Napiaredadni apošniaha dnia 2025 hoda žurnalisty Onliner.by adpravilisia pahladzieć na situacyju ŭ adzin ź minskich supiermarkietaŭ — acanili daŭžyniu čerhaŭ, zazirnuli ŭ charčovyja košyki i zaryjentavalisia ŭ cenach i maštabach vydatkaŭ.
30 śniežnia, čatyry hadziny dnia — hety čas stvaraje iłžyvaje ŭražańnie z razradu «Ja paśpieju zakupicca, pakul ludzi na pracy». Druhuju iluziju stvaraje biaźludny jołačny bazar na ŭvachodzie. Ale ŭsio źmianiajecca, varta tolki pierastupić paroh supiermarkieta. Uvieś hałoŭny «varušniak» tut, unutry. Kolkaść pakupnikoŭ pieravalvaje za sotniu, i zdajecca, što dziela nakrytaha stała tut daviadziecca pravieści hadziny try (ale, zabiahajučy napierad, adznačym: heta taksama iluzija).
Ludzi z napaŭpustymi košykami razhladajuć navahodnija škarpetki, dakuplajuć jołačnyja cacki. Stomlenaja žančyna nie vytrymlivaje i, na chvilinku prytarmaziŭšy, adpivaje fruktovaha soku.
Pa zale raskinulisia astraŭki z klučavymi praduktami: napojami, haroškam, kukuruzaj, tartaletkami. Pobač časova raźmieščana vitryna z hatovymi sałatami — ad aliŭje i viniehretu da hranatavaha.
«Ja dumała ŭziać pajeści ciapier» — padsłuchanaja fraza nahadvaje: da kanca hoda jašče jak minimum dzieviać pracoŭnych hadzin.
U adździele z čyrvonaj rybaj čarha situatyŭnaja: to čałaviek piać, to nikoha. Žančyna adychodzić ad pryłaŭka, bieražliva zavaročvajučy pakiet z čverciu fareli. Inšaja žančyna biare kiłahram naboru dla juchi. Na lodzie raskładzieny bujnyja tuški karpa — adna takaja zavažyć na kiłahram-paŭtara.
Niekalki krokaŭ u bok — i adkryvajecca vid na samuju doŭhuju čarhu — u kulinaryju. Adrazu ŭ niekalkich vazkach zaŭvažana sproba zekanomić čas na pryhatavańni sałataŭ: advarnyja buraki, bulba i morkva. Adzin z vazkoŭ vyłučajecca: u im lažać try bahiety. Ale praz paŭhadziny hety rekord pabje sustrety kala kasy vazok, davierchu napoŭnieny tolki chlebam
Pavyšany popyt zaŭvažany la palicy z čyrvonaj rybaj u vakuumnych upakoŭkach i kala kantejnieraŭ z mandarynami — ludzi nabirajuć ich napierahonki. Pakul pieramiaščajemsia pamiž hetymi kropkami, fiksujem jarkija detali z pakupnickich košykaŭ: čatyry johurty, stratehičny zapas kacinaha kormu, baton varanaj kaŭbasy na viaršyni horki praduktaŭ i kubik Rubika.
U adździele z sadavinaj i harodninaj jabłyku niama dzie ŭpaści, a voś z košykaŭ pakupnikoŭ časam štości vypadaje. Nie redkaść i «avaryi» z udziełam vazkoŭ, jak i parušeńni «chutkasnaha režymu» z boku pakupnikoŭ. Adzinokija pryparkavanyja i davierchu napoŭnienyja vazki, darečy, nichto nie vykradaje.
Minčanka Maryna zakupiłasia na 99%, ale joj nie chapaje adnaho hałoŭnaha inhredyjenta.
— Źbirajusia druhi raz u žyćci hatavać tartar. Ź jałavičynaj usio drenna, i heta ŭžo treciaja krama. A tak ja ŭžo ŭsio, hatova. Pa canie košyk ciapier budzie rubloŭ na 300.
Ananas zmahajecca za zvańnie hałoŭnaha frukta śviatočnaj nočy, tamaty čery — za ŭvahu pakupnikoŭ z dapamohaj nadpisu «Miadovyja». Kali pryhledziecca ŭvažliviej, stanovicca jasna: heta nie apisańnie smaku, a handlovaja nazva. Na pryłaŭku zaŭvažana bujnyja hreckija kłubnicy — jahady zielenavatyja, a cana za letni nastroj u śniežni — 42,65 rubla za kiłahram.
Nasustrač iduć dvoje mužčyn, čyje pakupki mocna kantrastujuć pamiž saboj: u maładoha čałavieka ŭ vazku kitajski vinahrad «Šajn muskat» i fistaški, u mužčyny hadoŭ na 20 starejšaha ni vazka, ni košyka — tolki cełaja tuška kurycy.
Roŭna hod tamu ŭ hetaj ža kramie, u adździele kaŭbas było davoli šmatludna, a ciapier chutčej spakojna. Doŭhich čerhaŭ nie nazapašvajecca, niahledziačy na toje, što ludzi to i sprava prosiać narezku na słajsiery. Jašče adno paraŭnalnaje nazirańnie: hod tamu na pryłaŭkach było mienš indyčki, a ciapier jana pradstaŭlena i ŭ vyhladzie file, i ŭ farmacie kaŭbasy, i ad roznych vytvorcaŭ.
Papiarovych śpisaŭ z zakreślenymi słovami «harošak» i «majanez» u rukach biełarusaŭ jak byccam stała mienš. Zatoje bolš ludziej, jakija łavirujuć pamiž inšymi vazkami, źviarajučysia z telefonam. Naprykład, u adnaho z mužčyn «viš-list» da navahodniaha stała — heta davoli doŭhaje paviedamleńnie ŭ miesiendžary.
U śpiešcy i raznastajnaści praduktaŭ niezaŭvažanaj zastajecca praca pradaŭcoŭ. Jany dakładnymi i adpracavanymi ruchami sotniu razoŭ paŭtarajuć adny i tyja ž apieracyi: admierać, uzvažyć, vybić ček. Čarhi prajaŭlajucca chvalami, i kali ŭ joj čałaviek piać-siem, to jana dosyć chutka rastvarajecca ŭ natoŭpie. Heta adna z pryčyn, čamu pieršapačatkovaje ŭražańnie «Dy tut chadzić daviadziecca try hadziny» akazvajecca pamyłkovym.
Druhaja pryčyna — pradukty zajmajuć prykładna pałovu handlovaj zały, a značyć, nie treba chadzić pa ŭsioj płoščy. U kancy ŭ paradku ekśpierymientu stanovimsia na elektronnuju kasu i ŭklučajem siekundamier — naša čarha raźličvacca padychodzić praź piać chvilin.
Za hetyja dni my adznačyli takija sposaby zekanomić čas na arhanizacyi navahodniaha stała:
- Iści ŭ kramu ŭ nie samy papularny časavy intervał.
- Kuplać harodninu i «bazavyja» pradukty ŭ kramie la doma.
- Brać harodninu i kaŭbasu va ŭpakoŭkach — tady budzie minus adna čarha na ŭzvažvańnie.
- Hrupavać punkty ŭ śpisie pakupak pa adździełach, kab nie marnavać čas na pieramiaščeńni pamiž imi.
- Raźličvacca na kasach samaabsłuhoŭvańnia — tam čarha sapraŭdy ruchajecca chutčej.
- Skarystacca dastaŭkaj z supiermarkieta.
Kala kasy pahutaryć zhadžajecca Volha.
— Na stoł budziem stavić aliŭje, šubu, sieladziec, katlety, miasa, sadavinu — jak usie lubiać. My žyviem u Emiratach, tut u nas svajaki. Pa sumie składana ŭjavić, kolki heta budzie, ja ŭžo nie vielmi dobra aryjentujusia ŭ cenach.
Niepadalok u košyku ŭ Viktara apošnija štrychi da navahodniaha stała — inhredyjenty dla aliŭje.
— U mianie siońnia ŭsio čysta dla aliŭje, astatniaje ŭžo kuplena. Buduć narezački, niekalki sałataŭ, sieladziec pad futram. Užo patraciŭ prykładna 500 rubloŭ.
Pa toj bok kas z užo apłačanym košykam sustrakajem Alaksandra.
— Ček prabili na 160 rubloŭ: kupiŭ bahiet dla buterbrodaŭ, sadavinu na stoł, biezałkaholnaje piva, usiakija torciki, sieladziec, ananas, vinahrad, syr. Tut kłasnaja krama, usio supier, ale mandaryny prosta žudasnyja. Heta ŭžo treciaja, pradfinalnaja zakupka — pajedu ich šukać zaŭtra paśla pracy.
Taksama sa zdabyčaj z zony kas vyryvajecca Alena.
— Hatovyja byli na 0%, voś užo padrychtavalisia. Tradycyjna buduć harošak, futra, abaviazkova miasnoje — novyja recepty. Ček ciapier prabili na 339 rubloŭ. Jašče budziem dakuplać drobiazi, ale heta ŭžo zaŭtra.
Ciapier čytajuć
Cichanoŭskaja pavinšavała biełarusaŭ razam z Kaleśnikavaj, Sieviaryncam i Łatuškam25
Kamientary
Šuba.
Sieladziec pad futram.
A naprykancy artykuła prosta - futra.
Nu, fiłołaChi z-pad biudžietu,pierajechanyja raźmierkavańniem, vašaje słova!