Biznes nie viedaje, jak zaraz dastavić tavary ź Jeŭrasajuza ŭ Biełaruś. Ceny na dastaŭku šakujuć
U dzień zaviaršeńnia biełaruska-rasijskich vučeńniaŭ «Zachad-2025» Polšča paćvierdziła, što nie adnović ruchu praź miažu. Biznes, jaki spadziavaŭsia na chutkaje adkryćcio miažy, nie viedaje, što rabić dalej.
Taryfy rastuć, ale biznes nie hublaje nadzieju
Zakryćcio miažy Polščaj amal poŭnaściu paralizavała ruch hruzaŭ ź Jeŭrasajuza ŭ Biełaruś.
Reč u tym, što praz adziny hruzavy punkt propusku na miažy z Polščaj «Kazłovičy» za sutki prajazdžała kala 700—800 fur, kali praz dva pierachody na miažy ź Litvoj i adzin na miažy z Łatvijaj — usiaho 200—250.
Pastaŭščyk tavaraŭ ź Jeŭropy, jaki spadziavaŭsia na chutkaje adkryćcio miažy, kaža, što nie viedaje, jak ciapier dastavić tavary ŭ Biełaruś.
«Raniej za furu, jakaja dastaŭlała hruz z Polščy ŭ Biełaruś, płacili ad 1700 da 2000 jeŭra. Ciapier za dastaŭku prosiać 5000‑5500 jeŭra, i znajści volnuju furu składana, bo polskija pieravozčyki nie mohuć zajazdžać u Biełaruś praź Litvu i Łatviju».
Praz Turcyju — nie varyjant
Pa słovach biznesmiena, taksama rezka vyraśli staŭki na dastaŭku praz Turcyju.
«Niadaŭna možna było znajści furu za 6000 jeŭra, ciapier prosiać 10 tysiač», — śćviardžaje surazmoŭca.
Inšy biznesmien, jaki dastaŭlaje tavary praź Litvu, kaža, što staraja partyja vyjechała pa starym taryfie, ale pieravozčyk užo paviedamiŭ, što, kali situacyja nie źmienicca, to nastupnaja dastaŭka budzie kaštavać daražej.
Ale rost cen na dastaŭku — nie adzinaja prablema, jakaja moža stać pastajannaj, kali Polšča ŭ chutkim časie nie adnović ruch praz svaju miažu.
Razam z cenami buduć raści i terminy dastaŭki hruzaŭ.
Uziali tydzień na pačakać
Surazmoŭcy, ź jakimi pahutaryła «Naša Niva», kažuć, što pakul nie hatovyja zamaŭlać dastaŭku pa novych taryfach.
«Damovilisia z partniorami, što pačakajem jak minimum da pačatku nastupnaha tydnia, bo ŭsie my spadziajomsia, što miažu adkryjuć», — kaža pastaŭščyk.
Ahułam ža biznesmieny adznačajuć, što paśla ŭviadzieńnia apošniaha pakieta sankcyj patok tavaraŭ u Biełaruś ź Jeŭrasajuza źmienšyŭsia navat z ulikam taho, što častka padsankcyjnych tavaraŭ pajechała praz Turcyju.
«Kožnyja padobnyja dziejańni, jakija vyklikajuć rost vydatkaŭ na dastaŭku, pryvodziać da taho, što tavary, jakija možna zamianić kitajskimi, rasijskimi abo niejkimi inšymi anałahami, pierastajuć pastaŭlać ź Jeŭropy, bo praz uzrosły košt jany stanoviacca mała kamu cikavyja», — tłumačyć biźniesmien.
Tym nie mienš surazmoŭca ličyć, što kali miaža z Polščaj zastaniecca zakrytaj, to heta pryviadzie da vialikich prablem z dastaŭkaj tavaraŭ.
«Ciapier mnohija čakajuć, što voś-voś situacyja źmienicca, tamu pa mahčymaści prytrymlivajuć hruzy na składach u Jeŭropie. Kali raptam Polšča tak i nie adkryje miažu, to ŭsie łamanucca praź Litvu i Łatviju, a ź ich prapusknoj zdolnaściu možna čakać źjaŭleńnia vializarnych čerhaŭ».
Što z čerhami?
Pa stanie na 15 vieraśnia ŭ elektronnaj čarzie na vyjezd ź Biełarusi praz zakryty PP «Kazłovičy» znachodziłasia bolš za 1700 fur.
Rastuć čerhi i na miažy z Łatvijaj i Litvoj. Tak, vyjezdu ź Biełarusi ŭ Łatviju čakajuć kala 240 hruzavikoŭ. Čarha pačała źbiracca z vychodnych. Tydzień i dva tamu čarhi na vyjezd u Łatviju nie było.
Vyjezdu ŭ Litvu praz «Kamienny Łoh» ciapier čakajuć 440 hruzavikoŭ, a ŭ «Bieniakoniach» — 480 hruzavikoŭ.
Kamientary