Pieradkaladnaja bitva handlovych centraŭ: Dana Mall źviała «žyvuju» Śniežnuju karalevu ŭ Galleria Minsk
Minskija handlovyja centry tradycyjna spaborničajuć u maštabnaści navahodniaha afarmleńnia. Ale sioleta kankurencyja vyjšła za miežy prostaha dekoru. Pakul adzin handlovy centr nieaściarožna vyhnaŭ žyvy simvał svajho śviata, druhi skarystaŭsia momantam i atrymaŭ čarhovuju porcyju narodnaj lubovi.
Što adbyłosia ŭ Galleria Minsk?
U hetym siezonie Galleria Minsk zrabiła staŭku na kłasiku i maštab. Uvieś atryum zaniała hihanckaja instalacyja: 23‑mietrovaja Śniežnaja karaleva na ledzianym tronie, maleńki Kaj, jaki składaje słova «Viečnaść», i advažnaja Hierda, jakaja lacić na aleni jamu na dapamohu. Vobrazy byli natchnionyja kłasičnym savieckim multfilmam 1957 hoda, jaki ličycca adnoj z najlepšych ekranizacyj tvora Chansa Kryścijana Andersana.
Błohierka Naściuška (anastasia_kerus) vyrašyła padtrymać tematyku i zrabiła kaspłej na Śniežnuju karalevu. U kazačnym vobrazie, jaki vielmi dakładna paŭtaraje vyhlad vielizarnaj skulptury ŭ handlovym centry, jana zavitała ŭ «Halereju», kab pazdymacca na fonie krynicy svajho natchnieńnia dla ŭłasnaha tyktoka.
Adnak achovie handlovaha centra inicyjatyva nie spadabałasia. Praz 30—40 chvilin supracoŭniki padyšli da błohierki i paprasili jaje pakinuć pamiaškańnie.
«Nam skazali: rabiaty, vychodźcie, vy źbirajecie natoŭp. Nielha źbirać natoŭp, tamu ŭsie, chto choča niejkaje takoje videa — źviartajemsia na infaliniju markietynhavaha ahienctva i tam atrymlivajem dazvoł», — raskazała ŭ svaim tyktoku Naściuška.
Paźniej dziaŭčyna vypuściła niekalki ŭdakładnieńniaŭ, padkreśliŭšy, što jaje nichto hruba nie vyhaniaŭ i skandału jana raździmać nie choča:
«Nas nastojliva paprasili syści praz skopišča ludziej. Nichto nie aburajecca i nie niehatyvić».
Błohierka patłumačyła, što spačatku achoŭnik dazvoliŭ zdymku, kali daviedaŭsia, što jana niekamiercyjnaja, ale paźniej padyšoŭ druhi supracoŭnik i zapatrabavaŭ uzhadnieńnia z adździełam markietynhu, supracoŭnikaŭ jakoha ŭžo nie było na miescy.
Niahledziačy na prymirenčy ton błohierki, u kamientarach ludzi byli aburanyja tym, što «Halereja» admoviłasia ad biaspłatnaj rekłamy i śviata dla dziaciej.
«Čamu vam nie prapanavali supracoŭnictva? Heta ž naadvarot kruta», — pišuć u kamientarach.
«Halereja vyhnała žyvuju kazku i abiasceniła siabie».
Chod kankurentaŭ
Hetaj situacyjaj imhnienna skarystaŭsia pramy kankurent — handlovy centr Dana Mall na Uschodzie. Hety handlovy centr sioleta abraŭ zusim inšuju stylistyku — biełaruski kaladny kirmaš ź Ziuziem, miechaničnymi lalkami ŭ narodnych strojach, butaforskaj nacyjanalnaj kuchniaj i batlejkaj. Ale znajšłosia miesca i dla vyhnanaj Śniežnaj karalevy.
Siońnia błohierka apublikavała videa z kaladnaha kirmaša ŭ Dana Mall z podpisam: «Siońnia pryjechali pahladzieć navahodniuju łakacyju ŭ Dana Mall. Dziakuj za ciopły pryjom!»
Aficyjny akaŭnt Dana Mall u TykToku nie prymusiŭ siabie čakać, napisaŭšy, što dziaŭčynu byli radyja bačyć u handlovym centry i šukali až z «čornaj piatnicy» — tym samym pastaviŭšy kropku ŭ hetaj markietynhavaj bitvie.
Atrymałasia iraničnaja situacyja: Śniežnaja karaleva, jakaja pavinna była panavać u ledzianym carstvie «Halerei», znajšła sabie miesca na ŭtulnym biełaruskim kirmašy ŭ kankurentaŭ.
«Naša Niva» — bastyjon biełaruščyny
PADTRYMAĆHladzicie, jak kazačna ŭpryhožyli da navahodnich śviat handlovy centr Galleria ŭ Minsku
Aleń na turbinie i Dzied Maroz u kupe ciahnika. Dzie ŭ Minsku samyja niezvyčajnyja navahodnija łakacyi ŠMAT FOTAŬ
Bondarava tvaram u tvar sutyknułasia z demanam u Dana Mall
U minskim Dana Mall adkryŭsia «Kaladny kirmaš» FOTY
Ciapier čytajuć
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach88
Kamientary