Biełaruski palitołah syhraje bandyta ŭ polskim kryminalnym sieryjale

Ale niadaŭna biełarusa zaćvierdzili na epizadyčnuju rolu ŭ papularnym polskim sieryjale. I hrać jon budzie bandyta z SND, jaki razmaŭlaje pa-polsku z akcentam. Most pahavaryŭ ź Siarhiejem pra šlach da zdymačnaj placoŭki i ŭvasableńnie daŭniaj mary.

Siarhiej Marcaleŭ — biełaruski aktyvist, palitołah, były palitviazień. Na prezidenckich vybarach 2010 hoda jon byŭ kiraŭnikom štaba Mikałaja Statkieviča. U 2020 hodzie pracavaŭ z pradprymalnikam i hramadskim dziejačam Mikałajem Aŭtuchovičam, jaki paźniej pa palityčnych artykułach (u tym liku «teraryzm» i «zdrada dziaržavie») atrymaŭ 25 hadoŭ pazbaŭleńnia voli. Marcaleŭ zajmaŭsia infarmacyjnym supravadžeńniem, vioŭ Telegram-kanał i sacsietki.

Na «Biełaruśfilmie» zarablaŭ na abiedy

Upieršyniu na zdymačnuju placoŭku Siarhiej trapiŭ u Biełarusi. Paśla prezidenckich vybaraŭ 2010 hoda i nastupnych pratestaŭ na płoščy Niezaležnaści ŭ Minsku jaho, tady kiraŭnika štaba Mikałaja Statkieviča, aryštavali i asudzili ŭmoŭna na dva hady za «parušeńnie hramadskaha paradku».

— Byŭ pad pastajannym nahladam milicyi. Mianie nikudy nie brali na pracu — ni hruzčykam, ni kudy-niebudź jašče. Ja pisaŭ materyjały dla ŚMI, ale ŭładkavacca aficyjna było niemahčyma. Adzinaje miesca, dzie ŭdavałasia zarabić chacia b na abied, — heta praca statystam na «Biełaruśfilmie». Płacili vielmi drenna, ale navat hetyja minimalnyja hrošy dla mianie byli vyratavańniem, — raspaviadaje jon.

«Hety bahiemny flor»

Paśla pierajezdu ŭ Polšču ŭ 2021 hodzie Siarhiej znoŭ akunuŭsia ŭ kino, ale ŭžo ź inšym nastrojem.

— Spačatku heta było žadańnie viarnucca ŭ hetuju śfieru, hety bahiemny flor. Režysior i zdymačnaja hrupa stvarajuć zusim niepieradavalnuju atmaśfieru. Heta bolš, čym hrošy. Statysty atrymlivajuć paraŭnalna nievialikuju apłatu, ale sama kinošnaja mituśnia, tvorčy praces i znajomyja tvary stvarajuć nastroj. Asabliva pryjemna bačyć akcioraŭ i režysioraŭ, jakija źviartajucca z pavahaj, jak z roŭnymi, dziakujuć za ŭdzieł. I choć za dzień pracy na budoŭli možna zarabić bolš, u masoŭcy ty atrymlivaješ maralnaje zadavalnieńnie ad taho, što robiš, — kaža Siarhiej.

U krasaviku hetaha hoda jon zvolniŭsia z pastajannaj pracy, i kino stała dla jaho asnoŭnym sposabam padtrymlivać ścipły biudžet. Za hety čas jon užo paŭdzielničaŭ u niekalkich dziasiatkach sieryjałaŭ, rekłamnych rolikaŭ i filmaŭ u jakaści statysta.

Siarhiej kaža, što taki sposab zarobku pryciahvaje mnohich, chto apynuŭsia ŭ Polščy nie pa svajoj voli — ukraincaŭ i biełarusaŭ. Na placoŭcy jon sustrakaŭ žurnalistaŭ, aktyvistaŭ i navat viadomaha biełaruskaha barda.

Za epizadyčnyja roli płaciać u 4—7 razoŭ bolš, čym statystam

Adbor u masoŭku prachodzić praz ahienctva. Režysior adpraŭlaje tudy zajaŭku, i kali kandydat padychodzić pa ŭzroście i źniešnaści, ahienctva adpraŭlaje jaho fatahrafii pamočniku režysiora. Pavodle statystyki Siarhieja, u siarednim ź dzieviaci zajavak piać-šeść atrymlivajuć adabreńnie.

Staŭki na ŭdzieł u masoŭcy vahajucca ad 100 da 150 złotych ( 27‑40 dalaraŭ) za dzień, načnyja zdymki apłačvajucca vyšej — kala 200 złotych (55 dalaraŭ).

— Kali prapanujuć bolšuju staŭku, konkurs vyšejšy. Kali płaciać kala 100 złotych za dzień, konkursu moža i nie być — moža być niedabor.

Hanarary za epizadyčnyja roli, pavodle słoŭ Siarhieja, u 4—7 razoŭ bolšyja, čym u statystaŭ. Staŭka moža zaležać ad abjomu tekstu.

— Kali syhraješ piać epizodaŭ, ciabie ŭnosiać u Dziaržaŭny rejestr kinaakcioraŭ Polščy. Za hałoŭnuju rolu ŭ kamiercyjnaj rekłamie možna atrymać dziasiatki tysiač złotych — heta, skažam tak, samy vysoki bonus, jaki moža zarabić pačatkoviec u kinaindustryi, — tłumačyć Siarhiej.

Pa jaho słovach, možna hadami chadzić u masoŭku, kab prapanavali niešta bolš surjoznaje. Tamu važna naviedvać kastynhi i prapanoŭvać svaje pasłuhi ahienctvam. Jany ŭnosiać akcioraŭ u bazu dadzienych — i ŭ luby momant mohuć adhuknucca. Heta šaniec trapić u rekłamu abo epizod — tam nie tolki hanarar vyšejšy, ale i proźvišča akciora źjaŭlajecca ŭ tytrach.

Uspomniŭ nulavyja

Niadaŭna Siarhieju prapanavali rolu ŭ papularnym polskim kryminalnym sieryjale na adnym z kanałaŭ. Raskryvać padrabiaznaści jon nie moža pavodle ŭmovaŭ damovy, kaža tolki, što heta epizadyčnaja rola ruskamoŭnaha bandyta z adnoj z krain SND.

— Mnie pierazvaniŭ asistent režysiora i paviedamiŭ, što jany zacikaŭlenyja ŭva mnie. Kab prajści dalej, treba było vyvučyć na pamiać scenu i zapisać videa, dzie ja čytaju repliki svajho piersanaža, a niechta — repliki inšych, — raspaviadaje Siarhiej.

Kali biełarus kančatkova atrymaŭ paćviardžeńnie roli, uspomniŭ nulavyja hady i sieryjał, jaki hladzieŭ amal kožny dzień. Tady jaho pryciahvała mienavita rola bandyta — buntara, jaki supraćpastaŭlaje siabie hramadstvu, časam žorstkaha, časam vysakarodnaha, ale zaŭsiody charyzmatyčnaha. Ciapier akazałasia, što daŭniaja mara zbyłasia mienavita tak, jak Siarhiej sabie ŭjaŭlaŭ.

• 1
• 0
• 0
• 0
• 0
• 0
• 0
• 0