Nakolki zakrytaja miaža ź Litvoj upłyvaje na dastaŭku tavaraŭ i kolki litoŭskich fur i pryčepaŭ nasamreč zachrasła ŭ Biełarusi?
Pavodle infarmacyi ź biełaruskaha boku, u Biełarusi ciapier znachodzicca kala 1100 fur ź litoŭskaj rehistracyjaj. Litoŭskaja asacyjacyja aŭtapieravozčykaŭ Linava ž kaža, što, aproč ciahačoŭ, zastalisia jašče kala 3000 paŭpryčepaŭ. «Naša Niva» raźbirałasia, jak tak vyjšła i nakolki heta moža paŭpłyvać na dastaŭku hruzaŭ u Biełaruś.
Litva pryniała rašeńnie zakryć naziemnuju miažu ź Biełaruśsiu da 1 śniežnia ŭ adkaz na toje, što ź Biełarusi praciahvali lacieć mieteazondy z kantrabandnymi cyharetami. U adkaz na zakryćcio miažy biełaruski bok zabaraniŭ hruzavikam, pryčepam i paŭpryčepam ź litoŭskaj rehistracyjaj zajazdžać u Biełaruś i viartacca nazad praź biełaruska-polskuju i biełaruska-łatvijskuju miažu.
Z 4 listapada taki transpart moža pierasiakać miažu ź Biełaruśsiu tolki praz punkty propusku na miažy ź Litvoj.
Ničoha pryncypova novaha nie adbyłosia
Takija praviły — heta nie noŭ-chau, jakoje Biełaruś admysłova prydumała dla Litvy. Dla polskich pieravozčykaŭ takija abmiežavańni isnujuć jašče z 18 lutaha 2023 hoda.
Na pieryjad zakryćcia miažy Polščaj u vieraśni hetaha hoda 1453 hruzaviki z polskaj rehistracyjaj nie mahli pakinuć terytoryju Biełarusi da adnaŭleńnia pracy pierachodaŭ i zastavalisia ŭ zakładnikach na płatnych parkoŭkach TŁC.
Za niekatorymi vyklučeńniami (aŭtavozy, niehabarytnyja pieravozki) polskija pieravozčyki ŭžo nie pieršy hod mieli mahčymaść zajazdžać u Biełaruś i viartacca nazad tolki praz punkty propusku na biełaruska-polskaj miažy.
Aproč taho, pryčepy i paŭpryčepy z polskaj rehistracyjaj nielha vykarystoŭvać dla pieračepak — tolki dla pierahruzki.
Atrymlivajecca, što da niadaŭniaha času litoŭskija transpartniki mieli značna bolš spryjalnyja ŭmovy dla pracy na biełaruskim kirunku, čym ich polskija kalehi.
Važny niuans z pryčepami
Litoŭskija fury zajazdžali i vyjazdžali ź Biełarusi praź luby zručny dla ich punkt propusku, a litoŭskija pryčepy i paŭpryčepy masava vykarystoŭvali, u tym liku, polskija pieravozčyki.
Biełaruski łahist kaža, što, pavodle jaho nazirańniaŭ, kala pałovy polskich fur jeździli ŭ Biełaruś ź litoŭskimi pryčepami.
«Palaki dziela hetaha navat adkryvali firmy ŭ Litvie, kab jeździć u Biełaruś ź litoŭskimi paŭpryčepami, bo na ich nie było takich abmiežavańniaŭ, jak na polskija.
Polski abo litoŭski pieravozčyk pryjazdžaŭ u Biełaruś ź litoŭskim paŭpryčepam, jaki potym možna było pieračaplać da biełaruskaha ciahača i, ničoha nie pierahružajučy, jechać ź im choć u Maskvu», — tłumačyć śpiecyjalist.
Na vyjezd ź Biełarusi dla litoŭskich pryčepaŭ da niadaŭniaha času taksama nie było nijakich abmiežavańniaŭ.
Hetaja akaličnaść tłumačyć, čamu ŭ Litoŭskaj asacyjacyi aŭtapieravozčykaŭ Linava kažuć, što, aproč bolš jak tysiačy fur, u Biełarusi zastalisia bolš jak try tysiačy litoŭskich pryčepaŭ.
Vyvaz pryčepaŭ jak asobnaja prablema
Pavodle źviestak «Našaj Nivy», vialikuju kolkaść litoŭskich pryčepaŭ z Bresta pieranakiroŭvali ŭ TŁC «Bierastavica» jašče ŭ pieršyja dni dziejańnia novych abmiežavańniaŭ.
Za zachoŭvańnie pryčepa na TŁC taksama treba płacić. Infarmacyi pra niejkija śpiecyjalnyja taryfy pa 120 jeŭra za sutki, jak u vypadku z Katłoŭkaj, nie było, ale i zhodna sa standartnym prajsam sutki prastoju tam nie tannyja.
Za pieršyja dvoje sutak — 99 rubloŭ, dalej — pa 153 rubli (kala 45 jeŭra) u sutki.
Pavodle słoŭ biełaruskaha dalnabojščyka, praz hetyja abmiežavańni mnohija polskija ciahačy viarnulisia ŭ Polšču nie prosta pustymi, a biez paŭpryčepaŭ.
Raniej kiroŭca, jaki pierasiakaŭ biełaruska-polskuju miažu ŭ pieršyja dni dziejańnia abmiežavańniaŭ, kazaŭ «Našaj Nivie», što na polskim baku ŭsie pryhraničnyja parkoŭki taksama byli zapoŭnienyja paŭpryčepami ź litoŭskimi numarami.
«Ciapier palaki źmianiajuć rehistracyju hetych pryčepaŭ na polskuju abo inšuju jeŭrapiejskuju, kab ich možna było vykarystoŭvać dla pieračepki biez abmiežavańniaŭ, bo polskaja rehistracyja taksama nie dazvalaje pieračaplać ich», — tłumačyć dalnabojščyk.
Na dumku surazmoŭcy, mienavita evakuacyja litoŭskich paŭpryčepaŭ moža stać samym balučym pytańniem dla ich ułaśnikaŭ, siarod jakich mohuć być nie tolki litoŭskija biznesoŭcy, ale i polskija dy biełaruskija.
Hetaja situacyja sapraŭdy vielmi składanaja, bo, pavodle novych praviłaŭ, vyvieźci ich ź Biełarusi možna budzie tolki praz punkty propusku na miažy ź Litvoj. Kali jany adkryjucca — nieviadoma. Ale navat u vypadku adnaŭleńnia pracy praces vyvazu niekalkich tysiač litoŭskich pryčepaŭ praz «Kamienny Łoh» i «Bieniakoni» moža raściahnucca na vielmi praciahły pieryjad.
Jašče da abvastreńnia adnosin pamiž Biełaruśsiu i Litvoj praź mietearazondy z kantrabandnymi cyharetami praz hetyja punkty za sutki ŭ bok Litvy vyjazdžała ŭ siarednim pa 80—130 fur (praz dva punkty propusku razam).
Što ŭsio heta aznačaje dla Biełarusi?
Łahist, ź jakim pahutaryła «Naša Niva», kaža, što ciapierašniaje zakryćcio miažy Litvoj adčuvajecca nie tak baluča, jak heta było ŭ vypadku z Polščaj.
«Kali tady (padčas zakryćcia miažy Polščaj — NN) ceny na pieravozki ŭźlacieli da kaśmičnych maštabaŭ, to ciapier takoha mocnaha skačka stavak i zapavolvańnia dastavak nie nazirajecca.
Pieravozčyki pastupova vyrašajuć pytańni z pryčepami, i dastaŭka hruzaŭ idzie bolš-mienš narmalna, bo Łatvija i Polšča pracujuć biez prablem», — kaža łahist.
Usia nadzieja na Polšču
Pavodle słoŭ śpiecyjalista, ciapier pieravozčykaŭ bolš cikavić, jak budzie raźvivacca situacyja z Polščaj, a nie ź Litvoj.
«Kali palaki sapraŭdy adkryjuć «Bruzhi» i «Bierastavicu», to heta chutka kampiensuje zakryćcio miažy ź Litvoj. Kaniečnie, treba budzie pahladzieć, jak chutka buduć pracavać u «Bierastavicy», bo «Bruzhi» spačatku abiacali adkryć tolki dla pasažyrskaha ruchu».
Śpiecyjalist ličyć, što pry narmalnaj pracy «Bierastavicy» adzin hety punkt propusku na miažy z Polščaj moža prapuskać za sutki bolš transpartu, čym «Bieniakoni» i «Kamienny Łoh» razam uziatyja.
«Pa vialikim rachunku, u takim vypadku (kali Polšča adkryje dadatkovyja punkty propusku — NN) dla nas uvohule nie budzie mieć vialikaha značeńnia, budzie miaža ź Litvoj adkrytaja ci nie», — ličyć śpiecyjalist.
Kali Polšča adkryje miažu ź Biełaruśsiu?
Dakładnaha adkazu na hetaje pytańnie niama. Pieršapačatkova płanavałasia, što punkty propusku «Kuźnica — Bruzhi» i «Babroŭniki — Bierastavica» adnoviać pracu z 1 listapada 2025 hoda, ale hetaha nie adbyłosia — faktyčna pa prośbie litoŭskaha boku, jaki, naadvarot, u toj čas anansavaŭ zakryćcio miažy ź Biełaruśsiu. Tady Polšča pieraniesła adkryćcio na siaredzinu listapada.
Dniami ministr unutranych spraŭ Litvy Uładzisłaŭ Kandratovič zajaviŭ nastupnaje:
«Ja na minułym tydni razmaŭlaŭ ź ministram unutranych spraŭ Polščy. Jany płanavali adkryć hetyja punkty 1 listapada, ale z salidarnaści ź Litvoj hetaha nie zrabili. Ale, chutčej za ŭsio, heta adbudziecca paśla 15 listapada, paśla 20-ha. Dumaju, heta dakładna adbudziecca».
Adnak litoŭski ministr padkreśliŭ, što krainam nieabchodna sumiesna adreahavać na situacyju, jakaja skłałasia paśla zakryćcia miežaŭ ź Biełaruśsiu.
Kamientary
Dalnabojami jak raz pracujuć musary byłyja.
Dadzim jašče mierkavańnie litoŭskich łahistaŭ, jakija skardziacca, što zamiest ich užo pracujuć palaki.