Kali Rasija nie spynić vajnu, rasijskija čynoŭniki pavinny viedać, dzie znachodzicca najbližejšaje bambaschovišča — Zialenski

Donald Tramp padčas sustrečy z Uładzimiram Zialenskim uchvaliŭ naniasieńnie Ukrainaj udaraŭ pa rasijskaj enierhietyčnaj infrastruktury, paviedamiŭ ukrainski prezident u intervju Axios, pierakazvaje «Ahientstvo».

Tramp, pa słovach Zialenskaha, sam uźniaŭ hetaje pytańnie na ich sustrečy ŭ aŭtorak. Amierykanski prezident ličyć, što Ukraina pavinna adkazvać na rasijskija ŭdary pa pryncypie «voka za voka», raspavioŭ ukrainski lidar.

«Kali jany atakujuć našu enierhietyku, prezident Tramp padtrymlivaje ideju, što my možam adkazać pa enierhietycy», — skazaŭ Zialenski.

Pavodle jaho słoŭ, toje ž samaje amierykanski prezident skazaŭ pra patencyjnyja ataki na vytvorčaść bieśpiłotnikaŭ abo rakiet, ale hetyja celi dobra abaronienyja.

Zialenski taksama raskazaŭ, što paprasiŭ u Donalda Trampa zbroju, jakaja, na jaho dumku, paskoryć zaviaršeńnie vajny.

«Prezident Tramp viedaje, ja jamu [skazaŭ], što nam treba, — skazaŭ jon. — Nam heta treba, ale heta nie značyć, što my budziem hetym karystacca. Tamu što, kali ŭ nas heta budzie, ja dumaju, heta stvoryć dadatkovy cisk na Pucina». Tramp u adkaz na heta, pa słovach Zialenskaha, skazaŭ, što «budzie pracavać nad hetym».

Zialenski ŭdakładniŭ, što kali va Ukrainy budzie dalnabojnaja zbroja ad ZŠA, Kijeŭ joju skarystajecca.

Na pytańnie žurnalista pra toje, ci budzie jana vykarystoŭvacca dla ŭdaraŭ pa Maskvie, ukrainski prezident adkazaŭ: «My nie terarysty. Navat kali našy ludzi nienavidziać rasijan, tamu što jany pačali vajnu i zabivajuć nas, usie našy ludzi razumiejuć, što my nie pavinny atakavać mirnych žycharoŭ». Pry hetym jon skazaŭ, što ludzi, jakija pracujuć u Kramli, pavinny viedać, dzie znachodzicca najbližejšaje bambaschovišča: «Kali jany nie spyniać vajnu, jano im spatrebicca ŭ lubym vypadku».

4 červienia padčas pieramovaŭ ź Zialenskim pa telefonie Tramp, jak pisała Financial Times, zaklikaŭ ukrainskaha kalehu aktyvizavać udary ŭhłyb Rasii, a taksama spytaŭ, ci zmoža Kijeŭ atakavać Maskvu, kali ZŠA pastaviać zbroju vialikaj dalokaści. Pra toje, što Tramp paraiŭ Zialenskamu pieranieści vajnu na terytoryju Rasii i pacikaviŭsia, ci zdolny Kijeŭ nanieści ŭdary pa Maskvie i Sankt-Pieciarburhu, taksama napisała WSJ. Pra paradu Trampa raskazvała i krynica The Washington Post.

Pres-sakratar Biełaha doma Keralin Levit paźniej skazała, što Tramp «prosta zadaŭ pytańnie, a nie zaklikaŭ da dalejšaha krovapralićcia».

Sam amierykanski prezident paźniej zajaviŭ, što Zialenski nie pavinien nanosić udary pa Maskvie.

U aŭtorak paśla sustrečy ź Zialenskim u Ńju-Jorku amierykanski prezident zajaviŭ, što Ukraina moža vyjhrać vajnu suprać Rasii i viarnuć usie stračanyja terytoryi.

Jon nazvaŭ rasijskuju armiju «papiarovym tyhram» i dadaŭ, što narod Rasii nie ŭśviedamlaje ŭsich maštabaŭ ekanamičnaha ŭronu, naniesienaha prezidentam Uładzimiram Pucinym.

Heta stała niečakanym razvarotam u rytorycy amierykanskaha prezidenta.

• 12
• 0
• 0
• 0
• 0
• 0
• 0
• 0