«Kučaravieńkaja, ź flejtaj»: Sieviaryniec raskazaŭ, pra ŭdzieł Maryi Kaleśnikavaj u Maładym froncie
U novym vypusku «Toka» palityk i palitviazień Pavieł Sieviaryniec padzialiŭsia ŭspaminami pra pačatak hramadskaj dziejnaści Maryi Kaleśnikavaj.
«Maša pryjšła ŭ Małady front. Jana tady była kučaravieńkaja, u akularach. Flejta ŭžo była. Jana ŭžo hrała tam časam navat na vuličnych akcyjach, heta było cikava i kranalna. I jana adna ź pieramožcaŭ kursaŭ «Dydžejaŭ Adradžeńnia», — zhadvaje Pavieł časy maładości Maryi Kaleśnikavaj.
Sieviaryniec adznačaje, što «płyń śvietłaj biełaruskaści» ź junactva zachavałasia ŭ Kaleśnikavaj. Palityk zhadaŭ ich sustreču ŭ Čarnihavie paśla vyzvaleńnia palitviaźniaŭ:
«Maša kłasna razmaŭlaje pa-biełarusku… Jana zaśpiavała tam «Try čarapachi», «Prostyja słovy, prostyja rečy», usie vyzvalenyja plaskali ŭ ładki».
Jak davodzić palityk, mienavita takoje spałučeńnie intelihientnaści i bajcoŭskich jakaściaŭ robić jaje postać vyklučna važnaj dla biełarusaŭ siońnia:
«Tamu, ja dumaju, što voś heta toj vobraz, jaki dla Maryi ciapier najlepšy. Voś takoj jak by ščyraj i zachoplenaj žančyny z kulturaj, z bajcoŭskim charaktaram, z mocnaj volaj nam taksama brakuje».
Što takoje «Dydžei Adradžeńnia»
Jak patłumačyŭ Sieviaryniec, kursy «Dydžei Adradžeńnia», praź jakija prajšła Maryja Kaleśnikava, startavali jašče ŭ 1999 hodzie jak lidarskaja škoła. Ich hałoŭnaj metaj było navučyć maładafrontaŭcaŭ aktyŭna dziejničać i «pieramianiać školnuju, univiersiteckuju moładź da biełaruskaści».
Navučańnie ciahnułasia try miesiacy i składałasia ź dzieviaci tearetyčnych zaniatkaŭ i troch praktyčnych.
Siarod praktyčnych zaniatkaŭ, jak zhadvaje Sieviaryniec, była kamandziroŭka ŭ nieznajomy dla ŭdzielnika punkt Biełarusi:
«Vykidvajem čałavieka «z parašutam». Prosta dajom jamu taki i taki punkt Biełarusi. «Ty na sutki kamandziruješsia tudy». Źbirajem hrošy (na toj momant nie było tam fundacyjaŭ, hrantaŭ i hetak dalej, prosta źbirali svaje hrošy ŭ składčynu). Usio. Adpraŭlajem ciabie, umoŭna kažučy tam, u Małuju Bierastavicu».
Zadańni dla «desanta» byli niaprostymi, ale kreatyŭnymi:
«Zadača za sutki: arhanizavać biełaruskamoŭnuju dyskateku, prosta vyviesić bieł-čyrvona-biełyja ściahi, naprykład, i hetak dalej. I zrabić spravazdaču praz srodki masavaj infarmacyi».
Jak śćviardžaje Sieviaryniec, «moładzi takaja aktyŭnaść vielmi padabajecca. Na toj momant heta było fajna».
«Baćka braŭ nas na apazicyjnyja mitynhi jašče ŭ 1996 hodzie». Hutarka ź siastroj Maryi Kaleśnikavaj
Sieviaryniec raskazaŭ pra pieršuju sustreču ź siamjoj paśla vyzvaleńnia
«Paša, ja tabie nie vieru». Sieviaryniec raskazaŭ, jak vypadkovaja dziaŭčyna matyvavała jaho nazaŭsiody pierajści na biełaruskuju movu
Sieviaryniec pra svaju historyju kachańnia: Heta nietypova dla siońniašniaha śvietu
Kamientary