Stali viadomyja novyja detali ŭ maštabnaj spravie arhanizataraŭ kancertaŭ

«Naša Niva» raniej pisała pra šerah zatrymańniaŭ u kancertnaj śfiery. Spačatku stała viadoma pra dyrektara Pałaca Respubliki Maksima Prychadoŭskaha. Taksama ŭ SIZA apynulisia kiraŭniki ivent-kampanij — Illa Pijatroŭski z Blackout Studio i Alaksandr Manyšaŭ — arhanizatar kancertaŭ, jaki maje dačynieńnie da ahienctvaŭ «Atam Intertejnment» i «Anbrejkbł», što absłuhoŭvali prałukašenkaŭskija mierapryjemstvy. Ruki siłavikoŭ dabralisia i da kiraŭnictva Kvitki.by.

Ciapier stała zrazumieła, pa jakim śpisie išli siłaviki dla zatrymańnia.

Padziei z aryštami źviazanyja z pryznańniem ekstremisckim farmavańniem telehram-čata «Orh BY».

Siarod tych, chto mieŭ da jaho dačynieńnie, pa viersii KDB, akurat Alaksandr Kasinski, jaki byŭ dyrektaram Kvitki.by. Jak nam ananimna raspavioŭ adzin z udzielnikaŭ taho čacika, jaki ciapier znachodzicca ŭ emihracyi, «Orh BY» byŭ stvorany ŭ pieršaj pałovie 2020 hoda, vyklučna dla kaardynacyi pracy prafiesijanałami śfiery. Na dvary byŭ kavid, praviły hulni na rynku kardynalna źmianialisia.

«Tam my prosta dzialilisia pracoŭnym dośviedam, niešta mahli adzin adnamu paraić. Ničoha «ekstremisckaha» ŭ čacie dakładna nie było, było ŭsio pra Biełaruś, pra budučyniu, pra niejki pazityŭ jašče», — raskazvaje surazmoŭca. Sam jon taksama mieŭ dačynieńnie da arhanizacyi kancertaŭ, jaho dadali ŭ čat «Orh BY» u 2020 hodzie. Pryblizna ŭ 2021‑m usie dyjałohi tam skončylisia.

Čat znajšli na telefonie ŭ adnaho z kancertnikaŭ. I heta stała padstavaj naviedacca da inšych udzielnikaŭ, jakija zastavalisia ŭ Biełarusi i byli identyfikavanyja. Padčas pravierak ludziej niekatorym dadavalisia i inšyja abvinavačvańni, naprykład, u karupcyi.

«Kiraŭnictva Kvitki.by užo na voli, bo pačało supracoŭničać sa śledstvam. A voś toj ža Illa Pijatroŭski z Blackout Studio jašče siadzić. Vinu jon nie choča pryznavać. Chacia nibyta jon moh vyjści pad zakład i być užo doma», — raskazała «Našaj Nivie» znajomaja ź situacyjaj krynica.

Jak nam raskazaŭ jašče adzin čałaviek sa śfiery, za kratami znachodzicca i inšy pradstaŭnik Blackout Studio Valer Kaleśnikaŭ. Na niejki čas jany navat pierasieklisia ŭ źniavoleńni z Alaksandram Manyšavym z «Atam Intertejnment» — miarkujecca, što ŭ metach pačuć ad ich niejkuju dadatkovuju infarmacyju, kali jany razhavoracca.

Dla Blackout Studio heta, darečy, užo daloka nie pieršy štrych u kryminalnaj bijahrafii. Tak, u 2021 hodzie za karupcyju byŭ asudžany były dyrektar «Minskkancerta» Andrej Mikucevič. Mužčyna braŭ hrošy za afarmleńnie damovaŭ na akazańnie pasłuh biez praviadzieńnia kankurentnych pracedur zakupaŭ. Adnym z tych, chto zapłaciŭ jamu chabar, byŭ dyrektar Blackout Studio.

Što tyčycca kiraŭnika Pałaca Respubliki Maksima Prychadoŭskaha, na pracoŭnym miescy jon dahetul adsutničaje, chacia pa-raniejšamu paznačany jak dyrektar na aficyjnym sajcie. Alaksandr Manyšaŭ ža stabilna nie anłajn ad pačatku vieraśnia.

• 0
• 0
• 5
• 9
• 4
• 0
• 1
• 1