Pamior dramaturh i režysior Tom Stopard. Jon byŭ siabram biełarusaŭ
Pamior brytanski dramaturh, režysior i scenaryst Tom Stopard. Jamu było 88 hadoŭ, paviedamlaje The Guardian.
Tom Stopard naradziŭsia 3 lipienia 1937 hoda pad imieniem Tomaš Štraŭśler u jaŭrejskaj siamji ŭ Čechasłavakii. U 1939 hodzie jahonyja baćki ŭciakli ad nacystaŭ u Sinhapur, a adtul — u Indyju, kab paźbiehnuć japonskaj akupacyi. Paśla vajny budučy piśmieńnik apynuŭsia ŭ Vialikabrytanii. Pra svajo pachodžańnie jon daviedaŭsia ŭžo ŭ darosłym uzroście.
Stopard ličycca adnym z najbolš zapatrabavanych dramaturhaŭ druhoj pałovy XX stahodździa. Jon pisaŭ dla kino, radyjo, teatra i telebačańnia, byŭ dramaturham Karaleŭskaha nacyjanalnaha teatra Vialikabrytanii.
Siarod jaho najbolš viadomych pjes — «Rozienkranc i Hildienstern miortvyja», «Travieści», «Uvachodzić svabodny čałaviek», «Arkadyja», «Bierah Utopii», «Rok-n-roł».
Jon taksama napisaŭ scenaryi da filmaŭ: «Brazilija» (režysior Tery Hilijam), «Ruski dom» (Fred Skiepisi), «Zakachany Šekśpir» (Džon Meden), «Hanna Karenina» (Džo Rajt). Taksama jon dapamahaŭ u dapracoŭcy scenaryjaŭ «Indyjany Džonsa i apošniaha kryžovaha pachoda», «Pomsty sitchaŭ» i «Śpisu Šyndlera».
U 1990 hodzie Stopard ekranizavaŭ svaju pjesu «Rozienkranc i Hildienstern miortvyja».
Akramia inšaha, Tom Stopard byŭ apiekunom Biełaruskaha «Svabodnaha teatra». U 2005 hodzie pa asabistym zaprašeńni kiraŭnikoŭ prajekta Natalli Kalady i Mikałaja Chalezina dramaturh pryjazdžaŭ u Biełaruś.
Pa vynikach toj pajezdki jon kazaŭ:
«Maje ŭražańni ad vizitu ŭ Biełaruś adroźnivajucca ad tych uražańniaŭ, jakija ja atrymaŭ u Savieckim Sajuzie i Čechasłavakii: tut strach schavany ŭhłyb, i, hulajučy pa vulicach Miensku, časam niemahčyma zrazumieć, što znachodzišsia ŭ krainie z tatalitarnaj sistemaj, jakaja hłyboka ŭkaraniłasia».
U 2023 hodzie ser Tom Stopard vykazaŭ padtrymku biełarusam i biełaruskim palitviaźniam.
Ciapier čytajuć
Pastupova vyjšli na volu aryštavanyja pa «Spravie kniharoŭ». Akramia adnaho8
Pastupova vyjšli na volu aryštavanyja pa «Spravie kniharoŭ». Akramia adnaho
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary