Ź jeŭrapiejskich biblijatek skrali kala 170 redkich knih Puškina i inšych rasijskich kłasikaŭ. Navošta — nichto nie viedaje
U 2022 i 2023 hadach ź biblijatek pa ŭsioj Jeŭropie — ad Ryhi da Paryža — źnikli dziasiatki redkich vydańniaŭ ruskaj kłasiki, u tym liku knihi Alaksandra Puškina, Mikałaja Hohala i Michaiła Lermantava. Ahulnaja kolkaść skradzienych knih składaje kala 170, a ich košt — bolš za 2,5 miljona funtaŭ sterlinhaŭ. Mižnarodnaje rasśledavańnie źviazała hetyja kradziažy z hrupaj hramadzian Hruzii, ale zastajecca niezrazumiełym, dziejničali jany samastojna ci pa zamovie bolš upłyvovych sił, piša The Guardian.
Vosieńniu 2023 hoda ź Biblijateki Varšaŭskaha ŭniviersiteta źnikli vosiem redkich knih. Para, jakaja zarehistravałasia pad imionami Silviena Childehard i Marka Oraviec, zakazała knihi z zakrytaha fondu i źnikła razam ź imi, pakinuŭšy na stale tolki try tamy. Siarod skradzienych — paema Puškina «Braty-razbojniki». Raniej z hetaj biblijateki ŭžo źnikła bolš za 70 knih. Złamyśniki padmianiali aryhinały faksimilnymi kopijami, kab biblijatekary nie zaŭvažyli padmanu.
Padobnyja incydenty adbylisia ŭ Ryzie, Talinie, Vilni, Chielsinki, Prazie, Lijonie, Paryžy, Ženievie, Bierlinie i Miunchienie.
Usie dziejańni złamyśnikaŭ adbyvalisia pa adnoj schiemie: pryjazdžali z padroblenymi dakumientami, zakazvali redkija vydańni i vynosili ich z čytalnych załaŭ, časta padmianiajučy aryhinały kopijami. U Ryzie jany pradstaŭlalisia ŭkrainskimi ŭciekačami, u Paryžy — bałharskimi studentami.
Pieršym zatrymanym staŭ 46‑hadovy hramadzianin Hruzii Bieka Cyrekidze, u jakoha znajšli padroblenyja čytackija bilety, instrumienty dla restaŭracyi i kalekcyju biblijatečnych štampaŭ. U 2024 hodzie rasśledavańnie abjadnała pravaachoŭnyja orhany Polščy, Francyi, Litvy i Šviejcaryi pry padtrymcy Eurojust, a da spravy dałučyłasia i Hruzija.
Matyvy złačynstva da hetaha času niezrazumiełyja: niekatoryja śćviardžajuć, što heta dziejnaść mižnarodnaj złačynnaj sietki, inšyja — što kradziažy mahli być źviazanyja z «viartańniem kulturnaj spadčyny» ŭ Rasiju.
Asablivuju ŭvahu śledstva pryciahvaje toje, što amal usie skradzienyja knihi byli źviazanyja ź imieniem Alaksandra Puškina, jaki ličycca simvałam ruskaj nacyjanalnaj kultury.
U Tbilisi 23‑hadovaja Ana Hahaładze pryznałasia, što ŭ kastryčniku 2023 hoda razam z mužam skrała knihi ŭ Varšavie. Adnak z 79 skradzienych tam tamoŭ im naležali tolki piać, i ŭsie jany akazalisia padrobkami. Hahaładze śćviardžała, što ich padmanuli: zamiest abiacanaj apłaty jany atrymali kopii i pakryli tolki vydatki na darohu.
U Litvie rasśledavałasia sprava suprać inšaha hramadzianina Hruzii Michaiła Zamtaradze, jaki dziejničaŭ razam z hrupaj pa zahadzia składzienym płanie. Jon śćviardžaŭ, što pradavaŭ knihi rasijskamu kalekcyjanieru Maksimu za kryptavalutu. Mahčyma, skradzienyja knihi źjavilisia na aukcyjonie rasijskaha doma «Litfond», ale pradstaŭniki aukcyjona zapeŭnili, što nikoli nie pradavali knihi ź dziaržaŭnych biblijatek.
Na hety momant nivodnaja z prykładna 170 skradzienych knih Puškina i inšych kłasikaŭ nie była znojdziena, a supracoŭnictva z Rasijaj dla viartańnia knih nie atrymałasia. Polski prakuror Bartoš Jandy adznačyŭ, što biez udziełu rasijskaha boku viarnuć knihi praktyčna niemahčyma.
Špijon z varšaŭskaj meryi: polski čynoŭnik dapamahaŭ rasijskaj raźviedcy
Jak Rasija z dapamohaj karabla-špijona sočyć za padvodnymi kabielami Jeŭropy
U zatrymanaha ŭ Polščy taksista-špijona znajšli śpis biełarusaŭ, za jakimi jon mieŭ zadańnie sačyć
Za raspaŭsiud kramloŭskaj prapahandy ŭ Daminikanie zatrymali 25‑hadovaha rasijanina
Ciapier čytajuć
Nasta Bazar pastupiła na prahramu Kalinoŭskaha i choča stać sacyjałahiniaj: «Vučoba paśla 40 hadoŭ — svojeasablivy eliksir maładości»73
Kamientary