Hrodna, Biełastok, Koŭna — paraŭnoŭvajem, dzie praściej kupić kvateru čałavieku ź siarednim zarobkam
Hetyja try harady ŭ Biełarusi, Polščy i Litvie padobnyja svaim statusam, znachodziacca blizka adzin da adnaho i majuć pryblizna adnolkavuju kolkaść nasielnictva. Praanalizavali, žycharam jakoha centru rehijona ź siarednim zarobkam praściej nabyć ułasnaje žytło.
Hrodna
U abłasnym centry žyvie amal 364 tysiačy čałaviek. Mietr žytła ŭ Hrodnie pavodle realnych ździełak za śniežań 2025 hoda kaštuje 1017 dalaraŭ.
Siaredni naličany zarobak u Hrodnie ŭ listapadzie 2025 hoda byŭ 2244 rubli na ruki, heta składała kala 770 dalaraŭ. Atrymlivajecca, što naprykancy minułaha hoda siaredniestatystyčny haradzieniec moh nabyć sabie kala 0,76 mietra siaredniestatystyčnaha žytła.
Kali brać košt pa prapanovach (1098 dalaraŭ), to budzie 0,7 mietra žytła.
To-bok na kuplu kvatery płoščaj 50 kvadrataŭ spatrebicca kala 66 siarednich hrodzienskich zarobkaŭ — daviadziecca źbirać hrošy 66 miesiacaŭ (5,5 hoda), kali nie tracić ich ni na što.
Koŭna
U litoŭskim Koŭnie pražyvaje 312 tysiač čałaviek. Siaredniaja zarpłata ŭ horadzie pa vynikach 3‑ha kvartała 2025 hoda była 1538 jeŭra na ruki. Siaredni košt mietra žytła ŭ horadzie nabližajecca da 2500 jeŭra.
Atrymlivajecca, što za siaredni zarobak žychar Koŭna moža nabyć sabie kala 0,62 mietra siaredniestatystyčnaha žytła.
Na kuplu kvatery płoščaj 50 kvadrataŭ spatrebicca kala 80 siarednich zarobkaŭ — daviadziecca źbirać hrošy 6,7 hoda.
Biełastok
U polskim Biełastoku pražyvaje biez małoha 290 tysiač čałaviek. Siaredniaja zarpłata za listapad 2025 hoda skłała prykładna 1290 jeŭra na ruki. Mietr žytła ŭ horadzie kaštuje ŭ siarednim kala 2370 jeŭra).
Atrymlivajecca, što za siaredni zarobak žychar Biełastoka moža nabyć sabie kala 0,55 mietra siaredniestatystyčnaha žytła.
Na kuplu siaredniestatystyčnaj kvatery na 50 mietraŭ u Biełastoku spatrebicca 91 siaredni zarobak, ci kala 7,5 hoda adkładańnia zarobku całkam.
Ahułam situacyja z paraŭnańniem dastupnaści žytła ŭ Hrodnie, Koŭnie i Biełastoku paŭtaraje situacyju ź Minskam, Vilniaj i Varšavaj, kali ŭ pieraliku na siaredni zarobak najbolš dastupnaje žytło ŭ Minsku, a najmienš dastupnaje — u Varšavie.
Pry hetym adznačym, što pa svajoj značnaści i zamožnaści ŭ miežach krainy polski Biełastok sastupaje litoŭskamu Koŭnu i biełaruskamu Hrodnu. Da taho ž Biełastok jašče i samy biedny centr vajavodstva (anałah biełaruskich abłaściej).
+ bonusny horad u Polščy
Tamu dla paraŭnańnia my pahladzieli jašče i Poznań ź jaje 535 tysiačami nasielnictva i kudy bolš vysokim siarednim zarobkam, čym u Biełastoku.
Siaredniaja zarpłata ŭ Poznani pa stanie na listapad 2025 hoda składała kala 1666 jeŭra na ruki. Siaredni košt mietra žytła ŭ Poznani składaje kala 2840 jeŭra.
Tam na adnu siaredniuju zarpłatu možna nabyć amal 0,59 mietra siaredniestatystyčnaha žytła. Heta krychu bolš, čym moža sabie dazvolić žychar Biełastoka, ale ŭsio adno Polšča tut zastajecca na trecim miescy, sastupajučy jak Biełarusi, tak i Litvie.
A što z dastupnaściu kredytaŭ?
U Polščy i Litvie kredyty na žyllo bolš dastupnyja, čym u Biełarusi. Nižej pryviedzieny staŭki bieź jakich-niebudź ilhotnych prahram.
Najmienšyja staŭki kredytu ŭ Litvie. Tam ipatečny kredyt ciapier možna ŭziać pad 4,6—5,6%.
U Polščy, jakaja, u adroźnieńnie ad Litvy, nie ŭ jeŭrazonie, staŭki dla ipateki krychu vyšejšyja — kala 6,1—7%.
U Biełarusi ž staŭki kredytu nieparaŭnalna vysokija i znachodziacca ŭ miežach 16—18%.
Atrymlivajecca, što kali nie źviartacca pa kredytnyja hrošy, to najbolš dastupnaje žytło ŭ Hrodnie, a kali brać ipateku, to budzie praściej žycharam Koŭna.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku22
Kamientary