Samuju darahuju kvateru listapada kupili ŭ domie, za prahlad žylla ŭ jakim brali 7 tysiač rubloŭ
U domie Lake Views u Paŭnočnym bierazie ŭ Minsku nabyli kvateru za amal 426 tysiač dalaraŭ. Jana stała samaj darahoj kvateraj, pradadzienaj u Biełarusi ŭ listapadzie. Heta mienavita toj dom, dzie z patencyjnych pakupnikoŭ brali depazit 7 tysiač rubloŭ za prava prahladu žylla, piša Realt.by.
Novy dom prapisaŭsia pa adrasie Ćvirki, 88 — heta kala Cnianki. Jon składajecca z troch izalavanych padjezdaŭ roznaj vyšyni — ad 6 da 8 pavierchaŭ — i raźličany na 79 kvater.
Zabudoŭščyk nazyvaje dom kalekcyjnym. Pa-pieršaje, takim jaho robić ciesnaje susiedstva z parkam, da jakoha ŭsiaho niekalki krokaŭ. Pa-druhoje, dom užo całkam hatovy. Pakupnikam nie davodzicca čakać zdačy kvater. Pa-treciaje, tut jość ułasnaja parkoŭka i izalavanyja zony adpačynku.
Nu i, narešcie, sami kvatery tut dobraha ŭzroŭniu. Stoli vyšynioj try mietry, usie vokny — u padłohu. Kidajucca ŭ vočy stylnyja adkrytyja łodžyi, jakija častkova zašklonyja. Vid z voknaŭ vierchnich pavierchaŭ — na Cnianku. Karaciej, padobna na sučasnyja damy dzie-niebudź u jeŭrapiejskim Mižziemnamorji.
Jašče adna historyja, źviazanaja z hetym domam, u tym, što za prahlad kvater tut u žniŭni zabudoŭščyk braŭ z patencyjnych pakupnikoŭ depazit u 7 tysiač rubloŭ. Kali čałaviek vyrašaŭ nabyć žyllo, jon moh unieści hetyja hrošy ŭ košt cany kvatery. Kali ž nie, to jamu całkam viartali pieraličanuju sumu. Heta aktyŭna abmiarkoŭvałasia ŭ sacsietkach.
Zabudoŭščyk na toj momant trymaŭ u sakrecie ceńnik. Ale było viadoma, što košt zaležyć ad pavierchu i mietražu. U košt kvatery taksama ŭklučana i adno parkovačnaje miesca ŭ krytym parkinhu pad styłabatam doma.
I voś u listapadzie ŭ hetym domie kupili adnapakajovuju kvateru płoščaj 78,8 kvadrata za 425 898 dalaraŭ. Mietr atrymaŭsia prykładna pa 5398 dalaraŭ.
Darečy, jak paviedamlaŭ telehram-kanał «Budni ryełtara» ŭ pačatku listapada, siaredniaja cana za mietr u ździełkach ŭ hetym domie — 4990‑5690 dalaraŭ.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary