Amierykanskaja televiadučaja abviaściła ŭznaharodu $1 młn za infarmacyju ab źnikłaj maci
Ab uznaharodžańni viadučaja kanała NBC praź ślozy abjaviła ŭ videazvarocie ŭ instahramie, apublikavanym u aŭtorak ranicaj.
Amierykanskaja televiadučaja Savanna Hatry abviaściła, što jaje siamja prapanuje ŭznaharodu 1 miljon dalaraŭ za infarmacyju, jakaja dapamoža znajści jaje maci Nensi, jakaja źnikła ŭ noč na 1 lutaha, piša Bi-bi-si.
U toj ža čas ŚMI publikujuć novyja kadry ź nieviadomym u mascy kala doma 84‑hadovaj žančyny, pry hetym čas zdymki hetych materyjałaŭ aficyjna nie ŭstanoŭleny.
Siamja i śledčyja miarkujuć, što žančynu vykrali nieviadomyja ź jaje doma ŭ Tusanie, štat Aryzona.
Pra ŭznaharodu viadučaja kanała NBC praź ślozy abviaściła ŭ videazvarocie ŭ instahramie, apublikavanym u aŭtorak ranicaj.
«My ŭsio jašče vierym u cud, my ŭsio jašče vierym, što jana moža viarnucca dadomu — nadzieja nasupierak usiamu, — skazała viadučaja. — My taksama viedajem, što, mahčyma, užo stracili jaje, što jana mahła pajści da Hospada, jakoha lubić».
«Kali łaska, kali vy čujecie hety zvarot, kali vy čakali i nie byli ŭpeŭnienyja, niachaj heta stanie dla vas znakam — vyjdzicie na suviaź. Raskažycie, što viedajecie, i dapamažycie nam viarnuć našu lubimuju mamu dadomu, kab my mahli albo adśviatkavać cudoŭnaje, nievierahodnaje viartańnie, albo ŭšanavać cudoŭnaje, śmiełaje, mužnaje i vysakarodnaje žyćcio, jakoje jana pražyła», — praciahnuła Savanna Hatry.
Da siońnia ŭznaharoda składała 200 tysiač dalaraŭ — 100 tysiač prapanoŭvała FBR, i jašče 100 tysiač — arhanizacyja Tucson Crime Stoppers.
U apublikavanym videa Hatry taksama paviedamiła, što siamja achviaruje 500 tysiač dalaraŭ Nacyjanalnamu centru pa spravach źnikłych i ekspłuatavanych dziaciej.
U aŭtorak u śledstva taksama źjavilisia padstavy mierkavać, što padazravany ŭ vykradańni Nensi Hatry padychodziŭ da jaje ŭvachodnych dźviarej da jaje źniknieńnia, paviedamiŭ telekanał CBS News — amierykanski partnior Bi-bi-si. Pieršym pra hetuju detal paviedamiŭ kanał ABC.
Da hetaha FBR publikavała videazapis sa zvanka dźviarej z ubudavanaj kamieraj Nest, na jakoj źniaty čałaviek u mascy z zaplečnikam kala dźviarej Nensi Hatry ŭ noč jaje źniknieńnia.
Ciapier CBS News pakazała vyjavy, na jakich, vidać, namalavany mužčyna ŭ mascy, ale na hety raz biez zaplečnika. Hetyja kadry byli źniaty, vidavočna, raniej, čym papiaredniaje videa ad FBR, ale kali mienavita, nieviadoma.
Departamient šeryfa akruhi Pima, jaki viadzie rasśledavańnie źniknieńnia Nensi Hatry, u paście ŭ X pakazaŭ, što na novych videakadrach adsutničaje data ci časavaja paznaka. Tamu lubyja zdahadki pra toje, što hetyja kadry byli źniaty ŭ roznyja dni, vyklučna śpiekulatyŭnyja, dadali ŭ departamiencie šeryfa.
Pra źniknieńnie Hatry paviedamili kala apoŭdnia 1 lutaha paśla taho, jak jana nie źjaviłasia na carkoŭnuju słužbu.
Departamient šeryfa akruhi Pima ličyć, što jana była «vykradziena z doma suprać svajoj voli, mahčyma, pasiarod nočy».
Paśla jaje źniknieńnia ŭ ŚMI pastupili elektronnyja listy z patrabavańniem vykupu — za «biaśpiečnaje» viartańnie pažyłoj žančyny. 9 lutaha skončyŭsia termin, ustalavany mierkavanymi vykradalnikami dla vypłaty vykupu, i z tych časoŭ złamyśniki na kantakt nie vychodzili.
Pravaachoŭnyja orhany pa-raniejšamu nie mohuć ustanavić asobu padazravanaha ci asoby, jakaja ŭjaŭlaje cikavaść dla śledstva.
Nensi Hatry ź ciažkaściu pierasoŭvajecca, u jaje ŭstalavany kardyjastymulatar, i joj štodnia nieabchodnyja leki ad sardečnaha zachvorvańnia, paviedamili ŭłady.
Blizkija apošni raz bačyli pažyłuju maci televiadučaj uviečary 31 studzienia.
U FBR paviedamili, što pošukami Nensi Hatry ŭ kruhłasutačnym režymie zajmajecca hrupa z ekśpiertaŭ pa kryzisnych situacyjach, śledčych i inšych śpiecyjalistaŭ. Viedamstva taksama nakiravała ŭ Tusan dadatkovych supracoŭnikaŭ.
Što adbyvałasia ŭ noč, kali źnikła Nensi Hatry?
Apošni raz Hatry bačyli ŭviečary 31 studzienia ŭ jaje domie ŭ prestyžnym rajonie Katalina-Futchiłs, raźmieščanym za 10 km na paŭnočny ŭschod ad Tusana. Svajaki pažyłoj žančyny paśla siamiejnaj viačery davieźli jaje da doma kala 21:30 pa miascovym časie.
Pavodle źviestak śledčych, u noč na 1 lutaha (kala 01:47 pa miascovym časie) kamiera razumnaha zvanka dźviarej u jaje domie była adklučana i demantavana.
U 02:12 kamiera kala doma zafiksavała niejki ruch, adnak, pa słovach šeryfa, heta mahła być žyvioła.
U 02:28 kardyjastymulatar Hatry byŭ adklučany ad śpiecyjalnaha dadatku ŭ telefonie.
Ranicaj 1 lutaha prychadžanie carkvy, jakuju jana rehularna naviedvała, zaŭvažyli, što Nensi Hatry nie pryjšła na niadzielnuju słužbu, i paviedamili pra heta jaje siamji.
Paśla taho jak siamja patelefanavała pa numary 911, byli pačaty pošuki, u jakich udzielničali vałanciory i supracoŭniki pamiežnaj słužby. U takim składzie pošuki praciahvalisia da ranicy 2 lutaha.
Palicyja paviedamiła, što na hanku doma Nensi Hatry znajšli ślady kryvi, i analizy paćvierdzili, što heta była jaje kroŭ.
Taksama pobač z domam była paźniej znojdziena palčatka, padobnaja da palčatki na ruce nieviadomaha, źniataha kamieraj Nest. FBR praanalizavała DNK, vyjaŭlenuju na hetaj palčatcy, adnak nijakich supadzieńniaŭ u bazie danych vyjaŭlena nie było.
Pa słovach šeryfa akruhi Pima Krysa Nanasa, jość vialikaja niebiaśpieka, što bieź lekaŭ stan zdaroŭja Nensi Hatry moža značna pahoršycca.
Chto takaja Savanna Hatry?
54‑hadovaja Savanna Hatry — amierykanskaja televiadučaja. Z 2012 hoda jana viadzie prahramu Today na kanale NBC News. Jana taksama była adnoj z asnoŭnych viadučych efiraŭ, pryśviečanych vybaram. Raniej Hatry pracavała karespandentam NBC News u Biełym domie.
Jana naradziłasia ŭ Aŭstralii, adnak u rańnim dziacinstvie jaje siamja pierajechała ŭ Aryzonu, dzie jana i praviała bolšuju častku svajho dziacinstva.
Hatry, jakaja publična prytrymlivajecca niejtralnaj pazicyi pa palityčnych pytańniach, brała intervju ŭ byłych prezidentaŭ ZŠA Baraka Abamy i Džo Bajdena, a taksama ŭ ciapierašniaha prezidenta Donalda Trampa.
Jana atrymała jurydyčnuju adukacyju ŭ Džordžtaŭnskim univiersitecie i stupień bakałaŭra žurnalistyki va Univiersitecie Aryzony.
Jana źjaŭlajecca łaŭreatam prestyžnych žurnalisckich uznaharod — premii Edvarda Marou i niekalkich premij News Emmy. Adnu ź ich jana atrymała za intervju z Trampam, jakoje ŭziała za miesiac da vybaraŭ 2020 hoda.
Z-za dramatyčnych padziej, ź jakimi sutyknułasia jaje siamja ŭ apošnija tydni, Savanna Hatry admoviłasia ad udziełu ŭ aśviatleńni zimovych Alimpijskich hulniaŭ 2026 hoda.
«My spačuvajem joj i ŭsioj siamji Hatry, pakul praciahvajucca pošuki ich mamy», — paviedamiŭ pradstaŭnik telekanała.
Ciapier čytajuć
Kiraŭnika śledčaj hrupy pa spravie Tut.by pasadzili na 14 hadoŭ3
Kamientary