«Interbačańnie»: jak projdzie rasijskaja alternatyva «Jeŭrabačańniu»

Biełaruś adchilili ad «Jeŭrabačańnia» ŭ 2021 hodzie, Rasiju nieŭzabavie paśla pačatku poŭnamaštabnaha ŭvarvańnia va Ukrainu ŭ 2022 hodzie. Praz try hady, u lutym 2025 hoda, prezident krainy Uładzimir Pucin padpisaŭ ukaz ab praviadzieńni «Interbačańnia».

Palityčny aśpiekt

U «Jeŭrabačańnia», ad udziełu ŭ jakim adchilili Rasiju, adny z samych vysokich rejtynhaŭ na telebačańni siarod niespartyŭnych mierapryjemstvaŭ. Konkurs prachodzić pad devizam «Muzyka jadnaje» (United by music), choć palityčnyja skandały i hałasavańnie błokami jamu nie čužyja. Mierapryjemstva arhanizuje Jeŭrapiejski viaščalny sajuz, i šmat u čym jano trymajecca na «vialikaj piaciorcy»: Vialikabrytanii, Francyi, Hiermanii, Ispanii i Italii.

«Interbačańnie», u svaju čarhu, — heta całkam i poŭnaściu prajekt rasijskich uład: naziralnuju radu ŭznačalvaje pieršy namieśnik kiraŭnika administracyi prezidenta Siarhiej Kiryjenka, na čale arhanizacyjnaj rady — namieśnik staršyni ŭrada Dźmitryj Čarnyšenka, a ministr zamiežnych spraŭ Siarhiej Łaŭroŭ daŭ cełuju pres-kanfierencyju, pryśviečanuju muzyčnamu konkursu.

«My nie honimsia za niejkim palityčnym efiektam», — kazaŭ Łaŭroŭ pra konkurs.

Krytyki tym časam nazyvajuć «Interbačańnie» viartańniem «da saŭka» i časoŭ chałodnaj vajny.

Pieradhistoryja

Sam Łaŭroŭ kazaŭ, što «my adradžajem savieckaje «Interbačańnie»».

Konkurs pad takoj nazvaj užo isnavaŭ z 1965‑ha pa 1968‑y i z 1977‑ha pa 1980‑y hady. Jaho arhanizoŭvała Mižnarodnaja arhanizacyja radyjoviaščańnia i telebačańnia (jaje štab-kvatera ŭ 1950—1993 hadach znachodziłasia ŭ Prazie), a ŭdzielničali ŭ «Interbačańni» pieravažna krainy sacyjalistyčnaha błoku.

Na sajcie novaha «Interbačańnia» z honaram zajaŭlajecca, što «suśvietnaje šou № 1 znoŭ u Rasii». Praŭda, aryhinalnaje «Interbačańnie» ŭ Rasii nikoli nie pravodziłasia.

Rasija ŭžo sprabavała adradzić «Interbačańnie». U 2008 hodzie ŭ Sočy prajšoŭ konkurs «Piać zorak. Interbačańnie», u jakim ŭziali ŭdzieł 11 krain. Hałoŭny pryz atrymała pradstaŭnica Tadžykistana Tachmina Nijazava.

«Interbačańnie-2009» pavinna było prajści ŭ Dušanbe, ale hetaha tak i nie zdaryłasia.

Jak projdzie konkurs

«Interbačańnie» projdzie na Live Arena ŭ Maskvie, žyvuju tranślacyju ŭ Rasii budzie pakazvać Pieršy kanał. Pačniecca ŭsio a 20-j.

U ramkach konkursu pradstaŭniki bolš čym 20 krain buduć vykonvać pieśni daŭžynioj ad dźviuch da troch chvilin. Pieśni, pavodle rehłamientu, pavinny być u žanry papularnaj muzyki, pry hetym «vitajecca etničnyja i falkłornyja ŭstaŭki/sempły ŭ pieśni, jakija adlustroŭvajuć kulturu svajoj krainy».

Sapraŭdy, u mnohich pradstaŭlenych na konkurs kampazicyjach — asabliva z krain Łacinskaj Amieryki, Blizkaha Uschodu i Afryki — prysutničajuć narodnyja matyvy (ci pa mienšaj miery toje, što dla niepadrychtavanaha hledača hučyć jak narodnyja matyvy).

U hetym sensie rasijski numar — pieśnia Jarasłava Dronava, bolš viadomaha jak SHAMAN, «Prosta pa sercy», — chutčej nie adpaviadaje zajaŭlenaj mecie.

Zatoje SHAMAN całkam adpaviadaje patrabavańniam da ŭdzielnika: «nacyjanalnaja zorka» starejšaja za 16 hadoŭ, maje «maksimalny achop u krainie i vysoki indeks papularnaści», nacyjanalnyja muzyčnyja premii i hetak dalej.

Vybirać pieramožcu budzie prafiesijnaje žury, jakoje składajecca z muzyčnych ekśpiertaŭ z krain-udzielnic. Pieramožca atrymaje 30 młn rasijskich rubloŭ (prykładna 350 tys. dalaraŭ) u luboj valucie pa kursie CB na dzień płaciažu, a taksama kryštalny kubak.

Poŭnaha śpisu žury na sajcie konkursu pakul niama. Viadoma, što Rasiju pradstavić pradziusar hrupy «Lube» Ihar Maćvijenka, a Biełaruś — hienieralny pradziusar Nacyjanalnaj dziaržaŭnaj teleradyjokampanii Volha Šlahier.

Udzielniki

Pavodle rehłamientu, dla ŭdziełu ŭ konkursie treba jak minimum 16 krain: «pieravažna krainy, jakija ŭvachodziać u skład miždziaržaŭnaha abjadnańnia BRIKS, JEAES, SND, a taksama krainy Azii, Afryki i Łacinskaj Amieryki», tłumačycca ŭ rehłamiencie.

U «Interbačańni-2025» prymuć udzieł pradstaŭniki 23 krain, ad Biełarusi i Kazachstana da Kuby i Indyi. Tolki adna ź ich — Sierbija — taksama ŭdzielničaje ŭ «Jeŭrabačańni». Na konkursie ŭ Maskvie jaje pradstavić zasnavalnik hrupy Balkanopolis Słabadan Trkula.

Ad Biełarusi ŭdzielničaje Anastasija Kraŭčanka.

Samym niečakanym stała źjaŭleńnie ŭ śpisie ŭdzielnikaŭ ZŠA. Arhanizatary konkursu paćvierdzili ŭdzieł Złučanych Štataŭ u červieni, a pradstaŭnik krainy staŭ viadomy ŭ kancy žniŭnia: im staŭ śpiavak Brendan Chovard. Jon pavinien byŭ vystupić ź pieśniaj «We are champions».

Adnak usiaho za niekalki dzion da konkursu — i ŭžo paśla losavańnia, jakoje vyznačyła paradak vystupu ŭdzielnikaŭ, — Chovard skazaŭ, što nie zmoža pryniać udziełu ŭ «Interbačańni» z-za «niepradbačanych siamiejnych abstavin».

Jaho zamianiła aŭstralijskaja śpiavačka hrečaskaha pachodžańnia Vassy.

«Śpiavačka aktyŭna ŭdzielničaje ŭ sacyjalnych inicyjatyvach, uklučajučy muzyčnuju adukacyju dla moładzi i prasoŭvańnie «zialonych» technałohij», — tak jaje apisvaje aficyjny telehram-kanał konkursu.

Praŭda, hetaje apisańnie zamoŭčvaje ab padtrymcy śpiavačkaj amierykanskaj NKA NoH8, jakaja vystupaje za pravy ŁHBTK-pierson. Ab padtrymcy ŁHBTK+ — pryznanaj u Rasii ekstremisckaj arhanizacyjaj — sama Vassy nieadnarazova pisała ŭ svaim instahramie.

U skład prafiesijnaha žury ad ZŠA ŭvojdzie śpiavak, były ŭdzielnik hrup Deep Purple i Rainbow Džo Lin Ternier. Ab jaho ŭdziele arhanizatary paviedamili 17 vieraśnia, nieŭzabavie paśla abjavy ab zamienie Chovarda na Vassy.

Ternier viadomy nie tolki svaim hołasam, ale i padtrymkaj rasijskaj ułady.

«Ja našu piarścionak z hierbam Rasii, bo ja viedaju, što praŭda žyvie ŭ Rasii. Ja baču, što Rasija adradžajecca i stanovicca mocnaj», — kazaŭ jon u 2015 hodzie pierad vystupam u anieksavanym Krymie. Ternier žanaty na biełaruscy, i niejki čas jany žyli na jaje radzimie.

Krychu raniej, 9 vieraśnia, arhanizatary «Interbačańnia» nazvali inšaha člena žury ad ZŠA: pradziusara Araza Mamieta (vučyŭsia ŭ MDU ŭ 1987—1993 hadach), jaki pracavaŭ z Brendanam Chovardam. Aficyjna ab admovie Mamieta ad udziełu ŭ konkursie nie paviedamlałasia, ale miarkujučy pa ŭsim, Ternier pryjšoŭ na zamienu mienavita jamu.

Chto pieramoža?

Vidavočnaha favaryta siarod udzielnikaŭ konkursu niama — u pieršuju čarhu tamu, što «Interbačańnie» pryciahvaje kudy mienš uvahi, čym «Jeŭrabačańnie» ź dziasiatkami fanackich sajtaŭ, hrup i supolnaściaŭ.

Pradziusar Maks Fadziejeŭ, aŭtar kampazicyi, ź jakoj na «Interbačańni» vystupić SHAMAN, adznačaje ŭdzielnikaŭ z Kazachstana, Kyrhyzstana i Kitaja. Muzyčny krytyk Siarhiej Sasiedaŭ taksama vysoka aceńvaje pradstaŭnika Kazachstana Jernara Sadzirbajeva.

Člen žury ad Rasii Ihar Maćvijenka vykazaŭ upeŭnienaść, što SHAMAN uvojdzie ŭ top-5 udzielnikaŭ pa vynikach hałasavańnia.

U VK-videa na momant napisańnia hetaj natatki vykładzieny tolki 10 numaroŭ udzielnikaŭ. Čatyry ź ich nabrali krychu bolš za 120 tysiač prahladaŭ: Kyrhyzstan, Kuba, Vienieseuła i Efiopija.

Praŭda, heta havoryć nie stolki ab ich papularnaści, kolki ab tym, što ich vykłali raniej za ŭsich: pieśnia pradstaŭnikoŭ Tadžykistana, naprykład, źjaviłasia ŭ servisie ŭsiaho dzień tamu.

U YouTube, jaki rasijskija ŭłady zapavolvajuć užo druhi hod, vykładziena i taho mienš kampazicyj — usiaho dzieviać. Videa SHAMAN nabrała 27 tys. prahladaŭ, i heta na paradak bolš, čym usie astatnija.

Bukmiekiery tym časam staviać na Rasiju, i ŭ krychu mienšaj stupieni — na Kitaj.

• 0
• 0
• 4
• 2
• 0
• 0
• 0
• 0