19 listapada ŭ centralnaj Rasii ukrainskija drony atakavali Razanskuju (Novamičurynskuju) DRES — druhuju pa mahutnaści ŭ centralnym rehijonie Rasii.
Pavodle najaŭnaj infarmacyi, byli całkam źniščanyja 4‑y i 5‑y enierhietyčnyja błoki stancyi. Usiaho na Razanskaj DRES siem błokaŭ z turbaahrehatami typu K— 300‑240 i K-800-240-3. Ataka adbyłasia ŭ noč z aŭtorka na sieradu, śviedki zafiksavali vialiki słup ahniu i dymu.
Hubiernatar Razanskaj vobłaści Pavieł Małkoŭ paćvierdziŭ fakt ataki. Pavodle jaho, rasijskija PVA pierachapili častku dronaŭ, i ich abłomki ŭpali na terytoryju «adnaho z pradpryjemstvaŭ», vyklikaŭšy pažar. Ludzi nie paciarpieli, materyjalnyja straty aceńvajucca ekśpiertami.
Razanskaja DRES raźmieščanaja ŭ horadzie Novamičurynsk, jana maje ŭstanoŭlenuju mahutnaść 3130 MVt i ciepłavuju mahutnaść 212,5 Hkał/hadzinu. Stancyja ŭvachodzić u skład abjadnanaj enierhasistemy centru Rasii i zabiaśpiečvaje značnuju častku elektrasiłkavańnia centralnych rehijonaŭ, sastupajučy pa mahutnaści tolki Kastramskoj DRES.
Raniej, 6 listapada, pad udar dronaŭ Ukrainy trapiła taja samaja Kastramskaja DRES, a 15 listapada — Razanski NPZ «Rasnafty», jaki zabiaśpiečvaje palivam maskoŭski rehijon. U vyniku apošniaj ataki praca zavoda była prypyniena jak minimum da kanca miesiaca.
Kamientary