Ministr sportu zaklikaŭ UEFA dazvolić zbornaj Biełarusi hulać doma, jak Izrailu. Ale Izrail doma pakul nie hulaje
Ministr sportu i turyzmu Biełarusi Siarhiej Kavalčuk publična paprasiŭ UEFA pierahledzieć pytańnie adnosna zabarony dla zbornaj Biełarusi hulać futbolnyja matčy na chatnich palach. Maŭlaŭ, čamu Izrail, u jakim vajenny kanflikt, hulaje, a nam nielha? Pry hetym jon zaśviedčyŭ niaviedańnie ci śviadomaje ihnaravańnie važnaha niuansu.
«Publična prašu UEFA: my hladzim na suśvietnuju situacyju. Usie matčy pravodzim za miežami krainy. Pry hetym dziaržava praciahvaje raźvivać infrastrukturu. U nas šmat stadyjonaŭ vysokaha ŭzroŭniu. My hatovyja arhanizavać pryjezd kamandaŭ siudy.
Adna z maich prośbaŭ — dazvolić praviadzieńnie chatnich matčaŭ nacyjanalnaj zbornaj u Biełarusi. Niaŭžo toj ža Izrail, jaki ŭdzielničaje ŭ kanflikcie, bolš zasłuhoŭvaje prava pravodzić matčy doma? Z ulikam situacyi, jakaja źmianiłasia z 2022 hoda, prosim pierahledzieć rašeńnie», — zajaviŭ Kavalčuk.
Adnak ža reč u tym, što ŭ kastryčniku 2023 hoda matčy nacyjanalnaj kamandy Izraila ŭ adboračnym turniry Jeŭra-2024 z-za situacyi ŭ siektary Haza byli pieraniesienyja na inšyja daty i prajšli na niejtralnych palach. Z taho momantu zbornaja Izraila pravodzić chatnija sustrečy ŭ inšych krainach. Toje ž samaje tyčyłasia i izrailskich kłubaŭ — apošnija hady jany pravodzili «chatnija» matčy na palach u Sierbii ci Vienhryi.
Tolki ciapier razhladajecca pytańnie ab źmienie takoj situacyi. UEFA źbirajecca adnavić praviadzieńnie ŭ Izraili mižnarodnych futbolnych matčaŭ z červienia 2026 hoda. Pryncypovaje rašeńnie ab hetym užo pryniata, a sarvać płan moža tolki, jak adznačajecca, «surjoznaje paharšeńnie abstanoŭki ŭ śfiery biaśpieki».
Ale ž na siońniašni dzień intensiŭny vajenny kanflikt u Izraili, źviazany ź siektaram Haza, praktyčna skončany, baki padpisali adpaviednyja pahadnieńni. Tamu i padstaŭ trymacca raniejšych abmiežavańniaŭ u UEFA niama, chaj sabie niejkija abvastreńni situacyi ŭ siektary Haza časam i ŭźnikajuć.
Miž tym jak rasijskaja vajna va Ukrainie, za saŭdzieł u raźviazvańni jakoj byli nakładzienyja sankcyi i na łukašenkaŭskuju Biełaruś, spyniacca i nie dumaje. Adpaviedna, što b ni kazaŭ Siarhiej Kavalčuk, u našym rehijonie niama i «situacyi, jakaja źmianiłasia z 2022 hoda».
Pierad zbornaj Biełarusi pa futbole pastavili zadaču
Staŭ viadomy kalandar zbornaj Biełarusi ŭ Lizie nacyj
Uładalnik «MŁ Viciebsk» pra mety kłuba: Vyjhrać čempijanat, Kubak i Supierkubak, a taksama prajści ŭ hrupavy etap adnaho ź jeŭrakubkaŭ
Najlepšy futbalist Biełarusi, jaki vybiraŭ pamiž tureckim i karejskim kłubami, pierachodzić u viciebski «Maksłajn»
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ5
Kamientary