«Minus 650 jeŭra». Jak biełarusy rezka źmianiajuć maršruty paśla zakryćcia miažy ź Litvoj

«Stracili bilety na samalot da Hamburha»

Mužčyna razam ź siamjoj pavinien byŭ lacieć ź Vilni u Hamburh 30 kastryčnika. Ale maršrut pryjšłosia terminova pierabudoŭvać — jany adpravilisia na aŭtobusie ŭ Varšavu, adtul na ciahniku ŭ Bierlin, a ŭžo ź niamieckaj stalicy na chutkasnym ciahniku ŭ Hamburh. Cana na čałavieka ŭ sumie atrymałasia takoj ža, jak adzin aŭtobusny bilet u Vilniu. Praŭda, daroha akazałasia niesuvymiernaj pa časie: 22 hadziny siamja dabirałasia tolki da Varšavy, na prachodžańnie miažy syšło 16 hadzin.

— Na samalot bilety AirBaltic kaštavali 450 jeŭra, atrymałasia viarnuć tolki 66 jeŭra. Niahledziačy na toje, što na pasadku my nie źjavilisia, zvarotnymi biletami avijakampanija dazvoliła skarystacca. Heta redkaść dla Jeŭropy. Ale jany ŭsio roŭna pojduć u śmiećcie, lacieć u Vilniu niama nijakaha sensu.

Z Hamburha ŭ Varšavu aŭtobus jedzie 11 hadzin, a ź Vilni ŭ Varšavu — 8. Praściej 7 hadzin z Hamburha na ciahniku ź pierasadkaj u Bierlinie zrabić. Jechać kamfortniej. Voś prama zaraz, naprykład, my pojdziem u muziej Madam Ciuso ŭ Bierlinie, śpiecyjalna vybrali 8 hadzin pramiežak pamiž rejsami dla prahułki pa Bierlinie. Treba niešta stanoŭčaje z dadzienaj situacyi zdabyć, — dzielicca hieroj.

Što pa vydatkach? Kvitki Minsk — Varšava na dvaich darosłych i dzieviacihadovaje dzicia kaštavali 305 rubloŭ. Ciahnik Varšava — Bierlin — 60 jeŭra, chutkasny ciahnik Bierlin — Hamburh — 130 jeŭra. Usiaho: prykładna 970 rubloŭ. Aŭtobus da Vilni — 710 rubloŭ na traich.

«Dabiraŭsia da Vilni 45 hadzin»

Alaksiej pavinien byŭ ź Biełarusi patrapić u Vilniu 27 kastryčnika — u dzień naradžeńnia žonki. I praz dva dni tam ža, u Vilni, vyjści na pracu. Ab admienie aŭtobusa jon daviedaŭsia tolki na vakzale. Hrošy za bilet viarnuli praź dzień — usiu sumu.

Mužčyna pryniaŭ rašeńnie jechać praz Varšavu ŭ aŭtorak. Kvitki Minsk — Varšava i Varšava — Vilnia vyjšli tolki na 20 rubloŭ daražej, čym na pramy rejs ź Biełarusi ŭ Litvu. Praŭda, u darozie Alaksieju pryjšłosia pravieści 45 hadzin. Zamiest viečara paniadziełka da Vilni jon dabraŭsia tolki ŭ čaćvier dniom.

— Na miažy z Polščaj za nami źbirałasia dzikaja čarha z aŭtobusaŭ. Pierad nami było 10—15, a za nami ŭžo 60.

Kavałačak torcika z dnia naradžeńnia mnie ŭsio-taki pakinuli, na pracu pajdu siońnia — atrymaŭsia adzin dzień prahułu. Choć ja byŭ upeŭnieny, što vyjazdžaju ź vialikim zapasam, — padzialiŭsia surazmoŭca.

«Zamianili bilety na novyja — heta kaštavała 100 jeŭra»

U nastupnaha hieroja prablemy ŭźnikli pa darozie dadomu. Prylacieć u Vilniu ź Vieny jon pavinien byŭ 2 listapada. Ale terminova pamianiaŭ płany.

— Rejs u nas byŭ Ryanair, tamu na viartańnie raźličvać nie prychodziłasia. Atrymałasia tolki zamianić biahučyja bilety na novyja ź Vieny ŭ Varšavu, a nie ŭ Vilniu. Zamiena kaštavała 100 jeŭra na dvaich. Z-za źmieny rejsa płan dadatkovyja paŭdnia pahulać pa Vienie taksama nakryŭsia. Vylatajem rana ranicaj.

Što tyčycca biletaŭ na aŭtobus, to aformiŭ viartańnie — za dva bilety płaciŭ 500 rubloŭ. Pakul vyrašaŭ ź biletami z Varšavy, pryjšłosia dva razy mianiać čas — vykuplali bilety, jakija ja razhladaŭ. Ale ŭčora ŭviečary na toj rejs, što my kupili, byŭ paŭpusty aŭtobus. Darečy, bilety kaštujuć 260 rubloŭ na dvaich zamiest 500. Tamu častkova pierakryvaju vydatki na zamienu avijabiletaŭ.

Tolki prablema, što daroha zojmie mocna bolš času. Moža, pašancuje, ale sumniavajusia. Pakul za situacyjaj na miažy nie sočym: jašče apošnija dni adpačynku — nie chaču zasmučacca.

«Mahčyma, pryjdziecca dva tydni biez spravy siadzieć u Jeŭropie»

U jašče adnaho čytača ź ciažkaściami sutyknuŭsia baćka, jaki zaraz pracuje ŭ Litvie. Vyjechać da zakryćcia miažy jon nie paśpieŭ. Pavinien byŭ dva tydni adpačynku pravieści doma.

— Jon na mašynie ź biełaruskimi numarami ŭ Litvie. U Łatviju dazvołu na vyjezd treba čakać miesiac, u palakaŭ miaža daloka i nieadekvatnyja čerhi, a «Bruzhi» niezrazumieła kali adkryjuć. A adpačynak doma ŭsiaho dva tydni.

Ciapier pryjdziecca na miesiac zastavacca ŭ Litvie i zamiest adpačynku iści pracavać, kali pracadaŭca zmoža znajści, jak jaho prystroić. Kali nie — 2 tydni biez spravy siadzieć u Jeŭropie.

— A viarnucca biez mašyny?

— Na bližejšyja dni niama biletaŭ. A jechać na tydzień dadomu jak byccam sensu niama, potym nazad treba ŭsio roŭna. Dy i ŭ cełym situacyja takaja, što mašyna pryjazdžaje nabitaja jaho rečami dla pracy, praduktami, tavarami i padarunkami. Adzin asabisty chaładzilnik miesca zajmaje, jak bahaž u aŭtobusie.

U vypadku ź inšaj našaj čytačkaj z prablemami sutyknulisia, naadvarot, jaje dzieci.

— U nas dva prafiesijnyja spartsmieny pa vialikim tenisie. Adnamu — 15 hadoŭ, inšamu — 17. Starejšy pavinien byŭ vylecieć na turniry ŭ Šarm-el-Šejch 29 kastryčnika a 3 ranicy. U pieršy raz adzin lacić na darosły turnir. Bilet źnik, heta byŭ čartar. Hrošy nie viarnuli. Pryjšłosia brać chutka bilet na aŭtobus u Varšavu. Dabiraŭsia amal sutki, budzie vylatać adtul siońnia. Jon pierajšoŭ z 44‑ha aŭtobusa ŭ druhi. Paprasiŭsia, skazaŭ, što jedzie na turnir.

Małodšy zaraz hulaje ŭ Jeŭropie. Try bilety (dla treniera, mamy i samoha spartsmiena) na 7 listapada taksama ŭ Vilniu kaštavali prystojna. I jany prapadajuć, tam taksama čartar. Budziem šukać inšyja vychady, jak patrapić u svaju krainu.

«Straty skłali ŭžo 650 jeŭra»

Andrej viartaŭsia z Valensii ŭ Vilniu praź Miłan. Pra zakryćcio miažy daviedaŭsia ŭžo ŭ Miłanie. U Vilni ŭ jaho byŭ zabraniravany hatel, apłačany da jaho samalot i aŭtobus da Minska. Ale mužčyna vyrašyŭ tudy ŭsio-taki nie lacieć, pakolki bilety ź Vilni ŭ Polšču kaštavali 450 jeŭra, a na aŭtobusie jon jechać nie chacieŭ.

— Hrošy za dva dni hatela atrymałasia viarnuć, za aŭtobus pakul čakaju, a samalot Miłan — Vilnia zhareŭ. Vyrašyŭ lacieć ź Miłana ŭ Varšavu, kupiŭ novy bilet pa kaśmičnaj canie. Učora pračakaŭ samalot da Varšavy 9 hadzin u aeraporcie, ale dabraŭsia. Chutka ŭ mianie ŭžo aŭtobus da Minska.

Čytaju ŭsie naviny i čaciki pa miažy. Ale tudy strašna zahladvać. Ludzi pišuć pra čarhu na miažy na sutki i bolš. Sumna, viadoma, što daroha Vilnia — Minsk — 5—6 hadzin, a tut ja budu stajać hadzin 15—20 jak minimum.

U vyniku na dadzieny momant straty skłali kala 650 jeŭra.

«U ciapierašniaj situacyi treba zakładvać tydzień zapasu da vyletu»

Volha płanavała adśviatkavać svoj dzień naradžeńnia ŭ Vilni razam ź siabrami, jakija tam žyvuć. Bilet ź Minska ŭ Litvu ŭ jaje byŭ na 30 kastryčnika. A ŭžo 2 listapada na ciahniku jana pavinna była vyjechać u Varšavu, kab adtul 5 listapada palacieć u adpačynak na Teneryfe.

— Navinu ab zakryćci miažy ŭbačyła ŭ paniadziełak i adrazu ž kupiła bilet u Varšavu na 31 kastryčnika. Dalej vyrašyła panazirać, čym skončycca (śmiajecca). Učora ŭvieś dzień pisała na poštu Eurolines z nahody admieny rejsa i viartańnia koštu bileta — cišynia. Maja siabroŭka ŭ Vilni sprabavała datelefanavacca ŭ ofis Eurolines — cišynia. Nijakich apaviaščeńniaŭ ab admienie rejsa ni ŭ poštu, ni smskoj nie pryjšło.

Paśla źjaŭleńnia naviny ab dakładnym zakryćci miežaŭ zdała bilet na ciahnik Vilnia — Varšava, z 25 jeŭra koštu bileta ŭtrymali 2,5 jeŭra kamisii za viartańnie. Praŭda, hrošy na kartu da hetaha času nie viarnulisia. Ciapier zadača viarnuć 55 jeŭra za bilet Minsk — Vilnia. Nu, i źjechać u Varšavu, kab paśpieć na samalot.

Z usioj hetaj historyi vysnova adna: u ciapierašniaj situacyi treba zaŭsiody zakładvać tydzień zapasu pa časie da vyletu i hrošaj na ŭsie karty, jakija jość.

• 1
• 0
• 1
• 2
• 0
• 0
• 3
• 0