«Daŭlusia łasosiem, bo na karpa nie chapiła»: biełarusy vyśmiejvajuć čarhovy fejk prapahandy
Siužet STB pra toje, jak palaki «haładajuć» pierad Kaladami, vyklikaŭ buru sarkazmu ŭ sacsietkach. Karystalniki Threads na roznyja łady raskazvajuć, jak vyžyvajuć.
«Kaladnyja śviaty dla palakaŭ supravadžajucca finansavym napružańniem. Pavodle apytańniaŭ, usio bolš siemjaŭ nie mohuć sabie dazvolić zvyčajnyja padarunki i pradukty. Ceny ŭ krainie rastuć chutčej za kaladnyja čakańni», — z surjoznymi tvarami zajavili viadučyja prahramy «24 hadziny» na STB.
«U krainie na 13% vyraśli ceny na pradukty. Asabliva padaraželi miasa, syry, šakaład i ryba. Tak, kiłahram karpa ŭ Polščy kala 60 złotych. Heta amal 50 biełaruskich rubloŭ», — raskazvali ŭ prahramie.
Hety siužet zaŭvažyŭ adzin z karystalnikaŭ Threads i iranična zapytaŭsia ŭ supołki:
«Moža, chto viedaje, na jakim śmietniku ŭ Polščy možna praterminoŭki nabrać da navahodniaha stała? Chaciełasia b skurki ad mandarynaŭ znajści, kab choć pach byŭ da Novaha hoda».
«Zusim ašaleli. Jak z takimi cenami Novy hod sustrakać?»
Dopis nie zastaŭsia biez uvahi inšych biełarusaŭ, siarod jakich šmat tych, chto žyvie ŭ Polščy. Jany aburylisia nachabnaj chłuśnioj pra ceny i pačali spaborničać u «trahičnych» historyjach pra svajo harotnaje žyćcio, stylizujučy kamientary pad naratyvy dziaržTB.
«My na rynku brali skryniu mandarynaŭ (10 kh) za 15 złotych (kala 12 rubloŭ — NN), a ŭ kramie jany ŭžo ŭ dva razy daražejšyja! Ceny niepadjomnyja! Śviežaje miasa ŭčora ŭ «Biedroncy» pa 6 zł/kh (4,80 rubla — NN) pradavali… Zusim ašaleli. Jak z takimi cenami Novy hod sustrakać?»
«Tak, ryba vielmi darahaja. File achałodžanaha łasosia biez kostak — 49,9 złotaha (40 rubloŭ — NN). A pierad Kaladami ŭ «Biedroncy» jašče i druhoje biaspłatna davali. Muž jak prynios mnie 2 kh pa canie adnaho, dyk ja płakać pačała… Usiu zarpłatu patraciŭ! I karpa pa 17 złotych (kala 14 rubloŭ — NN) kupili ŭsiaho 5 kh, a nie bolš, jak ja chacieła. Voś u Biełarusi łasoś naohuł zadarma, napeŭna…»
«Nie zmahła sabie dazvolić karpa, pryjšłosia davicca file łasosia. Kaŭbasa darahaja, pryjšłosia kupić prašuta. Vielmi ciažka».
«Na narmalny syr nie chapiła, pryjšłosia ź ćvillu brać — bry i harhanzołu niejkuju. «Savieckaha šampanskaha» niama, davodzicca kuplać francuzskaje. Jašče i nie paŭsałodkaje, a brut! Žach, karaciej».
«Strašna žyć u Polščy, strašna… hoładna i choładna. Česnaje słova! Ładna, pajdu buterbrod z łasosiem zrablu, a to bolš ni na što hrošaj nie chapiła».
«A my z takimi cenami navat stoł nakryvać na Novy hod nie budziem, idziom na biaspłatny kancert. Niejki Stynh budzie śpiavać. Dumaju, ad niemahčymaści nakryć stoł pryjdzie šmat ludziej — skučkujemsia, choć na aciapleńni sekanomim».
Aŭtar dopisu zapościŭ taksama karcinku bahata nakrytaha stała i padpisaŭ — «kaladny stoł siaredniestatystyčnaha zavadčanina ŭ Biełarusi».
«Heta ŭsio na zavodzie vydali?» — pytajucca.
«Nie. Usio ŭ kadr nie źmiaściłasia, što vydali. Pryjšłosia prafsajuzam jašče i pa dadatkovym chaładzilniku padaryć kožnamu».
Čamu palaki nie viedajuć «praŭdy»?
Biełarusy pažartavali i z taho, čamu sami žychary Polščy nie ŭ kursie svajho «harotnaha» stanovišča.
«A palaki viedajuć pra heta?» — spytaŭ niechta.
«Viadoma, nie! Vy bačyli, kolki ŭ ich elektryčnaść kaštuje? Daloka nie kožny moža dazvolić sabie ŭklučyć televizar, kab daviedacca praŭdu», — iranizujuć u adkaz.
Niekatoryja iduć dalej i z humaram raźvivajuć naratyŭ biełaruskaj prapahandy:
«Polšča adkryła jašče dva pierachody, kab palaki mahli zakupicca jakasnymi tannymi praduktami da śviataŭ u Biełarusi».
«Čakaju na Novy hod pasyłku ad baćkoŭ: kiłahram hrečki i pud soli…»
«Biełaruś užo rychtuje armiju dronaŭ z hrečkaj i karpami zamiest bajavoj častki».
«Niaŭžo niechta ŭ heta vieryć?»
Adnak za žartami chavajecca i stoma ad pastajannaj chłuśni. Mnohija karystalniki zaŭvažajuć, što pakul dziaržTB šukaje prablemy ŭ susiedziaŭ, situacyja ŭ samoj Biełarusi dalokaja ad ideału.
«Niaŭžo niechta ŭ heta vieryć? Vielmi kampietentnyja, kali havorka idzie pra ekanomiku inšaj krainy. Svaje nadoi i sienakosy ŭžo ŭsie abmierkavali?» — aburajecca adzin z kamientataraŭ.
«Tolki nie zabudźciesia raskazać, što tut pierad śviatami mora akcyj. Biary — nie chaču, źnižak vielmi šmat. A ŭ nas u RB jak zaŭsiody ŭsio vyraście ŭ canie, usie chočuć stać bahatymi za adzin dzień», — dadaje inšy.
«Tak lublu biełaruskija ŚMI… To palaki biahuć da nas pa hrečku, to mierznuć… Ciapier stali biednymi da Novaha hoda. A ŭ nas nibyta ŭsio hud?! Ceny palacieli ŭ kosmas, zarobki, miakka kažučy, nie jak pa televizary. Ale za miažoj, vidać, vidniej…»
«Siadžu ŭ trusach, zamiarzaju». U sacsietkach vyśmiejali čarhovuju strašyłku ANT pra «zamiarzajučuju Jeŭropu»
«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna
Bialacki: Azaronka ŭ kałonii ciarpieć nie mohuć, vyklučajuć adrazu
Ciapier čytajuć
«Lublu, kali biełarusy biełarusiacca»: u sacsietkach žartujuć z nadvorja i abmiarkoŭvajuć prablemy2
Kamientary