Topavaha kitajskaha hienierała vinavaciać u pieradačy jadziernych sakretaŭ ZŠA

Jak piša WSJ, spasyłajučysia na svaje krynicy, znajomyja z chodam zakrytaha bryfinhu dla vyšejšych aficeraŭ, namieśnik staršyni Centralnaha vajskovaha savieta 75‑hadovy Čžan Jusia, jaki ličyŭsia adnym z samych davieranych paplečnikaŭ Si Czińpina, ciapier znachodzicca pad śledstvam. Jaho vinavaciać nie tolki ŭ karupcyi, ale i ŭ «stvareńni palityčnych hrupovak», što ŭ terminałohii Kampartyi Kitaja aznačaje padryŭ adzinstva ŭłady.

Sa słoŭ krynic, samaje šakavalnaje abvinavačvańnie, ahučanaje padčas zakrytaha bryfinhu, tyčycca nacyjanalnaj biaśpieki.

Jak adznačaje vydańnie, hienierała padazrajuć u tym, što jon pieradaŭ ZŠA klučavyja techničnyja źviestki ab jadziernaj zbroi Kitaja. Niekatoryja dokazy suprać jaho, pavodle źviestak WSJ, pastupili ad Hu Cziunia — byłoha kiraŭnika dziaržaŭnaj karparacyi China National Nuclear Corp., jakaja kuryruje jak cyvilnuju, tak i vajskovuju jadziernuju prahramu KNR. Cziun taksama trapiŭ pad śledstva ŭ hetym miesiacy.

Padčas bryfinhu, jak piša WSJ, ułady paviedamili, što sprava Hu vyvieła śledčych na fakt parušeńnia biaśpieki ŭ jadziernym siektary, da jakoha maje dačynieńnie Čžan. Kankretnyja akaličnaści ŭciečki nie ahučvalisia.

Akramia špijanažu, asablivuju ŭvahu śledstva pryciahnuła rola Čžana ŭ nahladzie za mahutnym viedamstvam, jakoje adkazvaje za raspracoŭku, zakupku i vytvorčaść vajskovaj techniki. Jak piša WSJ, hienierała padazrajuć u tym, što jon pieratvaryŭ hetuju strukturu z hihanckim biudžetam u krynicu asabistaha ŭzbahačeńnia.

Pavodle źviestak vydańnia, Čžan prymaŭ istotnyja sumy ŭ abmien na prasoŭvańnie aficeraŭ pa słužbie mienavita ŭ hetaj prybytkovaj sistemie zakupak. Mienavita praz takuju schiemu — za vialiki chabar — svajo pavyšeńnie atrymaŭ i eks-ministr abarony Li Šanfu, jakoha raniej taksama sa skandałam źniali z pasady i vyklučyli z partyi za karupcyju.

Dla rasśledavańnia spravy Čžana była stvorana śpiecyjalnaja hrupa. Jana zaraz pracuje ŭ Šeńjanie, dzie hienierał kamandavaŭ vajskovaj akruhaj z 2007 da 2012 hoda. Jak piša WSJ, śledčyja demanstratyŭna spyniajucca ŭ miascovych haścinicach, a nie na vajskovych bazach, kab paźbiehnuć upłyvu suviaziaŭ hienierała.

Užo kanfiskavanyja mabilnyja pryłady ŭ aficeraŭ, jakija prasoŭvalisia pa słužbie razam z Čžanam. Pry hetym, jak piša WSJ, tysiačy vajskoŭcaŭ, źviazanych ź imi, mohuć stać nastupnymi abjektami rasśledavańnia. Razam z Čžanam pad śledstva trapiŭ i 61‑hadovy hienierał Lu Čžeńli, načalnik Abjadnanaha štaba.

Nastupstvy

Na dumku šerahu analitykaŭ, jakich cytuje WSJ, ciapierašniaja antykarupcyjnaja kampanija Si Czińpina ŭ vojsku — samaja maštabnaja z časoŭ Mao Czeduna. Za apošnija 2,5 hoda pad śledstvam apynulisia abo byli zvolnienyja bolš za 50 vysokapastaŭlenych vajskoŭcaŭ i kiraŭnikoŭ abaronnych pradpryjemstvaŭ.

Krynicy WSJ padkreślivajuć asablivy status Čžana. Jak i Si Czińpin, jon naležyć da kasty tak zvanych «čyrvonych pryncaŭ» — naščadkaŭ revalucyjnaj elity. Jahony baćka vajavaŭ razam z baćkam Si padčas hramadzianskaj vajny, i abodva paźniej zaniali vysokija pasady ŭ partyjnaj i dziaržaŭnaj ijerarchii.

Toje, što Si vyrašyŭ pazbavicca navat takoha blizkaha čałavieka, śviedčyć, sa słoŭ ekśpiertaŭ, ab «nulavoj talerantnaści» da niełajalnaści i karupcyi. Analityki, na jakich spasyłajecca vydańnie, miarkujuć, što heta demanstracyja absalutnaj ułady Si Czińpina nad vojskam.

Analityki padkreślivajuć, što zakryty charaktar kitajskaj palityčnaj sistemy nie dazvalaje dakładna zrazumieć sapraŭdnyja matyvy likvidacyi Čžana. Unutranyja tłumačeńni dla partyjnaj elity, jak piša WSJ, nie zaŭsiody pakazvajuć usiu praŭdu.

Redakcyjny artykuł u aficyjnaj haziecie PLA Daily abvinavaciŭ hienierała ŭ tym, što jon «surjozna padarvaŭ» instytucyjnyja asnovy ŭłady staršyni Centralnaj vajskovaj kamisii. Ekśpierty tłumačać heta jak sihnał, što Čžan nazapasiŭ zanadta vialiki ŭpłyŭ pa-za asabistym kantrolem Si Czińpina.

Takoje «abiezhałoŭlivańnie» vojska maje surjoznyja nastupstvy. Jak adznačaje vydańnie, z šaści prafiesijnych vajskoŭcaŭ, jakija ŭvachodzili ŭ Centralny vajskovy saviet u 2022 hodzie, zastaŭsia tolki adzin dziejny aficer — hienierał Čžan Šenmiń, były palitrabotnik i inśpiektar dyscypliny, a nie bajavy kamandzir.

Na dumku ekśpiertaŭ, ź jakimi razmaŭlali žurnalisty WSJ, asłableńnie vyšejšaha kamandavańnia moža źnizić zdolnaść Kitaja pravodzić składanyja vajskovyja apieracyi ŭ najbližejšaj pierśpiektyvie. Heta moža aznačać, što ryzyka nieadkładnaha ŭvarvańnia na Tajvań źnižajecca, pakul Piekin sprabuje navieści paradak u svaich šerahach i, mahčyma, rychtujecca da składanych pieramoŭ z Vašynhtonam u pytańniach handlu i biaśpieki, u tym liku vakoł Tajvania.

• 3
• 0
• 2
• 0
• 1
• 0
• 0
• 0