Pad Smalavičami sa stralaninaj zatrymali troch małaletak-zamiežnikaŭ, jakija na zamovu napali na dom piensijanieraŭ
Napadnikaŭ schapili, troje achviar u balnicy.
Kala čatyroch hadzin spracavała tryvožnaja sihnalizacyja pryvatnaha žyłoha doma ŭ Smalavickim rajonie. Na miesca vyjechali supracoŭniki Žodzinskaha adździeła Departamienta achovy, paviedamlaje pres-słužba MUS.
Milicyjanty błakavali dom, u jakim znachodzilisia troje ŭzbrojenych złamyśnikaŭ. Jany akazali supraciŭ, milicyjanty vykarystoŭvali aŭtamatyčnuju zbroju.
Dvuch napadnikaŭ zatrymali adrazu, treci sa zbrojaj schavaŭsia.
U Smalavickim rajonie ŭvodziŭsia śpiecyjalny płan pa zatrymańni ŭzbrojenych złačyncaŭ. Treciaha paśla niepraciahłych pošukaŭ złavili na terytoryi Smalavickaha rajona.
Napadnikami akazalisia zamiežnyja hramadzianie, adnamu ź ich 17, dvaim — pa 18 hadoŭ. Ich hramadzianstva nie nazyvajecca.
Jak akazałasia, maładyja ludzi, uzbroiŭšysia pistaletam, bitaj i nažom, vyrašyli napaści na dom. Papiarednie, napad na pryvatny dom adbyŭsia pa zamovie.
Na miesca złačynstva asabista vybyŭ ministr unutranych spraŭ Ivan Kubrakoŭ.
Paviedamlajecca, što z ulikam taho, što napad nosić zakazny charaktar, da razboru padklučany supracoŭniki Nacyjanalnaha centralnaha biuro Interpoła.
Troje paciarpiełych (ad 1958 da 1962 h.n.) dastaŭleny ŭ balnicu. Pra ich stan nie paviedamlajecca.
Kamientary