Ci možna pakarać susiedziaŭ za šumnaje zastolle ŭ navahodniuju noč?
Navahodniaja noč tradycyjna ličycca časam viesiałości i hučnych śviatkavańniaŭ. U haradach u hety čas pracujuć kancertnyja placoŭki i miescy masavych hulańniaŭ, adnak mnohija ludzi adznačajuć śviata ŭ svaich kvaterach, z muzykaj, tancami i šumnymi zastollami. Heta časta stanovicca pryčynaj niezadavolenaści susiedziaŭ, asabliva tych, u kaho jość maleńkija dzieci, pažyłyja svajaki abo prablemy sa zdaroŭjem. Ci raspaŭsiudžvajucca na hetuju noč zvyčajnyja praviły, ahienctva «Minsk-Naviny» spytałasia ŭ načalnika jurydyčnaha adździeła ŽEU № 3 Pieršamajskaha rajona Alaksieja Skałdzina.
Bolšaść ludziej, jakija adčuvajuć dyskamfort ad navahodniaha šumu, starajucca nie abvastrać situacyju i ličać, što ŭ takuju noč treba prosta paciarpieć. Pry hetym tradycyi śviatkavańnia faktyčna staviacca vyšej za pravy inšych žycharoŭ doma na spakoj i adpačynak.
Adnak zakanadaŭstva Biełarusi vyrazna vyznačaje praviły pavodzin u žyłych damach. Zhodna ź dziejnymi normami, z 23‑j hadziny viečara da 7‑j hadziny ranicy zabaronienyja lubyja dziejańni, jakija stvarajuć šum abo vibracyju. Da ich adnosiacca hučnaja muzyka, kryki, śpievy, vykarystańnie piratechniki, hulnia na muzyčnych instrumientach, ramontnyja raboty, rezkaje lapańnie dźviaryma i inšyja padobnyja dziejańni. Hetaje praviła raspaŭsiudžvajecca i na navahodniuju noč.
Kali hetyja patrabavańni parušajucca, žychary majuć prava źviarnucca ŭ milicyju. Za parušeńnie spakoju praduhledžanaja administracyjnaja adkaznaść: štraf ad 2 da 10 bazavych vieličyń, a kali parušeńnie paŭtarajecca na praciahu hoda — ad 10 da 30 bazavych vieličyń.
Razam z tym pracedura pryciahnieńnia da adkaznaści nie zaŭsiody adbyvajecca aŭtamatyčna. Jak adznačaje śpiecyjalist u śfiery žyllovaha zakanadaŭstva, kožnaja situacyja razhladajecca indyvidualna. Śviatkavańnie Novaha hoda moža być źmiakčalnaj akaličnaściu, a taksama ŭličvajecca tak zvanaja małaznačnaść parušeńnia — kali šum nie nanios istotnaj škody inšym žycharam.
Asablivuju ŭvahu supracoŭniki milicyi źviartajuć na pryčyny, čamu pastupiła skarha. Kali ŭ siamji jość maleńkija dzieci, ciažkachvoryja abo pažyłyja ludzi, jakija majuć patrebu ŭ cišyni, heta stanovicca važkim arhumientam dla pryniaćcia bolš strohich mier.
Prybyŭšy na vyklik, supracoŭniki pravaachoŭnych orhanaŭ mohuć abmiežavacca vusnym papiaredžańniem, paraić źmienšyć hučnaść muzyki abo praciahnuć śviatkavańnie ŭ miescach masavych hulańniaŭ. Kali ž šum praciahvajecca abo pastupajuć paŭtornyja skarhi, parušalnikaŭ mohuć pryciahnuć da administracyjnaj adkaznaści.
Što pahladzieć u navahodniuju noč? Alternatyŭnaja prahrama pieradač na YouTube
Navahodniaja afiša ŭ Minsku: kudy pajści paśla boju kurantaŭ
Navahodni stoł za 20 rubloŭ: biełaruska pakazała, što zdoleła kupić na takija hrošy
U Cichanoŭskich pieršy siamiejny Novy hod za 5 hadoŭ. Jak staviać jalinku i chto budzie narazać sałaty?
Kamientary
[Zredahavana]