Kiraŭnik Pientahona abviaściŭ pra pačatak vajennaj apieracyi suprać narkakartelaŭ u Zachodnim paŭšarji
Apieracyja atrymała nazvu Southern Spear («Paŭdniovaje kapjo»).
Kiraŭnik Pientahona Pit Chiehset abviaściŭ ab pačatku vajennaj apieracyi suprać narkakartelaŭ u Zachodnim paŭšarji.
Apieracyja atrymała nazvu Southern Spear («Paŭdniovaje kapjo»). Armija ZŠA maje namier likvidavać «narkaterarystaŭ» i zabiaśpiečyć biaśpieku krainy ad narkotykaŭ.
Raniej pisałasia pra mahčymaść vajskovaj apieracyi suprać Vieniesueły ŭ ramkach baraćby z narkakartelami.
Ułady ZŠA niekalki dzion tamu nakiravali ŭ rajon Vieniesueły značnuju vajennuju siłu: 10 źniščalnikaŭ F-35 byli dysłakavanyja ŭ susiedniaj Puerta-Ryka, akramia taho, u rehijonie ŭžo znachodziacca atamnaja padvodnaja łodka i vosiem vajennych karabloŭ (try eskadranyja minanoscy, krejsier, karabiel bierahavoj achovy i try desantnyja karabli). Byli źniščanyja ŭ Karybskim mory niekalki sudnaŭ, što, jak miarkujecca, pieravozili narkotyki.
U pačatku listapada, adkazvajučy ŭ intervju amierykanskaha partniora Bi-bi-si, telekampanii CBS, na pytańnie ab abvinavačvańniach u padrychtoŭcy ŭdaraŭ pa Vieniesuele, Donald Tramp adkazaŭ: «Ja nie schilny kazać, što ja b heta zrabiŭ. Ja nie źbirajusia kazać vam, što ja źbirajusia zrabić ź Vieniesuełaj, niezaležna ad taho źbirajusia ja heta zrabić ci nie».
U tym ža intervju CBS Tramp paŭtaryŭ svajo śćviardžeńnie, što «kožnaje z hetych źniščanych sudnaŭ zabivaje narkotykami 25 tysiač čałaviek i źniščaje siemji pa ŭsioj našaj krainie».
Kamientary