U Kalinkavičach zakryli radzilnaje adździaleńnie — kab naradzić, treba jechać u inšy rajon

U Kalinkavickaj centralnaj rajonnaj balnicy «Našaj Nivie» paćvierdzili, što radzilnaje adździaleńnie sapraŭdy bolš nie pracuje, pryčym z sakavika.

«Žančyny ŭsio jašče mohuć stajać u nas na ŭliku padčas ciažarnaści, ale naradžać treba budzie jechać u Mazyr. Mała naradžajuć, kab utrymlivać adździaleńnie»,

— prakamientavali tam i dadali, što da Mazyra 30 kiłamietraŭ, heta nie takaja vialikaja adlehłaść.

«Čas na darohu da Mazyra — jak pierasoŭvacca pa vialikim horadzie. U listapadzie adkryjuć naš most [praz Prypiać] — budzie jašče chutčej dabiracca».

Nahadajem, stan mosta na darozie Kalinkavičy—Mazyr, pabudavanaha ŭ 1958 hodzie, byŭ pryznany pieradavaryjnym, u 2023 hodzie startavała jaho rekanstrukcyja.

Na sajcie lakarni ciapier raźmieščanyja tolki kantakty śpiecyjalistaŭ žanočaj kansultacyi, nasuprać pracaŭnikoŭ hiniekałahičnaha adździaleńnia — pusta.

Pavialičyć

U Kalinkavičach pa stanie na 1 studzienia 2025 hoda pražyvała 36 tysiač 656 čałaviek, a va ŭsim rajonie — 53 tysiačy 947 čałaviek. Jakraz za žycharak rajona najbolš pieražyvajuć miascovyja, bo z addalenych viosak užo ciažej dajechać da Mazyra i Homiela.

Zakryćcio radzilnych adździaleńniaŭ u nievialikich haradach — heta ŭžo, možna skazać, tendencyja.

Jašče ŭ 2020 hodzie ŭ Ministerstvie zdaroŭja abaznačyli, što heta sprava času dla miescaŭ, dzie buduć prymać mienš za 100 rodaŭ za hod. Pry takich pakazčykach paradzich pieranakiroŭvajuć na mižrajonny ŭzrovień. U suviazi z hetym u 2024 hodzie, naprykład, zakryłasia akušerskaje adździaleńnie ŭ Dokšycach. Paradzichi ŭ Słucku na dadzieny momant taksama vymušanyja jeździć z rodnaha horada ŭ Salihorsk.

Kolkaść rodaŭ u Biełarusi sapraŭdy mocna skaraciłasia: tak, zhodna sa statystykaj Biełstata, u toj ža Homielskaj vobłaści, dzie znachodziacca Kalinkavičy, jašče ŭ 2019 hodzie naradziłasia 13 710 čałaviek, a za 2024 — užo 9 116. 

Upieršyniu za čatyry hady Biełstat apublikavaŭ źviestki ab naradžalnaści i śmiarotnaści. Danyja žachajuć

Pavialičyć

Akušer-hiniekołah: «Lepiej atrymać dapamohu tam, dzie absłuhoŭvańnie lepšaje. 20 chvilin darohi nie krytyčnyja»

Va ŭmovach, kali pakazčyki naradžalnaści sapraŭdy tak mocna źnizilisia, zakryćcio radzilniaŭ u nievialikich haradach — heta adekvatnaje rašeńnie, ličyć akušer-hiniekołah Stanisłaŭ Sałaviej.

«Kali my majem harady na adlehłaści 20-30 kiłamietraŭ adzin ad adnaho, a špitali ŭ ich nieraŭnaznačnyja pa jakaści abstalavańnia, to lepiej, kab ludzi atrymali dapamohu tam, dzie absłuhoŭvańnie lepšaje. 20 chvilin darohi nie ŭpłyvajuć na situacyju krytyčna. Tym bolš z paradzichami. Na momant rodaŭ jany ŭžo musiać znachodzicca ŭ tym miescy, dzie im akažuć dapamohu. Lepš uzmacniać mižrajonnyja balnicy, kab tam była sapraŭdy jakasnaja dapamoha, čym utrymlivać šmat drobnych, dzie nie budzie ni pacyjentaŭ, ni piersanału, ni aparatury — tolki šylda ad taho, što heta balnica».

Surazmoŭca źviartaje ŭvahu na toje, što kolkaść pryniatych rodaŭ napramuju ŭpłyvaje na kvalifikacyju doktara.

«Kali ty niešta nie robiš pastajanna, ty hublaješ kvalifikacyju. Kali niama pacyjentaŭ, to jaki sens isnavańnia radzilni — prosta, kab jana była? Pryniać rody — heta nie prablema, a kali ŭ žančyny buduć uskładnieńni, to ŭ takoj situacyi tam užo mohuć nie dać rady, bo dla krytyčnych situacyj treba ŭtrymlivać dobruju kamandu, a kali lekar bolšuju častku času ničoha nie robić, jon hublaje kvalifikacyju. I lepš hrošy na ŭtrymlivańnie niezahružanych adździaleńniaŭ puścić na dadatkovuju mašynu chutkaj dapamohi ci na viertalot, kab pry, dapuścim, ciažkim kryvacioku dastavić pacyjentku tudy, dzie jaje i dzicia sapraŭdy zmohuć vyratavać».

Padychod utrymlivańnia balnic, tolki kab ludziam było blizka, nie źviartajučy ŭvahi na jakaść, doktar nie ličyć słušnym.

«Lekaraŭ nie chapaje, na žal, abstalavańnia nie chapaje. Sama miedycyna ŭskładniajecca. Miedycyna — heta nie pryjści prosta da lekara i parazmaŭlać. Špital, jaki biessensoŭny, jaki nie moža dać dobruju dapamohu, musić być začynieny, kali pobač jość inšy, uzmocnieny, dzie mohuć zrabić pracedury lepš. Tamu toje, što ŭ Kalinkavičach začyniajuć radzilniu — dobra, heta moža kamuści vyratavać žyćcio. Bo kudy važniej atrymać mienavita jakasnuju dapamohu, a nie atrymać jaje bližej».

• 0
• 0
• 1
• 2
• 2
• 1
• 1
• 0