ZŠA nie buduć błakavać pastaŭki rasijskaj nafty i hazu ŭ Vienhryju, zajaviŭ Orban paśla sustrečy z Trampam

U piatnicu Tramp pravioŭ pieramovy z Orbanam, svaim hałoŭnym palityčnym sajuźnikam u Jeŭropie. Pierad abiedam z premjer-ministram Vienhryi jon paviedamiŭ, što jaho administracyja vyvučaje pytańnie ab kupli Budapieštam rasijskaj nafty i patencyjnych druhasnych sankcyjach za heta.

«My hladzim na hetaje pytańnie, bo jamu [Orbanu] vielmi składana atrymlivać naftu i haz ź inšych miescaŭ. Jak vy viedajecie, u ich niama hetaj pieravahi ŭ vyhladzie najaŭnaści mora», — skazaŭ Tramp, adkazvajučy na pytańnie žurnalista.

Orban dadaŭ, što jon maje namier rastłumačyć Trampu mahčymyja nastupstvy admovy ad rasijskaj nafty dla Vienhryi — hetyja nastupstvy, jak jon śćviardžaje, buduć «razburalnymi».

Na pres-kanfierencyi dla vienhierskich ŚMI paśla pieramoŭ Orban zajaviŭ, što jamu ŭdałosia pierakanać Trampa nie pieraškadžać pastaŭkam rasijskich enierhanośbitaŭ u Vienhryju.

«My atrymali poŭnyja vyklučeńni z sankcyj dla naftapravodaŭ «Družba» i «Turecki patok»», — cytuje Orbana vydańnie Telex. «My pahadzilisia, prezident vyrašyŭ i skazaŭ, što sankcyi nie buduć prymianiacca da hetych dvuch naftapravodaŭ», — taksama adznačyŭ vienhierski premjer.

Padčas adkrytaj častki pieramoŭ z Orbanam Tramp nie paćviardžaŭ, što jaho administracyja pahadziłasia nie prymianiać druhasnyja sankcyi suprać pastavak rasijskich enierhanośbitaŭ.

U 2020 hodzie naftapravod «Družba» zabiaśpiečvaŭ 64% patreby Vienhryi ŭ nafcie; pa im syravina pastaŭlajecca z Rasii praź Biełaruś i Ukrainu. Da 2024 hoda heta ličba dasiahnuła 80%, što składaje 5 młn ton u hod.

Vienhryja atrymlivaje rasijski haz pa hazapravodzie «Turecki patok», jaki idzie ŭ Turcyju praz Čornaje mora.

Orbanu zadali pytańnie, ci nie moža Vienhryja zamianić rasijskuju naftu na syravinu z alternatyŭnaha naftapravoda (jon prachodzić ad Adryjatyčnaha mora praz Charvatyju).

Orban adkazaŭ, što mahutnaść hetaha naftapravoda niedastatkovaja, kab zamianić rasijskija pastaŭki, i jon maje patrebu ŭ madernizacyi, mahčymaść jakoj Vienhryja zaraz abmiarkoŭvaje z Charvatyjaj.

Miž tym, kampanija MoL, jakaja vałodaje adzinym vienhierskim NPZ, u piatnicu (za niekalki hadzin da sustrečy Orbana i Trampa) mimachodź zaŭvažyła ŭ svajoj spravazdačy, što całkam moža zamianić rasijskuju naftu pastaŭkami pa charvackim trubapravodzie.

«Kali pastaŭki syroj nafty pa naftapravodzie «Družba» značna skarociacca, MoL moža pavialičyć vykarystańnie adryjatyčnaha naftapravoda i [takim čynam] atrymlivać kala 80% patrebaŭ svaich NPZ u hłybini kantynienta, choć heta i budzie supravadžacca bolš vysokimi techničnymi i łahistyčnymi vydatkami», — cytuje spravazdaču kampanii ahienctva Bloomberg.

• 0
• 1
• 1
• 1
• 0
• 0
• 3
• 0