Fiodar Paŭlučenka: U čym nie maje racyi Julija Mickievič? Turma što, robić kahości lepšym? Pryhažejšym? Bahaciejšym?

«Turma nikoha nie robić lepšym, tolki horšym», — tak Julija Mickievič, namieśnica pradstaŭnicy pa sacyjalnaj palitycy Abjadnanaha pierachodnaha kabinieta, prakamientavała skandał vakoł pavodzin Siarhieja Cichanoŭskaha ŭ Ńju-Jorku. Mnohich, u tym liku byłych palitviaźniaŭ, hetaje vykazvańnie abraziła.

U padtrymku Mickievič u novym vypusku jutub-prajekta «Saša, čto ty niesioš?…» vykazaŭsia hałoŭny redaktar Reform.news Fiodar Paŭlučenka.

«Usie nosiacca ciapier jak sa ściaham ź jaje frazaj. (…) To-bok, abvinavacili ŭžo prosta va ŭsim jaje, va ŭsich śmiarotnych hrachach», —

rezka zaŭvažyŭ Paŭlučenka i akcentavaŭ uvahu na tym, što jon sam havaryŭ dakładna takuju ž frazu ŭ efiry svajho jutub-kanała.

«Ja prapanuju padumać, u čym nie maje racyi Julija Mickievič. Turma što, robić kahości lepšym? Pryhažejšym, maładziejšym? Bahaciejšym, moža? Lišnija zuby, piečań, nyrki vyrastajuć? I ŭvohule ŭ cełym samaadčuvańnie palapšajecca, tak? Vidać, heta majecca na ŭvazie, kali krytykujuć Juliju Mickievič za toje, što jana zajaviła, što turma nikoha nie robić lepš, tolki horš», —

praciahnuŭ svaje razvažańni Paŭlučenka.

Na jaho pohlad, krytyki śviadoma vyryvajuć frazu z kantekstu. Jon tłumačyć heta albo nierazumieńniem, albo metanakiravanym chiejtam.

«Kali ty tupy, voś jak by ŭ ciabie zusim užo mozh adbity, možna pryčapicca da luboha słova. Možna da słova «słova» pryčapicca. I z hetaha vykrucić cełuju chiejtarskuju kampaniju»,

— zajaviŭ hałoŭny redaktar Reform.news i praciahnuŭ:

«Mnie nie padabajecca hetaja biełaruskaja palityčnaja kultura, jakaja naradžajecca, kali mnohija dazvalajuć sabie (z hetaha palityčnaha kłasa), vykarystoŭvać manipulacyi i prosta adkrytaje chamstva dla taho, kab chejcić svaich palityčnych apanientaŭ. Kankurentaŭ. Kali jość kanflikt intaresaŭ. Vykarystoŭvać voś takija mietady, na moj pohlad, heta nieetyčna i niepryhoža».

Jon pryznaŭ, što vykazvańnie pra turmu mahło pakryŭdzić byłych palitviaźniaŭ, i źviarnuŭ uvahu na emacyjny post byłoha palitviaźnia Siarhieja Hunia, jaki ŭbačyŭ u hetych słovach sprobu vystavić viaźniaŭ «ahresiŭnymi abjuzierami sa złamanaj psichikaj, pahrozu, a nie resurs». Paŭlučenka pasprabavaŭ raźviejać hetyja aściarohi:

«Ja chacieŭ by, kali raptam vy pačujecie ŭ maich słovach vodhuki hetaj rytoryki, prosta spynicca i skazać, što nie, my tak nie havorym. Ja tolki sprabuju padkreślić, što turma nikoha nie robić lepšym.

Nie stanovicca čałaviek lepšym ad taho, što jon traplaje ŭ turmu. Heta ŭvohule nieabaviazkovy dośvied. Asabliva dla palitviaźniaŭ. Jaho nie treba prachodzić. Heta hubić žyćcio. Heta žachlivaje vyprabavańnie. Lepš by hetaha ŭvohule ŭsiaho nie było. Voś prostaja dumka».

• 16
• 2
• 1
• 2
• 0
• 0
• 2
• 0