8 vieraśnia deputaty francuzskaha parłamienta buduć hałasavać pa votumie davieru ŭradu. Kali kabiniet pojdzie ŭ adstaŭku, heta budzie ŭžo treci ŭrad za apošni hod, što ŭzmacniaje napružanaść i vyklikaje zaniepakojenaść na finansavych rynkach, piša Euronews.
Premjer-ministr Francyi Fransua Bajru abaraniaje płan ekanomii, jaki praduhledžvaje źnižeńnie dziaržaŭnych vydatkaŭ na 44 miljardy jeŭra da 2026 hoda, kab skaracić deficyt nižej za 3% VUP da 2029-ha. Siarod jaho prapanoŭ — baraćba z padatkovymi machlarstvami i navat admiena dvuch dziaržaŭnych śviataŭ.
Adnak apazicyjnyja siły, uklučajučy «Nacyjanalnaje abjadnańnie», «Niepakornuju Francyju», kamunistaŭ i «zialonych», užo abviaścili, što buduć hałasavać suprać.
U toj ža čas Jeŭrasajuz čakaje ad Francyi vykanańnia biudžetnych abaviazacielstvaŭ. Kali ŭrad razvalicca, heta ŭskładnić uzhadnieńnie biudžetu i padarvie davier da Paryža.
Ekśpierty papiaredžvajuć, što niestabilnaść moža asłabić pazicyi Francyi ŭ ES, u tym liku pry pryniaćci rašeńniaŭ u śfiery handlu, pramysłovaj palityki, zialonaj transfarmacyi i technałahičnych źmienaŭ.
U červieni ministr finansaŭ Francyi Amieli de Manšalen navat havaryła pra ryzyku mižnarodnaha kantrolu nad francuzskimi finansami, choć kiraŭnica Jeŭrapiejskaha centralnaha banka Kryścin Łahard vyklučyła mahčymaść takoha ŭmiašańnia.
Ekanamičnaja situacyja ŭ Francyi na hety momant nastupnaja:
- VUP Francyi u druhim kvartale 2025 hoda vyras na 0,3% i skłaŭ 657,6 miljarda jeŭra;
- Za 2024 hod VUP dasiahnuŭ 2,92 tryljona jeŭra, što robić Francyju druhoj ekanomikaj ES paśla Hiermanii;
- Dziaržaŭny doŭh na kaniec I kvartała 2025 skłaŭ 3,345 tryljona jeŭra (113,9% VUP);
- Deficyt biudžetu ŭ 2024 hodzie skłaŭ 169,7 miljarda jeŭra (5,8% VUP).
Hetyja pakazčyki značna pieravyšajuć kryteryi Maastrychckaj damovy, pavodle jakich doŭh nie pavinien pieravyšać 60% VUP, a deficyt — 3%.
Tandem prezidenta Francyi i jaho premjer-ministra staŭ samym niepapularnym u sučasnaj historyi krainy
Makron abjaviŭ pra hatoŭnaść 26 krain nakiravać svaje vojski va Ukrainu
Na ramont Łuŭra chočuć vydatkavać 800 miljonaŭ jeŭra. A na «Monu Lizu» mohuć uvieści asobny dadatkovy kvitok
Makron nazvaŭ Pucina drapiežnikam i ludajedam
Kamientary