Пакуль свет засяроджаны на інфляцыі і войнах, у Паўднёвай Карэі новы вораг — выпадзенне валасоў
У Паўднёвай Карэі страта валасоў стала прадметам сур’ёзных палітычных дэбатаў. Чаму лідар краіны прыраўноўвае барацьбу з выпадзеннем валасоў да «пытання выжывання» і актыўна прасоўвае ідэю дзяржаўнай падтрымкі грамадзян, якія сутыкнуліся з гэтай праблемай, тлумачыць The Wall Street Journal.
Падчас нарады па пытаннях дзяржаўнай палітыкі прэзідэнт Паўднёвай Карэі Лі Чжэ Мён, які сам валодае пышнай фрызурай, спытаў у міністра аховы здароўя краіны, ці можна лічыць выпадзенне валасоў хваробай і ці можа дзяржаўнае медыцынскае страхаванне пакрываць лячэнне гэтай праблемы.
Калі яму адказалі, што аблысенне звычайна лічыцца эстэтычнай праблемай і аплачваецца з уласнай кішэні, Лі заўважыў, што для часткі маладых людзей валасы, што радзеюць, — гэта не дробязь, а «пытанне выжывання».
Лі Чжэ Мён звяртаецца да гэтай тэмы не ўпершыню. Ён ужо абяцаў зрабіць лячэнне аблысення даступным па страхоўцы падчас перадвыбарчай кампаніі 2022 года. Вярнуўшыся да гэтай ідэі цяпер, кіраўнік краіны імкнецца знайсці водгук у маладых выбаршчыкаў, якія ўсё больш востра адчуваюць сацыяльны і псіхалагічны ціск.
Знешнасць — форма сацыяльнага капіталу
Як адзначае WSJ, такая незвычайная для сусветнай палітыкі ўвага да валасоў абумоўлена спецыфічнай культурай Паўднёвай Карэі, якая вядомая як адна з сусветных сталіц індустрыі прыгажосці: ад ідалаў К-pop да шматступеньчатых сістэм догляду і развітай сферы пластычнай хірургіі.
Унутры краіны гэта не проста вялікі рынак, а частка сацыяльнага парадку, дзе знешнасць часта разглядаецца як форма сацыяльнага капіталу.
У карэйскім грамадстве шырока ўжываецца паняцце «лукізм» — перавага, якую атрымліваюць людзі, што адпавядаюць стандартам прывабнасці. У краіне распаўсюджаным з’яўляецца выраз «твая знешнасць — гэта таксама кваліфікацыя». Амаль на ўсе вакансіі, нават на падпрацоўку барыста, да анкеты кандыдата абавязкова патрабуецца дадаць фотаздымак.
Даследчыкі тлумачаць: Паўднёвая Карэя — адна з найменш этнічна разнастайных краін свету, таму стандарты прыгажосці могуць быць больш вузкімі і жорсткімі, чым у шматэтнічных грамадствах, а знешнасць у выніку часам пачынае працаваць як паказчык таго, да якога сацыяльна-эканамічнага класа належыць чалавек.
Аргументы «за» і «супраць»
Як адзначае WSJ, ініцыятыва Лі падзяліла краіну практычна напалам.
Аргументы за дзяржаўнае фінансаванне грунтуюцца на тым, што кошт сучасных прэпаратаў і працэдур вельмі высокі, і многія вымушаныя траціць велізарныя сумы без гарантыі выніку. Людзі, якія сутыкнуліся з гэтай праблемай, адзначаюць, што пастаянная трывога з-за страты валасоў разбурае іх самаацэнку і прымушае адчуваць сябе неабароненымі ў канкурэнтным грамадстве.
Аднак прапанова прэзідэнта выклікала і моцную хвалю крытыкі. Як адзначае WSJ, апаненты ініцыятывы, у тым ліку прадстаўнікі медыцынскіх арганізацый, лічаць такі крок сумнеўным з пункту гледжання фінансаў.
Асноўны аргумент супраць палягае ў тым, што дзяржаўная сістэма аховы здароўя і так перагружаная, таму рэсурсы трэба накіроўваць на лячэнне крытычных захворванняў. Акрамя таго, гучаць меркаванні, што гэта можа быць несправядліва ў адносінах да жанчын, паколькі праблема аблысення традыцыйна лічыцца пераважна мужчынскай.
Тым не менш, паводле апытання Embrain Trend Monitor, больш за тры чвэрці жыхароў краіны лічаць, што праблема выпадзення валасоў хвалюе ўсіх. Прыкладна палова рэспандэнтаў, нават нягледзячы на адсутнасць сімптомаў аблысення, прызнаецца, што цікавіцца сродкамі супраць выпадзення.
Прэзідэнт Паўднёвай Карэі адзначае, што цяпер міністэрства аховы здароўя краіны вывучае мэтазгоднасць уключэння лячэння аблысення ў страхавы пакет.
Каментары
Но при чём тут квалификация - это вопрос менталитета.
Глаза и зубы в приоритете,чисто моё мнение. И конечно же здоровое питание и физическая активность.