U Polščy sudziać 33 čałaviek, abvinavačanych u bujnoj kantrabandzie ź Biełarusi
Rajonny sud u Siedlcach budzie razhladać spravu, u jakoj abvinavačvajucca 33 čałavieki. Pavodle materyjałaŭ śledstva, jany ŭdzielničali ŭ arhanizavanaj złačynnaj hrupie, što zajmałasia niezakonnym uvozam cyharet i padatkovymi machinacyjami.
Hrupa dziejničała ź listapada 2018 hoda da kastryčnika 2021-ha. Cyharety niezakonna ŭvozilisia ź Biełarusi ŭ Polšču praz aŭtamabilny punkt propusku «Babroŭniki», a taksama praz čyhunačny pierachod «Terespal».
Usiaho, pavodle materyjałaŭ śledstva, było pierapraŭlena 29,44 miljona pačak cyharet. Straty dla polskaha biudžetu acenienyja amal u 498 miljonaŭ złotych (zvyš 140 miljonaŭ dalaraŭ pa ciapierašnim kursie).
Kab zabiaśpiečyć bieśpieraškodny pravoz, udzielniki hrupy, jak śćviardžajecca, pieradali mytnikam chabar na sumu nie mienš za 99,5 tysiačy złotych i 898,4 tysiačy jeŭra. Pry hetym sami supracoŭniki mytni ŭ hetym abvinavaŭčym zaklučeńni nie fihurujuć.
U miežach rasśledavańnia aryštavana majomaść na sumu 10,9 miljona złotych.
Abvinavaŭčy akt u sud nakiravała Padlašskaje adździaleńnie Departamienta pa baraćbie z arhanizavanaj złačynnaściu i karupcyjaj Nacyjanalnaj prakuratury ŭ Biełastoku.
Kamientary