Aŭstralija zaklučyła sakretnuju ździełku na $1,5 miljarda, kab departavać sotni złačyncaŭ zamiežnaha pachodžańnia na malusieńki cichaakijanski vostraŭ Nauru. Ab hetym piša The Telegraph.
Nievialikaja astraŭnaja dziaržava stanie dla Aŭstralii afšornaj papraŭčaj kałonijaj dla surjoznych złačyncaŭ, u tym liku zabojcaŭ, piedafiłaŭ i rabaŭnikoŭ.
Krytyki śćviardžajuć, što hetaja damova pieratvoryć vostraŭ płoščaj usiaho 21 kvadratny kiłamietr u «śmietnik» i nahadvaje praktyku Brytanii, jakaja vykarystoŭvała Aŭstraliju dla vyrašeńnia prablemy pierapoŭnienych turmaŭ u XVIII i XIX stahodździach.
Jak paviedamlajecca, pahadnieńnie było padpisana 29 žniŭnia. Jano praduhledžvaje, što Aŭstralija budzie płacić Nauru — treciaj samaj maleńkaj krainie ŭ śviecie (paśla Vatykana i Manaka) — na praciahu troch dziesiacihodździaŭ za raźmiaščeńnie departavanych niehramadzian. Pa słovach aŭstralijskich čynoŭnikaŭ, žyllo dla pieršych departavanych užo padrychtavanaje.
Hety krok źjaŭlajecca častkaj adnoj z samych žorstkich mihracyjnych palityk u śviecie, jakuju pravodzić Aŭstralija. Kraina ŭžo vykarystoŭvaje vostraŭ Nauru dla strymlivańnia nielehalnaj mihracyi: tudy adpraŭlajuć šukalnikaŭ prytułku, jakija prybyvajuć na łodkach, dla razhladu ichnich spraŭ. Hetaja praktyka dazvoliła rezka skaracić kolkaść takich prybyćciaŭ.
Adnak niadaŭna ŭrad sutyknuŭsia z novaj jurydyčnaj prablemaj, jakaja nie tyčycca ŭciekačoŭ. U 2023 hodzie Viarchoŭny sud Aŭstralii pastanaviŭ, što ŭłady bolš nie mohuć biaskonca ŭtrymlivać u imihracyjnych centrach złačyncaŭ zamiežnaha pachodžańnia paśla taho, jak jany adbyli svoj turemny termin. Heta tyčyłasia asob biez hramadzianstva i tych, čyje krainy admaŭlalisia prymać ich nazad.
Zhodna z novaj damovaj, Nuaru stanie prytułkam dla ludziej, jakim było admoŭlena ŭ vizie praz sudzimaść i jakich niemahčyma departavać z Aŭstralii.
Aŭstralija zapłacić Nauru 250 miljonaŭ dalaraŭ avansam dla stvareńnia metavaha fondu, a taksama budzie pieraličvać pa 44 miljony dalaraŭ štohod na praciahu 30 hadoŭ.
Apanienty raskrytykavali hety krok, zajaviŭšy, što Aŭstralija znoŭ pierakładaje svaje prablemy na Nauru, nasielnictva jakoha składaje ŭsiaho 12 000 čałaviek. Sienatar ad partyi «Zialonych» Devid Šubrydž adznačyŭ, što ŭrad «stavicca da Nauru jak da śmietnika», nahadaŭšy, što «Nauru — heta malusieńki vostraŭ z ekanomikaj, jakaja amal adsutničaje»
Sami žychary vostrava taksama staviacca da naviny skieptyčna. Adny ličać heta «lohkim sposabam zarabić», inšyja ž adznačajuć, što sotni miljonaŭ dalaraŭ, jakija Aŭstralija ŭžo zapłaciła Nauru za ŭtrymańnie šukalnikaŭ prytułku, nie pryviali da roskvitu na vostravie.
Kaliści Nauru, jakaja atrymała niezaležnaść ad Aŭstralii ŭ 1968 hodzie, ličyłasia samaj bahataj krainaj u śviecie dziakujučy zdabyčy fasfataŭ, ale praz drennaje kiravańnie jaje ekanomika pryjšła ŭ zaniapad, i ciapier kožny čaćviorty žychar žyvie za rysaj biednaści.
Paviedamlajecca, što raniej Aŭstralija sprabavała adpravić mihrantaŭ na vostraŭ Manus u Papua-Novaj Hviniei, ale ździełka sarvałasia.
Kamientary