Štučny intelekt pieravaročvaje pornaindustryju

Historyja paŭtarajecca: industryja dla darosłych zaŭsiody była palihonam dla vyprabavańnia novych technałohij. Kali ŭ XV stahodździ Iahan Hutenbierh vynajšaŭ drukarski stanok, jaho amal adrazu prystasavali dla druku pikantnych brašur. Filmy dla darosłych źjavilisia na videakasietach u 1977 hodzie — na hod raniej za halivudskija błokbastary — i niekatory čas daminavali ŭ prodažach. Kali ŭ pačatku 1980‑ch u Francyi zapuścili Minitel, papiarednika internetu, eratyčnyja pasłuhi składali ad traciny da pałovy ŭsiaho trafiku. Padobnaja historyja adbyvałasia z kabielnym telebačańniem i anłajn-stryminham, a ciapier čarha dajšła i da štučnaha intelektu (ŠI), piša The Economist.

Pakul mnohija tradycyjnyja biznesy vahajucca z ukaranieńniem novych technałohij, pornaindustryja dziejničaje imhnienna. Sajty dla darosłych užo pierapoŭnieny videa i vyjavami, zhienieravanymi niejrasietkami. Da pracesu dałučajucca i technałahičnyja hihanty, jakija šukajuć sposaby apraŭdać inviestycyi ŭ svaje madeli. Naprykład, raspracoŭka Iłana Maska Grok užo prapanuje «pikantny režym», a OpenAI sa śniežnia dazvalaje hienieracyju erotyki ŭ ChatGPT dla vieryfikavanych darosłych karystalnikaŭ.

Pavodle prahnozaŭ daśledčykaŭ, rynak ŠI-kantentu dla darosłych užo sioleta dasiahnie 2,5 miljarda dalaraŭ i budzie raści na 27% štohod da 2028 hoda.

Dla razumieńnia maštabu varta zirnuć na ahulnyja ličby. Suśvietnaja pornaindustryja štohod atrymlivaje amal 100 miljardaŭ dalaraŭ vyručki — heta ŭdvaja bolš, čym uvieś ciapierašni rynak štučnaha intelektu.

Piać z 50 samych naviedvalnych sajtaŭ u śviecie — heta resursy dla darosłych. Da niadaŭniaha času hety rynak kantralavali płatformy, dzie realnyja ludzi pradavali svoj kantent pa padpiscy: naprykład, servis OnlyFans za minuły finansavy hod atrymaŭ 1,4 miljarda dalaraŭ vyručki i 520 miljonaŭ čystaha prybytku. Adnak ciapier ŠI prapanuje alternatyvu: kantent pad zakaz, jaki kaštuje tańniej i stvarajecca chutčej.

Kali raniej technałohii prosta spraščali raspaŭsiudžvańnie kantentu, to ŠI ździajśniaje revalucyju ŭ samoj vytvorčaści. Karystalnik moža sfarmiravać idealnaha partniora — vybrać koler skury, ciełaskład, charaktar — i prymusić jaho ŭvasablać lubyja fantazii. Popyt na takuju pasłuhu kałasalny.

Pavodle danych daśledčykaŭ, dziesiać samych papularnych sajtaŭ, jakija prapanujuć virtualnych «kampańjonaŭ» dla znosin i flirtu, tolki za pieršy kvartał 2025 hoda sabrali 78,5 miljona naviedvańniaŭ.

Ludzi šukajuć blizkaści navat tam, dzie jaje być nie pavinna: raspracoŭščyki zvyčajnaha čat-bota Kuki raskazvajuć, što karystalniki pryznavalisia ałharytmu ŭ kachańni 90 miljonaŭ razoŭ, a tracina surazmoŭcaŭ sprabavała schilić prahramu da virtualnaha seksu.

A što realnyja pornazorki?

Navukovyja ekśpierymienty pakazvajuć, što hledačy ŭsio čaściej usprymajuć sintetyčnyja tvary jak bolš realnyja, čym sapraŭdnyja.

Viadomyja pornazorki ryzykujuć bolš za ŭsio. Ich tvary i videa ŭžo vykarystoŭvajuć dla treniroŭki madelaŭ abo dla stvareńnia dypfejkaŭ bieź ich zhody. Niekatoryja sprabujuć nie zmahacca z chvalaj, a zarabić na joj. Jany licenzujuć svaje vobrazy dla stvareńnia aficyjnych AI-kłonaŭ, što prynosiać prybytak praz čaty i danaty.

Pavialičyć

Dla amataraŭ i madelaŭ na OnlyFans štučny intelekt staŭ karysnym instrumientam. Videahienieratary skaračajuć stvareńnie rolika ź dzion da hadzin, a čat-boty biaruć na siabie samuju prybytkovuju častku — pryvatnyja paviedamleńni.

Źmieny zakranuli i pasrednikaŭ. Studyi sutyknulisia z tym, što ich filmy vykarystoŭvajucca dla navučańnia botaŭ. Akciory ciapier patrabujuć u kantraktach punkty, jakija zabaraniajuć vykarystańnie ich pracy dla AI-trenirovak.

Płatformy taksama vybirajuć roznyja stratehii. OnlyFans dazvalaje tolki častkova apracavany kantent, robiačy staŭku na realnaść. Inšyja sajty, nakštałt Fanvue, naadvarot, rekłamujuć AI-kantent. Prazrystaść i markiroŭka stanoviacca klučavymi faktarami dla novych sacyjalnych płatformaŭ.

Jakija ryzyki

U cełym ŠI abiacaje značna pavysić pradukcyjnaść u halinie. Choć heta, vierahodna, adbiare pracu ŭ niekatorych akcioraŭ porna. Adnak z ŠI budzie mieniej patreby ŭ niebiaśpiečnych abo ekstremalnych scenach, mienš ryzyki infiekcyj, mienš fizičnaha prymusu.

Hałoŭnaja niebiaśpieka novaj ery — heta patencyjnaja narmalizacyja hvałtu i machlarstva. Dabračynnaja arhanizacyja Internet Watch Foundation fiksuje rezki rost kolkaści zhienieravanych vyjaŭ seksualnaha hvałtu nad dziećmi.

Za pieršyja dziesiać miesiacaŭ 2025 hoda paviedamleńniaŭ pra ich stała bolš čym udvaja, čym za ŭvieś 2024-y. Choć pry stvareńni takoha kantentu realnyja dzieci nie pakutujuć, ekśpierty bajacca, što heta razmyvaje maralnyja miežy.

Akramia taho, statystyka pakazvaje suviaź pamiž porna i realnym žyćciom: rost papularnaści ahresiŭnych praktyk na ekranie pryvioŭ da taho, što bolš za 40% žančyn va ŭzroście 25—29 hadoŭ sutykalisia padčas seksu z dušeńniem z boku partniora pa ŭzajemnaj zhodzie.

Miedyki papiaredžvajuć: «biaśpiečnaha ŭdušeńnia» nie isnuje, čałaviek moža stracić prytomnaść za siekundy. U Vialikabrytanii navat prapanujuć pryniać zakon, jaki b zabaraniŭ porna sa scenami ŭdušeńnia.

Pavialičyć

Štučny intelekt aktyŭna vykarystoŭvajecca dla stvareńnia dypfejkaŭ i pracy servisaŭ pa «raspranańni», jakija prybirajuć adzieńnie z fatahrafij realnych ludziej. Za paŭhoda 85 takich sajtaŭ naviedali 18,5 miljona razoŭ, a ich uładalniki zarabili na hetym 36 miljonaŭ dalaraŭ. Stvaryć praŭdapadobnaje padroblenaje videa z čužym tvaram siońnia možna mienš čym za 25 chvilin.

Achviarami ŭsio čaściej stanoviacca nie znakamitaści, a zvyčajnyja ludzi, čyje fota lohka znajści ŭ siecivie. Kali dla adnych karystalnikaŭ heta sposab stvaryć iluziju blizkaści, to dla machlaroŭ — srodak šantažu. Maštab prablemy pałochaje: apytańni pakazvajuć, što kala traciny žančyn i piataja častka mužčyn u ZŠA i Jeŭropie turbujucca, što mohuć stać mišeńniu takoj padrobki.

Rehulatary pa ŭsim śviecie sprabujuć uvieści zakony suprać raspaŭsiudžvańnia dypfejkaŭ i abaviazać markiravać sintetyčny kantent, ale technałohii raźvivajucca chutčej za zakanadaŭstva.

Faktyčna, adzinymi realnymi kantralorami zastajucca hłabalnyja płaciežnyja sistemy nakštałt Visa i Mastercard, jakija mohuć błakavać płaciažy sajtam-parušalnikam.

U kančatkovym vyniku internet ryzykuje chutka patanuć u biaskoncym patoku ekstremalnaj sintetyčnaj erotyki. Adnak ekśpierty spadziajucca, što mienavita hetaja štučnaść moža paradaksalnym čynam padkreślić kaštoŭnaść sapraŭdnaha čałaviečaha kantaktu. Va ŭmovach, kali ŭsprymańnie realnaści skažajecca ałharytmami, žyvyja adnosiny i sapraŭdnaja blizkaść mohuć stać hałoŭnym deficytam i kaštoŭnaściu budučyni.

• 0
• 0
• 4
• 1
• 1
• 1
• 0
• 0