Łukašenka pra zajavu Rasii ab «atacy dronaŭ» na rezidencyju Pucina: Najdzičejšy teraryzm, ale Pucin nie admovicca ad miru
«Ja padazraju, chto tam staić za Uładzimiram Alaksandravičam Zialenskim».
Łukašenka adkamientavaŭ zajavu Rasii pra sprobu ataki ŭkrainskich dronaŭ na rezidencyju Pucina. Jon zrabiŭ heta ŭ Minsku padčas naviedvańnia «Haryzonta», piša BiełTA.
«Viadoma, heta najdzičejšy teraryzm na samym vysokim dziaržaŭnym uzroŭni. Kali heta tak, jak ciapier heta padajuć», — skazaŭ Alaksandr Łukašenka.
«Ja jakraz dumaju pra toje, kamu heta było treba, da čaho heta mahło pryvieści. Nu, kamu treba — ja padazraju, chto tam staić za Uładzimiram Alaksandravičam Zialenskim. Dumaju, što kali jon da hetaha i pryciahnuty, to jon nie viedaŭ, što robić. Heta pa-pieršaje», — dadaŭ jon.
«Mahčyma, jany chacieli spravakavać Pucina ŭ momant, kali mir užo, možna skazać, pobač. Kab sarvać hety pierahavorny praces. Jość i taki punkt hledžańnia. Što Pucin pojdzie na niejkuju eskałacyju, što jon admovicca ad niejkaha mirnaha šlachu. A siońnia ranicaj ja ŭžo zaŭvažyŭ: ničoha padobnaha. U hetym uvieś Pucin. Jon nie mitusicca. I jon maje racyju. Nie treba śpiašacca. Jość mirny trek — idziom pa im», — zajaviŭ jon.
U paniadziełak, 29 śniežnia, ministr zamiežnych spraŭ Rasii Siarhiej Łaŭroŭ zajaviŭ, što ab nibyta atacy 91 ukrainskaha bieśpiłotnika na rezidencyju Pucina na Vałdai ŭ Naŭharodskaj vobłaści.
Łaŭroŭ, jaki akreśliŭ heta jak «kančatkovy pierachod kijeŭskaha režymu da palityki dziaržaŭnaha teraryzmu», dadaŭ, što ciapier pieramoŭnaja pazicyja Rasii budzie pierahledžanaja, choć uvohule jana nie maje namieru vychodzić ź pieramoŭnaha pracesu.
Uładzimir Zialenski abvierhnuŭ słovy ministra, nazvaŭšy ich chłuśnioj.
Na dumku Zialenskaha, Maskva sprabuje stvaryć infarmacyjny fon dla eskałacyi, bo prahres u stasunkach Ukrainy i ZŠA źjaŭlajecca «pravałam dla rasijan».
«Rasijanie nie chočuć zakončyć hetuju vajnu. Svajoj zajavaj, što atakavanaja była niejkaja rezidencyja, jany prosta rychtujuć hlebu dla taho, kab nanieści ŭdary pa stalicy [Ukrainy] i pa dziaržaŭnych budynkach», — padkreśliŭ kiraŭnik Ukrainy.
U svaju čarhu vydańnie «Možiem objaśniť» vyjaviła šerah faktaŭ, jakija nie supadajuć z karcinaj, namalavanaj Kramlom.
Žurnalisty «MO» apytali 14 žycharoŭ Naŭharodskaj vobłaści, u tym liku tych, chto žyvie niepasredna kala Vałdaja. Nichto ź ich nie zaŭvažyŭ prykmiet maštabnaj pavietranaj bitvy.
«Nie było nijakaha hudzieńnia hetaj nočču, vybuchaŭ — tym bolš. Kali b było štości padobnaje, uvieś horad heta b abmiarkoŭvaŭ sto adsotkaŭ», — cytuje vydańnie adnaho ź miascovych žycharoŭ. Dla horada z nasielnictvam 14 tysiač čałaviek pralot i źbićcio amal sotni dronaŭ nie mahli prajści niezaŭvažna.
Žychary Vałdaja adznačajuć, što zaŭsiody čujuć navat šum viertalotaŭ, jakimi karystajecca Pucin, adnak u noč i ranicu nibyta ataki ŭ sacyjalnych sietkach i miascovych čatach nie źjaviłasia nivodnaha paviedamleńnia ab vybuchach.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach24
Kamientary