U Jehipcie paśla dvaccaci hadoŭ budaŭnictva adkryli najbujniejšy muziej śvietu
1 listapada ŭ Kairy pačynaje paŭnavartasnuju pracu Vialiki Jehipiecki muziej (Grand Egyptian Museum) — maštabny prajekt koštam kala adnaho miljarda dalaraŭ, pryśviečany vyklučna historyi jehipieckaj cyvilizacyi. Budynak mieścicca ŭsiaho za 1,5 km ad piramid Hizy i zajmaje kala paŭmiljona kvadratnych mietraŭ, paviedamlaje The Guardian.
Ideja stvareńnia muzieja źjaviłasia jašče ŭ 1992 hodzie, ale budaŭnictva pačałosia tolki ŭ 2005‑m i nieadnarazova spyniałasia.
U ekspazicyi — bolš za 50 tysiač artefaktaŭ: ad dahistaryčnych časoŭ da epochi Ryma. Siarod ich — 83‑tonnaja statuja Ramzesa II i 4500‑hadovaja «soniečnaja łodka» faraona Chufu, budaŭnika Vialikaj piramidy.
Muziejny kompleks uklučaje vialikija vystavačnyja zały, dziciačy muziej, adukacyjnyja i kanfierenc-centry, kamiercyjnuju zonu i łabaratoryju dla restaŭracyi. Ekspazicyi raźmieščanyja pa epochach i tematyčnych raździełach, kab naviedvalniki mahli pastupova zahłyblacca ŭ historyju Jehipta.
Častku kalekcyi pieravieźli sa staroha muzieja na płoščy Tachryr, a astatnija pradmiety — vynik niadaŭnich archieałahičnych znachodak, u tym liku ź niekropala Sakara.
Dyrektar muzieja Achmied Haniejm adznačaje, što heta nie prosta miesca zachavańnia staražytnaściaŭ, a sučasnaja prastora, dzie historyja spałučajecca z technałohijami: naviedvalnikaŭ čakajuć multymiedyjnyja instalacyi i elemienty dapoŭnienaj realnaści.
Prajekt staŭ častkaj vialikaj dziaržaŭnaj prahramy raźvićcia infrastruktury — pobač budujecca novaja linija mietro i pracuje aeraport, adkryty ŭ 2020 hodzie.
Adkryćcio ŭstanovy niekalki razoŭ pieranosili, u tym liku z-za napružanaj situacyi na Blizkim Uschodzie. 16 kastryčnika Vialiki Jehipiecki muziej častkova adkryŭ asnoŭnyja halerei dla testavaha zapusku, prymajučy da čatyroch tysiač naviedvalnikaŭ u dzień.
Dla Jehipta muziej maje nie tolki kulturnaje, ale i ekanamičnaje značeńnie: ułady raźličvajuć pryciahnuć miljony turystaŭ. U 2024 hodzie krainu naviedała 15,7 miljona čałaviek, a da 2032‑ha płanujecca padvoić hety pakazčyk. Pavodle acenak, muziej zmoža prymać da 20 tysiač naviedvalnikaŭ štodnia. Ministr turyzmu nazvaŭ jaho adkryćcio «padarunkam Jehipta ŭsiamu śvietu».
Ciapier čytajuć
Zahinuŭ biełaruski dobraachvotnik Alaksiej Łazaraŭ11
Kamientary