Vialikaje rabavańnie banka ŭ Hiermanii. Jak złačyncy skarystali Kalady i abčyścili amal usie jačejki
Ź siejfaŭ vykrali kala 30 młn jeŭra najaŭnymi i kaštoŭnaściami.
Złodziei vykarystali vialikuju dryl, kab prabracca ŭ bank Sparkasse na ažyŭlenaj vulicy horada Hielzenkirchien na zachadzie Hiermanii. Rabavańnie było arhanizavana ŭ cichija vychodnyja paśla Kaladaŭ. Ź siejfaŭ vykrali kala 30 młn jeŭra najaŭnymi i kaštoŭnaściami, paviedamiła palicyja, piša Bi-bi-si.
Pradstaŭnik palicyi paraŭnaŭ hetaje rabavańnie z halivudskim filmam «Adzinaccać siabroŭ Oŭšena», adznačyŭšy ŭ kamientaryi dla ahienctva AFP, što jano było «vykanana vielmi prafiesijna».
Padčas rabavańnia ŭ adździaleńni banka Sparkasse ŭ horadzie Hielzienkirchien złodziei ŭzłamali bolš za 3 tysiačy siejfavych jačejek. U ich zachoŭvalisia hrošy, zołata i kaštoŭnaści.
Palicyja paviedamiła, što daviedałasia pra złačynstva paśla taho, jak ranicaj paniadziełka, 29 śniežnia, spracavała sihnalizacyja.
Na hety momant nikoha nie zatrymali. Złačyncy zastajucca na voli. Pieršyja vyniki rasśledavańnia śviedčać, što złodziei trapili ŭ bank i ŭciakli praz susiedni parkinh.
Śviedki raspaviali, što bačyli ŭ haražy niekalkich mužčyn, jakija ŭ noč z suboty na niadzielu nieśli vialikija torby.
Palicyja zajaviła, što na videazapisach vidać čorny Audi RS6, jaki vyjazdžaje z haraža na vulicy De-ła-Šavalje ranicaj u paniadziełak, 29 śniežnia. Adtulinu, jakaja viała da padziemnaha schovišča, vyjavili paśla spracoŭvańnia pažarnaj sihnalizacyi. Palicyja razam z pažarnymi ahledzieła budynak.
U aŭtorak, 30 śniežnia, palicyja pierakryła ŭvachod u adździaleńnie banka paśla taho, jak kala jaho sabrałasia vialikaja kolkaść klijentaŭ, jakija patrabavali infarmacyi.
«Ja nie moh zasnuć toj nočču. My nie atrymlivajem nijakaj infarmacyi», — raspavioŭ adzin mužčyna niamieckamu telekanału Welt.
Pavodle danych Reuters, ludzi kazali, što ŭ banku zachoŭvalisia ich źbieražeńni na staraść. U Sparkasse paviedamili, što złodziei ŭzłamali 95% siejfavych jačejek klijentaŭ.
Taksama ŭ banku dadali, što źmieściva kožnaj jačejki zastrachavana na sumu da 10 300 jeŭra i paraili klijentam pravieryć, ci majuć jany dadatkovuju chatniuju strachoŭku.
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie, aryštavali 1,8 młn jeŭra na jaje rachunkach20
Kamientary
I rabavańnie taksama Vialikaje