U Kitai praciahvajucca žorstkija čystki ŭ armii: palacieła hałava druhoha čałavieka ŭ vojsku

Jak paviedamlaje The Wall Street Journal sa spasyłkaj na pradstaŭnika Ministerstva abarony Kitaja, Si Czińpin vyklučyŭ z partyi i zvolniŭ hienierała Che Vejduna — małodšaha pa ranhu z dvuch namieśnikaŭ staršyni Centralnaj vajskovaj kamisii (CVK, najvyšejšaha vajskovaha orhana Kampartyi) i člena Palitbiuro.

Che Vejdun staŭ samym vysokapastaŭlenym aficeram, jaki trapiŭ pad čystku vajskovaha kiraŭnictva krainy, i pieršym namieśnikam staršyni CVK, źniatym z pasady za apošnija amal sorak hadoŭ.

Razam ź im pasad pazbavilisia jašče vosiem vysokapastaŭlenych vajskoŭcaŭ. Siarod ich — admirał Miaa Chua, były kiraŭnik palityčnaha ŭpraŭleńnia CVK, eks-kamandujučyja rakietnymi vojskami stratehičnaha pryznačeńnia i ŭnutranymi vojskami, a taksama byłyja palitkamisary suchaputnych vojskaŭ i fłota.

Jak paviedamiŭ pradstaŭnik Ministerstva abarony Kitaja, śledstva vyjaviła, što ŭsie dzieviać čałaviek ździejśnili «surjoznyja parušeńni partyjnaj dyscypliny» i «ciažkija złačynstvy, źviazanyja sa słužbovaj dziejnaściu». Ich praviny, jakija ŭklučali «atrymańnie asabliva bujnych sum hrošaj», mieli nadzvyčaj surjozny charaktar i «nadzvyčaj niehatyŭny ŭpłyŭ». Ciapier usich dzieviaciarych čakaje vajskovy trybunał.

Jak piša WSJ, hetaja čystka, jakaja ŭžo zakranuła traich z šaści prafiesijnych vajskoŭcaŭ u składzie CVK, pryznačanych u 2022 hodzie, vyklikaje pytańni pra zdolnaść Si Czińpina zabiaśpiečyć bajazdolnaść i łajalnaść armii na fonie hłabalnych ambicyj Kitaja.

68‑hadovy Che Vejdun byŭ nie prosta hienierałam. Jaho ličyli členam tak zvanaj «fucziańskaj hrupoŭki» — blizkaha koła čynoŭnikaŭ, jakija pracavali razam ź Si ŭ pravincyi Fucziań, jašče da taho, jak toj uznačaliŭ krainu. Heta suviaź zabiaśpiečyła jamu niezvyčajna chutki ŭźlot: u 2022 hodzie jaho pryznačyli na pasadu namieśnika staršyni CVK, choć jon navat nie byŭ paŭnapraŭnym členam Centralnaha kamiteta, što parušała ŭsie niefarmalnyja praviły.

Ironija losu ŭ tym, što na svajoj pasadzie hienierał Che kuryravaŭ mienavita palityčnuju dyscyplinu i ideałahičnuju apracoŭku ŭ vojsku. Jaho zadačaj było ŭkaraniać «absalutnuju łajalnaść partyi». Bolš za toje, da svajho pryznačeńnia ŭ Piekin jon kamandavaŭ Uschodnim bajavym kamandavańniem — vojskami, raźmieščanymi nasuprać Tajvania.

Apošni raz jaho bačyli na publicy ŭ sakaviku, dzie jon uschvalaŭ prahramu madernizacyi armii Si Czińpina i zaklikaŭ być viernym linii partyi. Paśla hetaha jon źnik: prapuściŭ pasiadžeńni Palitbiuro, štohadovuju vysadku drevaŭ z udziełam kiraŭnictva i, što samaje pakazalnaje, jaho imia było adzinym z členaŭ Palitbiuro, jakoha nie zhadali na žałobnych viankach na pachavańni inšaha hienierała.

Jak adznačaje vydańnie, apošni raz dziejnaha namieśnika staršyni CVK zdymali z pasady ŭ dalokim 1989 hodzie. Tady heta byŭ Čžaa Czyjan, hienieralny sakratar partyi, jakoha pakarali za spahadu studenckim pratestam na płoščy Ciańańmeń. Siońniašnija padziei pakazvajuć, što navat poŭnaja demanstratyŭnaja łajalnaść i asabistaja blizkaść da Si Czińpina bolš nie harantujuć biaśpieku vysokapastaŭlenym čynoŭnikam.

Styl kiravańnia Si ŭsio bolš nahadvaje padychody Maa Czeduna i Iosifa Stalina. Niezdarma jon staŭ pieršym kiraŭnikom Kitaja pieryjadu paśla Maa, jaki admoviŭsia ad abmiežavańnia pieryjadu svajho kiravańnia.

• 1
• 0
• 7
• 0
• 2
• 0
• 1
• 0