Łatvija źbirajecca całkam absiekčy aŭtobusnaje złučeńnie ź Biełaruśsiu
Ale pačakajuć, pakul u pieravozčykaŭ skončacca vydadzienyja licenzii — u pieršaj pałovie 2026 hoda.
Ministerstva kamunikacyi Łatvii daručyła aŭtatranspartnaj dyrekcyi padrychtavać pravavoje abhruntavańnie namieru nie padaŭžać licenzii na rehularnyja aŭtobusnyja pieravozki pasažyraŭ z Łatvii ŭ Rasiju i Biełaruś, piša Delfi.lv.
Ministr kamunikacyi Łatvii Acis Švinka patłumačyŭ rašeńnie nieabchodnaściu ŭličvać ryzyki na miežach ES, źviazanyja z rostam pasažyrapatoku ŭ Rasiju i Biełaruś.
Pavodle źviestak aŭtatranspartnaj dyrekcyi, ciapier z Łatvii vykonvajucca čatyry aŭtobusnyja maršruty ŭ Rasiju i try — u Biełaruś.
Rehularnyja pieravozki ŭ Biełaruś vykonvaje kampanija SIA Latlines. Licenzija na rejsy ŭ Viciebsk dziejničaje da 31 studzienia 2026 hoda, u Minsk — da 26 lutaha 2026 hoda, u Homiel — da 27 červienia 2026 hoda.
U aŭtatranspartnaj dyrekcyi rastłumačyli, što dla spynieńnia rehularnych aŭtobusnych pieravozak u Rasiju i Biełaruś nieabchodny źniešni narmatyŭny akt. Pry hetym, kali krainy Bałtyi nie ŭzhodniać sumiesnaje rašeńnie, pasažyry dla pajezdak z Łatvii ŭ Biełaruś buduć karystacca maršrutami praź Litvu, a taksama «nielehalnym siehmientam» — mikraaŭtobusami da dzieviaci miescaŭ.
Z 15 kastryčnika 2025 hoda da 14 kastryčnika 2026 hoda Łatvija ŭviała zabaronu pieravozčykam rabić mižnarodnyja nierehularnyja pieravozki arhanizavanych hrup pasažyraŭ aŭtobusami pry pierasiačeńni miažy Łatvii i Biełarusi — tudy i nazad. Abmiežavańnie raspaŭsiudžvajecca na ŭsich pieravozčykaŭ, jakija ažyćciaŭlajuć mižnarodnyja nierehularnyja pieravozki pasažyraŭ aŭtobusami, niezaležna ad krainy rehistracyi pieravozčyka i transpartnaha srodku.
Kamientary