U Polščy raście kolkaść admoŭ biełarusam u vydačy prajaznoha dakumienta. U čym pryčyna?

Admovy zamiest dapamohi: što adbyvajecca

U Polščy pačaścilisia admovy ŭ vydačy polskaha prajaznoha dakumienta dla inšaziemca biełarusam. Pra heta paviedamili pravaabaroncy abjadnańnia Partyzanka, jakija pracujuć ź mihrantami i viaduć biaspłatnuju infaliniju dapamohi.

Farmalna zakon na baku zajaŭnikaŭ: art. 252a Zakona ab inšaziemcach prosta pakazvaje: prajazny dakumient moža być vydadzieny, kali pašpart stračany, skradzieny, paškodžany, skončyŭsia termin jaho dziejańnia abo kali čałaviek nikoli jaho nie mieŭ. Ale na praktycy ŭsio vyhladaje inakš.

«Vosieńniu niešta źmianiłasia»: kali pačałasia chvala admoŭ

Rezki rost admoŭ fiksujecca z vosieni hetaha hoda. «Prablemy z vydačaj polskaha prajaznoha dakumienta biełarusam my fiksavali i raniej, adnak da niadaŭniaha času heta byli adzinkavyja, niesistemnyja vypadki. Istotnaje abvastreńnie situacyi my nazirajem z vosieni hetaha hoda. U kastryčniku—listapadzie rezka vyrasła kolkaść zvarotaŭ na našu infaliniju ad biełarusaŭ, jakija atrymali rašeńni ab admovie. Havorka idzie ŭžo nie pra asobnyja incydenty, a pra zaŭvažnuju tendencyju», — adznačajuć u Partyzanka.

Važna: prablemy tyčacca nie ŭsich. Kali biełarus padajecca z-za skončanaha terminu pašparta RB, ryzyki minimalnyja.

Čaściej za ŭsio admaŭlajuć tym, chto zajaŭlaje pra stratu, kradziež abo paškodžańnie dakumienta.

Varšava ŭ lidarach, ale prablema šyrejšaja

Aficyjnaj statystyki niama, ale pravaabaroncy bačać, što čaściej za ŭsio admovy prychodziać z bujnych haradoŭ, pierš za ŭsio z Varšavy. Pry hetym sihnały iduć z roznych haradoŭ, što moža śviedčyć pra źmienu ahulnaha padychodu ci praktyki.

Realnyja prykłady admoŭ

Partyzanka vyvučyła dziasiatki rašeńniaŭ — arhumientacyja tam vielmi padobnaja. Typovyja kiejsy:

• čałaviek nie zmoh uzhadać dakładnuju datu straty pašparta — užond vyrašyŭ, što strata fiktyŭnaja.
• Pašpart skrali za miežami Polščy, ale zajaŭnik nie źviarnuŭsia ŭ miascovuju palicyju — admova.
• Palicyja admoviłasia vydavać daviedku pra kradziež — usio roŭna admova.
• Pašpart sapsavany ŭ bycie (prałka, dzieci, žyvioły) — admova.

Va ŭsich vypadkach orhany robiać vysnovu: zajaŭnik nibyta praciahvaje mieć sapraŭdny pašpart. U rašeńniach sustrakajucca farmuloŭki, što hramadzianie Biełarusi «masava hublajuć abo źniščajuć dakumienty» i paznačajuć «vymyślenyja abstaviny».

Jak pavysić šancy na atrymańnie dakumienta

Jurysty rajać padychodzić da zajavy maksimalna ŭvažliva.

1. Padrabiazna apisvać abstaviny straty abo paškodžańnia.
2. Paznačać dakładnyja daty, miesca i paśladoŭnaść padziej.
3. Pry kradziažy abaviazkova źviartacca ŭ palicyju i brać paćviardžeńnie.
4. Prykładać lubyja dokazy, navat uskosnyja.
5. Paźbiahać supiarečnaściaŭ u historyi.

Admova — nie kaniec: čamu važna abskardzić rašeńnie

Kali admova ŭžo atrymanaja, jaje abaviazkova treba abskardzić. Inakš pry paŭtornaj padačy ŭžond moža zajavić: raz vy nie skardzilisia, značyć, pahadzilisia z tym, što pašpart u vas jość.

Abskardžańnie padajecca praz užond, jaki vynies niehatyŭnaje rašeńnie, u vyznačanyja terminy. Dalej jano pieradajecca ŭ orhan druhoj instancyi — da Kiraŭnika ŭpraŭleńnia pa spravach inšaziemcaŭ (do Szefa Urzędu do Spraw Cudzoziemców).

• 5
• 2
• 1
• 9
• 4
• 2
• 3
• 0