Pit Paŭłaŭ: «U N.R.M. byli i dzikaja papularnaść, i navatarstva. Zrobim apošnija kancerty pryhožymi»

— U siecivie paviedamlajecca, što ŭ N.R.M. budzie apošni kancert u Vilni 7 listapada i apošni kancert u Varšavie 9 listapada. Što vy ŭkładajecie ŭ vyznačeńnie «apošni»?

— Mienavita toje, što napisana. Skažam ščyra: cikavaść da hurta daŭno nie takaja vysokaja, jak raniej. Da taho ž źbiracca nam, muzykam, vielmi składana. Kali ličyć užo z byłymi ŭdzielnikami, to muzyki hurta raskidanyja pa troch krainach.

U takich umovach možna było b pastavić tvorčaść u ramkach hurta na tak zvanuju paŭzu. Ale pa ščyraści, na hety momant ja nie baču padstaŭ, pry jakich dziejnaść možna było b adnavić.

A z ulikam taho, što my zapisali, na moj pohlad, adzin z najlepšych albomaŭ hurta («Apošni»), jość mahčymaść nie tolki pakazać jaho, ale i zrabić apošnija kancerty pryhožymi — z novymi pieśniami. My šmat repieciravali, znachodzimsia ŭ dobrym kancertnym stanie. Adnak u maich vačach heta apošnija kancerty N.R.M.

— Kali vy azirajeciesia nazad, što vam najbolš darahoje z usiaho šlachu N.R.M.?

— Šlach N.R.M. — heta cełaje žyćcio, składana vyłučyć adzin niejki pieryjad ci momant, było šmat usiaho. Pačatak atrymaŭsia imklivy i natchniony, za jakim nadyšła dzikaja papularnaść.

My stvarali novyja trendy. U tym liku, stvarali samu infrastrukturu hrańnia kancertaŭ u Biełarusi. My pryjazdžali ŭ miescy, dzie nikoli ŭ historyi nie było rok-kancertaŭ. Ci ŭ miastečki, dzie kancert N.R.M. byŭ pieršym za niekalki dziesiacihodździaŭ. My stvaryli cełyja kirunki: naprykład, hrali akustyčnyja kancerty — ich da nas nichto nie ładziŭ, by nie było akustyčnych instrumientaŭ u krainie, možacie sabie ŭjavić?

Pavialičyć

My šmat što rabili pieršymi. Jašče adzin prykład: kali ŭ nas vyjšaŭ pieršy sinhł, ja pierakłaŭ słova jak «samotnik». Daśviedčanyja žurnaluhi da hetaha času karystajucca hetym terminam.

Navatarstva N.R.M. u śviadomaści ludziej nie piersanifikavana, pošuk novych formaŭ i padychodaŭ adbyvaŭsia ŭvieś čas dziejnaści hurta. Pierš za ŭsio dziakujučy šalonaj padtrymcy hurta, što vyklikała ŭ nas jak tvorcaŭ strašny entuzijazm.

Kali syšoŭ Lavon, heta stała mocnym vyklikam. U mianie byŭ hurt GARADzKIJA, falkłorny prajekt PAPARAĆ, i ja dumaŭ, što N.R.M. zakryjecca. Ale nas trymała strašnaja luboŭ da hetaha hurta.

Mahčyma, heta ciažka zrazumieć, ale hrać u N.R.M. — heta ciažka. My byli ničym nikomu nie vinnyja, ale ledź nie kožny nas vinavaciŭ, što my zrabili niešta nie tak. Chacia my rabili ŭsio tak, a rašeńnie pra sychod Lavona Volskaha — nie našaje, a jaho.

Kali vyjšaŭ albom D.P.B.Č. (2013), u jaki my šmat ukłali, ludzi fizična nie mahli jaho pryniać: jak heta — N.R.M. i bieź Lavona? Dumaju, mnohija jaho navat nie słuchali. Ale što b tam ni było, hrańnie ŭ N.R.M. davała nam enierhiju i ščaście.

I toje, što albom «Apošni» napisaŭsia (pad uździejańniem padziej 2020 hoda i vajny), heta absalutnaja niečakanaść. Papiaredni albom D.P.B.Č. byŭ tak nazvany, bo miełasia na ŭvazie, što heta, napeŭna, usio, što bolš ničoha pisać my nie budziem. I toje, što napisaŭsia jašče adzin albom — mocny, celny, kłasny pa huku — ja razhladaju jak padarunak losu.

— Što budzie dalej dla vas asabista paśla apošnich kancertaŭ N.R.M.?

— U mianie stolki rolaŭ u muzycy, što kab padrabiazna pra ich raskazać, treba asobnaje intervju. U mianie padrychtavany cykł, pieršaj častkaj jakoj stali Zbroja. Zołata. Kabiety, dzie ja vystupaju nibyta hierojem miuzikła ci sieryjała, adnačasova scenarystam i aktoram. A jość jašče druhaja, nie vydadzienaja pakul častka «Kantrabanda».

Amal hatovy albom majho falkłornaha hurta PAPARAĆ, jaki treba davieści da ładu.

Napisalisia pieśni dla hurta Pit Pawlaw, paru ź jakich vy ŭžo mahli čuć — Tu, tu-tu-tu, Tyt, a taksama Točyć.

Jašče adna rola, pra jakuju chacieŭ by raskazać čytačam, — ja pačaŭ vieści na «Radyjo Racyja» muzyčny padkast «Chiba tolki recha». Tam nie tolki biełaruskaja muzyka, ale i maje asabistyja razvažańni, asabistyja vykazvańni. Tych, chto słuchaje ci budzie słuchać, zaklikaju dzialicca svajoj reakcyjaj i pažadańniami — pišycie ŭ moj kanał u telehramie.

Pa słovach Pit Pawlaw mianie možna taksama znajści ŭ inšych sacsietkach, padpisvajciesia na moj kanał u Youtube.

— Prachodziła navina, što vy zdymajeciesia ŭ polskich filmach. Jak spravy na hetym kirunku?

— Ja zdymaŭsia ŭ jakaści masoŭki, u roli machlara. Nasamreč pra heta nie varta było b kazać, kali b nie majo žadańnie źniać svoj sieryjał pa prajekcie Zbroja. Zołata. Kabiety. Tamu na zdymkach, niachaj navat u masoŭcy, ja maju mahčymaść atrymać peŭny dośvied.

Pavialičyć

— U 2023‑m vy jeździli z kancertami da kalinoŭcaŭ va Ukrainu, paśla źbirali hrošy na dron…

— Što značyć «na dron»? Ja dapamoh sabrać srodki ŭžo na piać dronaŭ. Na dva sabraŭ asabista, a jašče na try aktyŭna dapamahaŭ. Cikava, što maja pieśnia «Pałaje» tak spadabałasia kalinoŭcam, što jany padkładajuć jaje pad svaje roliki, pad tak zvanyja «bajavyja».

Byli dumki i klip źniać na hetuju pieśniu va Ukrainie, ale pakul sprava nie dajšła da hetaha, moža, jašče dojdzie.

— Jak vy asabista vytrymlivajecie siońniašnija ciažkija časy?

— Pa-pieršaje, ja vyrašyŭ, što nie mušu ŭdzielničać u rečach, jakija pracujuć na razdraj. Kali pačynajecca bulbasrač, ja sprabuju ŭsio ž abjadnać abodva baki, davieści ich da pahadnieńnia. 

Pa-druhoje, štodzień ja prachodžu minimum 10 kiłamietraŭ. Usie razmovy-pieramovy ja pakidaju na čas, kali idu na špacyr, jaki časam pieraŭtvarajecca ŭ biaskoncy. I praź dzień chadžu na turnik. Davoli aktyŭna trenirujusia, mahčyma, zaraz znachodžusia ŭ najlepšaj fizičnaj formie za ŭsio žyćcio.

Kaniešnie, ja adčuvaju i nastalhiju, i depresija sprabuje nakacić na mianie, ale fizičnaja aktyŭnaść palapšaje harmanalny fon i razhaniaje tuhu, jakaja abaviazkova zachapiła b mianie, kali b ja prosta siadzieŭ i hladzieŭ u ścianu. Tamu i ŭsim raju — nie siadzicie doma i chadzicie na špacyry.

Pavialičyć

• 30
• 1
• 0
• 1
• 0
• 0
• 0
• 3