Za zabojstva čałavieka ŭ IČU Barysava aryštavali dvuch zekaŭ-recydyvistaŭ i 26‑hadovaha milicyjaniera Klaščonka

U lipieni 2025 hoda ŭ Barysavie raptoŭna pamianiali ŭsio kiraŭnictva rajonnaj milicyi. Pakinuŭ pasadu načalnik RUUSa Siarhiej Sałaviej (heta jon u 2020 hodzie ščyravaŭ u Salihorsku, asabista kirujučy žorstkimi zatrymańniami demanstrantaŭ, a paśla pajšoŭ na pavyšeńnie).

Vylecieŭ i jaho pieršy namieśnik Michaił Muraškin — były hubazikaviec, jaki padčas padziej 2020 hoda byŭ siarod načalnikaŭ žodzinskaj milicyi, za što trapiŭ u jeŭrapiejskija sankcyjnyja śpisy.

Zvolnili i načalnika kryminalnaj milicyi Ihara Paźniakova, i načalnika apieratyŭna-dziažurnaj słužby Valeryja Bandarenku — a hety zajmaŭ pasadu tolki paŭhoda.

Što ž za ziemlatrus adbyŭsia ŭ Barysavie? Padrabiaznaści šakujučaj historyi stali viadomyja dziakujučy śviedčańniam byłoha palitviaźnia Ihara Łosika. U pačatku 2025 hoda jon znachodziŭsia ŭ SIZA KDB. Za dzień da prezidenckich vybaraŭ da jaho ŭ kamieru zakinuli dziŭnaha recydyvista.

«Uvieś sini, u kučy tatuirovak sa svastykami, pierabitymi, zavuć Viačasłaŭ Šviec, jamu 48 hadoŭ, ź jakich 31 hod adsiedžanych», — napisaŭ u svaim telehram-kanale Ihar Łosik.

U SIZA KDB utrymlivajucca nie samyja zvyčajnyja aryštanty — čaściej za ŭsio tam sustrakajucca čynoŭniki-karupcyjaniery, biznesmieny, niekatoryja z palitviaźniaŭ. I voś hetaha marhinała Švieca — pavodle infarmacyi Belpol, u jaho ŭ anamniezie ŭžo 12 sudzimaściaŭ: kraŭ mabilniki, viełasipiedy, navat niekali abčyściŭ kaścioł u Barysavie — adpravili nie ŭ zvyčajnaje «milicejskaje» SIZA, a pad kantrol KDB. Što ž jon narabiŭ takoha?

Pavialičyć

Akazvajecca, u barysaŭskim IČU (izalatar časovaha ŭtrymańnia, znachodzicca faktyčna ŭ pamiaškańni RUUSa) milicyjaniery arhanizavali śpiecyjalnuju «pres-kamieru», dzie z zatrymanych vybivali pryznalnyja pakazańni. Adnak nie rukami samich siłavikoŭ, a voś takich recydyvistaŭ — Švieca i jaho susieda Alijeva. Alijeŭ maje azierbajdžanskaje pachodžańnie, ale žyŭ u Baranavičach. Pakul što pra jaho sabrana mienš infarmacyi.

Pa słovach Łosika, u kamiery, dzie ŭtrymlivali Švieca i Alijeva, byli telefon, televizar, lubaja ježa, harełka i navat narkotyki.

Jurydyčnaha abhruntavańnia taho, čamu jany znachodziacca ŭ IČU, niama. Pa ahulnaj praktycy zatrymanyja pa kryminalnaj spravie znachodziacca tam nie bolš za 10 sutak (a pa bolšaści artykułaŭ — da 3 sutak), paśla čaho ich pieravoziać u SIZA. Kali ž ich prysud ustupiŭ u siłu, to ich adpraŭlajuć ź SIZA ŭ kałoniju ci turmu. Adnak prynamsi ŭ vypadku z asudžanymi milicyja praktykuje takoje adchileńnie ad zakona — niekatorych kryminalnych aŭtarytetaŭ, jakija pajšli na supracoŭnictva ź siłavikami, farmalna afarmlajuć jak supracoŭnikaŭ haspadarčaha atrada, ale ŭ realnaści pakidajuć u kamierach. Sa svajoj kamiery jany pavinny kantralavać žyćcio inšych aryštantaŭ, pry patrebie takija aŭtarytety (ci prosta źniavolenyja vialikaj kamplekcyi) mohuć być i na čale «pres-kamier».

Jak raskazaŭ Łosik, u kancy studzienia 2025 hoda Šviec i Alijeŭ pierastaralisia z vybivańniem pakazańniaŭ z 59‑hadovaha žychara Barysava. «Bili nahami, rukami i butelkaj z vadoj pa hałavie. U vyniku jon pamior», — daviedaŭsia Łosik. Milicyjaniery, jakija pracavali ŭ IČU, nie pieraškodzili hetamu.

Pavialičyć

Za paradkam u kamierach sočyć kantralor. U niekatorych IČU ŭ kamierach rasstaŭlenaje videanazirańnie, u inšych dla ahladu jość śpiecyjalnaje vočka ŭ dźviarach. Adnak navat kali ŭ kamiery adbyŭsia niejki incydent i treba terminovaja dapamoha, u metach biaśpieki milicyjanier nie maje prava ŭvachodzić u kamieru adzin, jon pavinien spačatku vyklikać uzbrojenaje padmacavańnie.

Praź jaki pramiežak času źbitamu žycharu Barysava stali akazvać dapamohu, nieviadoma. Niama paćvierdžanaj infarmacyi i pra asobu zabitaha mužčyny.

Spravaj ab zabojstvie ŭ milicejskaj ustanovie zaniaŭsia KDB, tamu Švieca i Alijeva i pieraviali ŭ profilnaje SIZA. Tam unačy ich navat pryšpilvali da naraŭ kajdankami za dźvie ruki, kab raptam čaho nie vyjšła.

«Ja hetych dvaich (Švieca i Alijeva. — NN) pamiataju: na ŭsiu «amierykanku» (SIZA KDB) stajali žachlivyja kryki. Heta było ŭ pačatku hetaha hoda. I heta było niezvyčajna: kadebisty siabie ličać elitnaj kastaj, jakaja da mietadaŭ siłavoha ŭździejańnia nie apuskajecca. A tut — kožnuju ranicu i kožny viečar kryki, vopli, ruhań, kantralory złyja jak čerci…

«[Adnojčy] da nas [u kamieru] trapiŭ čałaviečak, jaki viedaŭ padrabiaznaści: skazaŭ, što adzin ź ich zabiŭ čałavieka, a druhi niby śviedka. Što KDB kapaje pad miantoŭ, i tamu ich pieraviali ŭ «amierykanku», i što sprava vielmi surjoznaja. A pryčyna krykaŭ u tym, što pavodzić jany siabie nie ŭmiejuć (na «amierykancy» svaje praviły, jakija vykonvajucca žorstka, i nijakija «paniaćci» i «błatavańnie» tam nie dapuščalnaje) i što ich tak łamajuć. Vytrymali jany hety režym niedzie miesiac, potym usio supakoiłasia, chacia čaściakom zdaralisia abvastreńni».

«Vielmi chutka adnaho raskałoli, toj zrazumieŭ, što sensu adpiracca niama, usio trapiła na kamieru, i zapis na hety raz nie ŭdałosia schavać. Druhi supraciŭlaŭsia daŭžej, ale taksama zdaŭsia. U vyniku naźbirali pakazańniaŭ stolki, što, kali iści pavodle zakona, to vielmi šmat kryminalnych spraŭ treba pierahladać, tamu što pryznańni pa ich byli vybityja siłaj hetymi dvuma. Jany nazvali šmat proźviščaŭ: chtości jašče siadzić, chtości vyzvaliŭsia, i śledčyja pa ŭsioj krainie jeździli i brali pakazańni ŭ źniavolenych, jakich źbivała hetaja para», — praciahvaje Łosik.

Źniavolenych dapytvali śledčyja KDB, jany i rasśledavali spravu suprać milicyjantaŭ, jakija nie mahli nie viedać pra schiemu z vybivańniem pakazańniaŭ. Zrešty, usio kiraŭnictva barysaŭskaj milicyi zvolnili, adnak pakinuli na svabodzie.

A načalnika Barysaŭskaha RUUSa zabrali ŭ Minsk — ciapier Siarhiej Sałaviej načalnik Akademii MUS pa ideałahičnaj pracy i kadravym zabieśpiačeńni. 

Adnak prynamsi adzin milicyjanier byŭ aryštavany, i «Našaj Nivie» stała viadoma jaho imia.

Pakul niezrazumieła, jakuju mienavita rolu adyhryvaŭ 26‑hadovy Anton Klaščonak u schiemie z vybivańniem pakazańniaŭ. Mahčyma, mienavita jon byŭ dziažurnym u toj noč, kali ŭ IČU zabili čałavieka. Admietna, što choć zabojsta adbyłosia jašče ŭ studzieni 2025 hoda, Klaščonka aryštavali zusim niadaŭna. Apošni raz jon byŭ anłajn «Ukantakcie» a 6‑j ranicy 11 listapada. Chutčej za ŭsio, u toj dzień jaho i nie vypuścili z čarhovaha dopytu.

Pavialičyć

Milicyjanier padpisany ŭ sacsietkach jak «Toni Klaščonak» z małankaj u kancy imieni. U telefonnych knižkach inšych ludziej jon zapisany jak «Anton Dźmitryjevič Učastkovy», «Śledčy», «Anton UII (Kryminalna-vykanalnaja inśpiekcyja) Klaščonak», «Nahlad Anton Dźmitryč», «Mient».

Pavodle infarmacyi «Kibierpartyzanaŭ», Anton Klaščonak skončyŭ škołu №13 u Barysavie. Paśla, miarkujučy pa bazach, niejki čas vučyŭsia ŭ Maładziečanskim handlova-ekanamičnym kaledžy. Pa stanie na pačatak 2021 hoda Toni Klaščonak užo pracavaŭ u barysaŭskaj milicyi. Jon u razvodzie, byłaja žonka zastałasia z małym dziciom. 

Pavialičyć

Prynamsi adnaho z zekaŭ-redycyvistaŭ buduć sudzić za zabojstva. Nakont druhoha peŭnaści niama — ci jaho ličać saŭdzielnikam hrupavoha zabojstva z asablivaj žorstkaściu, ci prosta śviedkam. Nieviadoma i toje, jaki artykuł inkryminujecca Klaščonku. Kali tolki chałatnaść, jakaja pryviała da śmierci čałavieka, to jon moža abmiežavacca tryma hadami «chimii» ci dvuma hadami kałonii. Kali ž milicyjaniera paličać arhanizataram złačynnaj schiemy, to jaho buduć sudzić pa tym ža rasstrelnym artykule, što i niepasrednaha vykanaŭcu.

Darečy, u najnoŭšaj historyi Biełarusi ŭžo było zabojstva za kratami. U 2012 hodzie recydyvist Ryhor Juzepčuk u kamiery mahiloŭskaj turmy zabiŭ svajho susieda Ihara Chadakova. Jak miarkujuć pravaabaroncy, pryčynaj była homaseksualnaja aryjentacyja Chadakova. Za toje zabojstva za kratami 45‑hadovaha Juzepčuka rasstralali.

• 0
• 1
• 1
• 0
• 4
• 0
• 2
• 0