«Prosta lusterka». Biełarusy pakazali, u što pieratvaryŭ darohi cykłon ź ledzianym daždžom
«Cukrovaja hłazura» na aŭtamabilach i «lusterka» zamiest tratuaraŭ i prajeznaj častki — z takoj niaprostaj realnaściu siońnia pryjšłosia sutyknucca mnohim biełarusam, jakija nie majuć mahčymaści zastacca doma ŭ niepahadź. Vinavatym staŭ cykłon «Leani», i, na žal, jon vyrašyŭ zatrymacca ŭ Biełarusi, piša «Telehraf».
Sacsietki biełarusaŭ zapoŭnili videa, jakija dakazvajuć, što ŭsie papiaredžańni sinoptykaŭ, ratavalnikaŭ i DAI byli nie pustymi słovami.
Tak, dla mnohich biełaruskich aŭtamabilistaŭ ranica pačałasia z małapryjemnaj karciny, jakuju zvyčajna ŭbačyš chiba što ŭ virusnych internet-rolikach. Pramiorzły doždž, jaki išoŭ ź viečara, pakryŭ ledzianoj korkaj mnohija mašyny, padaryŭšy aŭtamabilistam druhoje škło.
Na žal, na hetym pryhody aŭtamabilistaŭ nie zakančvalisia. Tych, kamu ŭdałosia adahreć svaje ledzianyja mašyny, čakała prykładna takaja ž daroha. Na učastkach, da jakich jašče nie dabralisia darožniki i kamunalniki ź piasčana-solevymi sumiesiami, daroha pieratvarałasia ŭ katok ci «prosta lusterka», jak vykazaŭsia aŭtar adnaho z rolikaŭ.
Mužčyna pakazaŭ, što nie ŭsim mašynam udavaŭsia hety kvest — pieraadoleć navat minimalny padjom na šlachu, kali adcinak byŭ zakatany ŭ lod — fury i aŭtobusy ŭ adzin momant prosta spynialisia, nie ŭ siłach prasunucca dalej.
Inšy aŭtamabilist i zusim paraiŭ «kaleham» 100 razoŭ padumać, pierš čym sadzicca za rul siońnia. Mužčyna prademanstravaŭ poŭnuju adsutnaść začepu na zaledzianiełaj kalainie na trasie, jakuju nie paśpieli apracavać sollu.
Tym ža, chto ŭsio ž ryzyknuŭ, na žal, nie zaŭsiody šancavała, miarkujučy pa vialikaj kolkaści ranišnich avaryj.
Nie lahčej prychodzicca i piešachodam. Tak, hamialčanka pakazała, u jakoje vyprabavańnie pieratvaryłasia ranicaj daroha da pracy.
«Heta prosta žyvy lod, usio bliščyć. Niemahčyma iści», — papiaredziła žančyna.
Darečy, aranžavy ŭzrovień niebiaśpieki z-za niebiaśpiečnaha hałalodu Biełhidramiet padoŭžyŭ jašče na sutki, da viečara 28 studzienia, dla čatyroch abłaściej Biełarusi, na Hrodzienščynie i Brestčynie da hetaha času situacyja pačnie palapšacca, ale ŭsio jašče zachavajecca na patencyjna niebiaśpiečnym uzroŭni.
Ciapier čytajuć
Učora — u łukašenkaŭskaj turmie, siońnia — u Kijevie dapamahaje ŭkraincam vyžyć. Były palitviazień i svajak Cichanoŭskaj staŭ vałancioram u Punkcie niazłomnaści66
Učora — u łukašenkaŭskaj turmie, siońnia — u Kijevie dapamahaje ŭkraincam vyžyć. Były palitviazień i svajak Cichanoŭskaj staŭ vałancioram u Punkcie niazłomnaści6
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju33
Kamientary