Fatahrafii hetaj słanimčanki vystaŭlajucca pa ŭsim śviecie — praź ich jana raskazvaje i pra dyktaturu ŭ Biełarusi FOTY
Saša Vialička — 32‑hadovaja mastačka i fatohrafka rodam sa Słonima, jakaja ŭ svajoj tvorčaści daśleduje ciažkija temy: traŭmy, emihracyju, źniavoleńnie i prapahandu. Jana stała pieršaj biełaruskaj-łaŭreatkaj prestyžnaj premii pamiaci polskaha fatohrafa Konrada Pustoły, uziała hałoŭnuju ŭznaharodu The SEEEU Photo Essay Award u ramkach pieršaha jeŭrapiejskaha Miesiaca fatahrafii ŭ Japonii, jaje pracy vystaŭlajucca pa ŭsim śviecie.
Niadaŭna Saša atrymała padtrymku Fotofestiwal (Łodź) za prajekt «Vyklikanyja na dyvan» («Called to the Carpet»), pryśviečany bijapalityčnamu kantrolu nad žančynami-palitźniavolenymi ŭ Biełarusi.
Mienavita ŭ Łodzi z 19 červienia pa 12 lipienia možna budzie pabačyć usie tvory mastački z hetaj sieryi.
Pra što raskazvajuć fatahrafii hetaj mastački? Dla prajekta «Called to the Carpet» aŭtarka padrychtavała sieryju partretaŭ źniavolenych žančyn, nadrukavanych na dyvanie. U pracesie joj dapamahali inicyjatyvy «Palitviazynka» i «Ružovyja chustki».
Sašyn prajekt «Stan admaŭleńnia» (State of Denial) daśledavaŭ, jak ludzi funkcyjanujuć u ličbavym śviecie, nasyčanym fejkavymi navinami, dypfejkami i manipulacyjami ŭ ŚMI.
Abapirajučysia na realnyja historyi zatrymańniaŭ u Biełarusi, jana stvaryła pastanovačnyja fatahrafii, jakija pakazvali absurdnaść i žorstkaść žyćcia pry dyktatury.
Za hety prajekt biełaruska dadatkova atrymała Hran-pry Les Boutographies 2025 — adnaho ź viadučych jeŭrapiejskich fiestyvalaŭ aŭtarskaj fatahrafii.
Da vymušanaj emihracyi paśla padziej 2020 hoda fatohrafka šmat zdymała Biełaruś i dakumientavała śviet i ludziej navokał. U tym liku — rodny Słonim.
Pracy Alaksandry prezientavalisia ŭ Francyi, Hiermanii, Partuhalii, Niderłandach, Ispanii, Sinhapury i Japonii. Zaraz ich taksama možna adšukać u polskaj halerei sučasnaha mastactva Jednostka.
Kamientary