«Palicy pustyja». Pierakupščyki masava vyvoziać z Polščy ŭ Biełaruś jajki Kinder adnoj sieryi
Biełarusy masava šukajuć u polskich kramach šakaładnyja jajki Kinder Joy ź limitavanaj kalekcyi — pa sieryjale «Vielmi dziŭnyja spravy». U Biełarusi jany nie pradajucca. Popyt užo pryvioŭ da farmiravańnia asobnaha siehmienta rynku: pierakupščyki i pieravozčyki hatovyja vazić jajki z Polščy pad zakaz. Čytačy vydańnia Most śćviardžajuć, što ciapier hetuju sieryju stała ciažka znajści i ŭ polskich handlovych sietkach.
Jajki z cackami pa viadomym sieryjale zavozili ŭ kramy Polščy, Hiermanii, Italii i niekatorych inšych krain ES. U Biełarusi jany aficyjna nie pradajucca, ale, jak vyśvietliłasia, karystajucca popytam u dziaciej i kalekcyjanieraŭ. Zapyty ad tych, chto hatovy ich zakazać, masava źjaŭlajucca na forumach i ŭ čatach.
Popyt naradžaje prapanovu. Bajery — tyja, chto vozić tavary pad zakaz, — hatovyja pradavać kalekcyju «Vielmi dziŭnyja spravy» i skrynkami, i paasobku. Ceny — 3—3,5 dalara za štuku. Dla paraŭnańnia: u polskich sietkavych kramach jašče niadaŭna ich možna było kupić krychu daražej za 6 złotych, abo prykładna pa 1,7 dalara. Adnak na markietpłejsach užo źjaŭlajucca prapanovy pa 9—14 złotych za štuku biez uliku dastaŭki.
«Jość adčuvańnie, što hetyja jajki metanakiravana skuplajuć i vyvoziać»
Alaksiej žyvie ŭ Varšavie i nie źbiraŭsia stanavicca častkaj «kindar-ekanomiki». Ale niekalki miesiacaŭ tamu jaho plamieńnicy ź Biełarusi paprasili pieradać «kindary» mienavita pa «Vielmi dziŭnych spravach».
«Tady ŭsio było prosta, — uspaminaje Alaksiej. — Ja zajšoŭ u Kaufland (sietkavuju kramu. — Zaŭv. Most), kupiŭ kala dziesiaci štuk i pieradaŭ praz znajomych z ahulnaj pieradačaj da Novaha hoda».
Niadaŭna prośba paŭtaryłasia. Alaksiej znoŭ adpraviŭsia ŭ kramy ŭ Varšavie i sutyknuŭsia ź niečakanaj prablemaj: patrebnych jajek tam prosta nie akazałasia.
«Ja prajšoŭsia pa niekalkich sietkach, znoŭ zazirnuŭ u Kaufland, dzie kuplaŭ raniej. Palicy pustyja. Kankretna hetaj sieryi — nidzie, — kaža jon. — Pryčym jość adčuvańnie, što jany źnikli nie ŭ adnoj kramie, a ŭvohule ŭsiudy».
Tady Alaksiej pačaŭ vyvučać telehram-čaty. Vyśvietliŭ, što pradaŭcy hatovyja sustrakacca z pakupnikami «adrazu ź miažy», pradavać paasobku abo skrynkami i navat pracavać bieź pieradapłaty. Alaksiej kuplać jajki praz čaty nie staŭ.
«Stvarajecca ŭražańnie, što hetyja jajki metanakiravana skuplajuć i vyvoziać», — kaža mužčyna. Pavodle jaho słoŭ, vazić hatovyja i roznyja sieryi.
U tyktoku roliki biełarusaŭ, jakija źbirajuć kalekcyju, taksama nabirajuć papularnaść. Ich aŭtary demanstrujuć cacki z Kinder Joy, abmiarkoŭvajuć kankretnyja sieryi i skardziacca, što kupić takija «kindary» ŭ biełaruskich kramach niemahčyma.
Biełarus za 150 rubloŭ sprabuje pradać ekskluziŭnuju fihurku z «Kindara»
Cikavyja detali pra finał sieryjała «Vielmi dziŭnyja spravy»
Netflix raskazaŭ pra nievierahodny pośpiech sieryjała «Vielmi dziŭnyja spravy». Sieryjał upłyvaje na ŭsie śfiery žyćcia
Akcior papularnaha sieryjała «Vielmi dziŭnyja spravy» paŭtara hoda nie pryznavaŭsia pra zdymki. Kazaŭ, što hraje ŭ dakumientałcy pra majanez
Vychodzić finał kultavaha sieryjała «Vielmi dziŭnyja spravy». Hledačy abrynuli Netflix
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie4949
Kamientary