Hamialčanka stała surahatnaj mamaj, kab zabiaśpiečyć svajo dzicia, a były muž adsudziŭ bolšuju častku hanararu

U redakcyju «Mocnych Navin» źviarnułasia Taćciana (imia źmieniena). Jaje historyja — nie z šarahovych: žančyna navažyłasia na surahatnaje maciarynstva, kab zarabić na ŭtrymańnie svajho dziciaci. Mnohija nie viedajuć, ale ŭ Biełarusi jano dazvolena, rehulujecca zakonam «Ab dapamožnych repraduktyŭnych technałohijach» i ličycca adnym ź ich vidaŭ naroŭni z EKA.

Taćciana kaža, što da rašeńnia jaje padšturchnuła adsutnaść finansavaj dapamohi na dzicia ad muža, jaki syšoŭ da inšaj žančyny. Na žal, historyja ź ciažarnaściu skončyłasia trahična, ale i paśla hetaha niaščaści surahatnaj mamy nie skončylisia. Pavodle słoŭ surazmoŭcy, jana choča papiaredzić usich žančyn, jakija płanujuć ustupić u prahramu surmaciarynstva: kali jość prablemy ŭ siamiejnych adnosinach, ich treba vyrašyć «na bierazie».

«Zaciažaryła praz EKA ŭ 2023 hodzie»

Dakumientalna Taćciana aformiła z mužam Kiryłam (imia taksama źmianili) razvod tolki hod tamu, ale faktyčna šlub raspaŭsia jašče ŭ 2023-m, kali jana daviedałasia, što ŭ muža jość inšaja žančyna. Peŭny čas para jašče žyła pad adnym dacham, ale muž pastupova pieravoziŭ rečy da novaj dziaŭčyny.

Hrošaj nie chapała, i mienavita heta zaachvociła žančynu zarabić na surahatnym maciarynstvie.

— Dałučyłasia da prahramy surahatnaha maciarynstva ŭ minskaj kampanii, prajšła ŭsie abśledavańni i zaciažaryła praz EKA ŭ 2023 hodzie. Na toj momant muž jašče nie kančatkova pakinuŭ naš dom, ale pra surahatnuju ciažarnaść nie viedaŭ. Zrešty, my ŭžo nie žyli jak muž i žonka, intymnych adnosin pamiž nami nie było.

Taćciana prajšła abśledavańni i paznajomiłasia ź bijałahičnymi baćkami, heta akazałasia para z Rasii. Surahatnaj mamie pierasadzili dva embryjony. Pryžyŭsia adzin, Taćciana pačała vynošvać dzicia.

Zhodna z damovaj, zavieranaj u nataryusa, za heta joj naležała ŭznaharodžańnie 14 300 dalaraŭ.

Uračy kanstatavali raptoŭnuju śmierć

Rody adbylisia na 37‑m tydni ciažarnaści, ale, na žal, niemaŭla pamierła. Pryčynaj nazvali sindrom raptoŭnaj dziciačaj śmierci: jak patłumačyli miedyki, takoje zdarajecca, pakul dzicia zanadta małoje i myšcy ŭ jaho nie raźvityja — jano jak by «zabyvajecca» dychać.

Taćciana kaža, što ź bijałahičnymi baćkami jana pasiabravała i kamunikuje da hetaha času. Dzicia jana vynasiła — tak što joj zapłacili častku sumy — 9 tysiač dalaraŭ.

Tym časam adnosiny Taćciany z Kiryłam stanavilisia ŭsio horšymi.

Kirył padaŭ u sud — vyrašyŭ zabrać pałovu hanararu, atrymanaha za surahatnuju ciažarnaść. Na momant apłaty pasłuh Taćciany jak surmamy jana z Kiryłam jašče znachodziłasia ŭ šlubie, a značyć, hrošy ličylisia sumiesna nažytymi.

Kirył vyjhraŭ sud — pavodle jaho rašeńnia Taćciana pavinna addać jamu 7500 dalaraŭ.

Jak vyjšła, što były muž zabraŭ bolšuju častku hanararu? Sprava ŭ tym, što ŭ nataryjalnaj damovie značylisia tyja samyja 14 300 tysiač dalaraŭ — ich pałovu mužčyna i adsudziŭ. Zrešty, Taćciana kaža, što paśla paŭtara hoda niervovych sudovych pasiadžeńniaŭ sama zdałasia i pahadziłasia addać hrošy. Byłaja para zaklučyła miravoje pahadnieńnie.

— Ja pracuju i pacichu ich vypłačvaju. Chaču svaim prykładam papiaredzić žančyn, jakija zadumvajucca stać surahatnaj maci: voś tak byłyja mužy mohuć adabrać sabie častku hrošaj. Nie paŭtarajcie maju pamyłku i pradumajcie svaje kroki, kali ŭ vas adnosiny z partnioram drennyja, — padsumoŭvaje Taćciana.

• 2
• 1
• 4
• 4
• 3
• 3
• 12
• 0