U mužčyn taksama byvaje klimaks: kali jon nadychodzić i čym adroźnivajecca ad žanočaha
Bolšaść z nas čuli pra žanočy klimaks, ale mała chto viedaje, što z uzrostam harmanalnyja źmieny adbyvajucca i ŭ mužčyn. Hety stan nazyvajecca andrapaŭza, i jana moža pačacca nie tolki paśla 50, ale navat u 35—40 hadoŭ, raspaviała «Smartpresu» doktar-endakrynołah i dyjetołah Taćciana Musik.
Kali moža pačacca mužčynski klimaks
Zvyčajna andrapaŭza raźvivajecca ŭ 45—50 hadoŭ, kali naturalna źnižajecca ŭzrovień testasteronu — hałoŭnaha mužčynskaha harmonu. U vyniku paharšajecca patencyja, źnižajecca libida, uźnikajuć prablemy sa snom i nastrojem.
Adnak pry zališniaj vazie klimaks moža nastupić raniej — navat da 45 hadoŭ.
«Tłuščavaja tkanka «pieratvaraje» testasteron u žanočyja harmony — estrahieny. Kali akružnaść talii pieravyšaje 90 sm, heta ŭžo sihnał, što ŭzrovień testasteronu, chutčej za ŭsio, panižany», — tłumačyć doktar.
Piečań i stres taksama ŭpłyvajuć
Pry chraničnych zachvorvańniach piečani, asabliva pry tłuščavym hiepatozie, parušajecca harmanalny abmien. Piečań udzielničaje ŭ mietabaliźmie testasteronu i estrahienaŭ. Heta taksama moža pryvieści da dysbałansu.
Nie mienš niebiaśpiečnyja pastajanny stres i niedasyp.
«Vysoki ŭzrovień karcizołu (harmonu stresu) pryhniataje sistemu «hipatałamus—hipofiz—iaječki», jakaja adkazvaje za vypracoŭku testasteronu. A niedasyp parušaje vydzialeńnie miełataninu i naturalny rytm snu, što taksama źnižaje ŭzrovień mužčynskaha harmonu», — udakładniaje śpiecyjalist.
Jak raspaznać mužčynski klimaks
Simptomy andrapaŭzy źjaŭlajucca pastupova i mohuć uklučać:
źnižeńnie patencyi i libida;
chutkuju stamlalnaść, apatyju, pierapady nastroju;
parušeńni snu, prylivy žaru, pavyšanuju patlivaść;
boli ŭ vobłaści serca, tachikardyju pry narmalnaj EKH;
suchaść skury, pihmientnyja plamy, vypadzieńnie vałasoŭ;
źnižeńnie myšačnaj masy i nazapašvańnie tłušču, asabliva ŭ vobłaści žyvata i hrudziej.
U adroźnieńnie ad žanočaha klimaksu, kali ŭzrovień estrahienaŭ rezka padaje za 1—2 hady, u mužčyn testasteron źmianšajecca pastupova — prykładna na 1—2% za hod paśla 30 hadoŭ. Tamu mnohija nie zaŭvažajuć pačatku źmien.
Što rabić
Kali jość padazreńnie na harmanalnyja źmieny, varta źviarnucca da androłaha abo endakrynołaha. Doktar moža pryznačyć:
ahulny i bijachimičny analiz kryvi;
analiz na prastat-śpiecyfičny antyhien;
vyznačeńnie ŭzroŭniu testasteronu, ŁH, FSH i źviazanaha ź imi hłabulinu.
Taksama varta zrabić elektrakardyjahramu, transrektalnaje daśledavańnie prastaty i UHD mašonki. Na padstavie hetych analizaŭ i abśledavańniaŭ možna budzie pastavić pravilny dyjahnaz.
Źnikłuju ŭ Mjanmie Vieru Kraŭcovu znajšli miortvaj6
Kamientary
Tak čto, nie vsio tak odnoznačno s etim tiestostieronom